666–Haki Kakwaci Fela

“Ku tokwahale mutu ya kona ku leka ni ku lekisa, konji ya na ni nombolo, ili libizo la sibatana, kamba palo ya libizo la sona. Ki mo ku inzi butali. Ya na ni kutwisiso a bale palo ya sibatana, kakuli ki palo ya mutu; mi palo ya sona ki 666.”—Sinulo 13:17, 18.

KWA litaba ze mwa Bibele, ki ze sikai ze hoha hahulu mamelelo ya batu ni ku ba bilaeza hahulu sina taba ya bupolofita bwa za nombolo ye zinga, kamba libizo la “sibatana,” la 666. Fa televishini ni fa Intaneti, hamohocwalo ni mwa mafilimu, libuka, ni limagazini, ku kabangisizwe hahulu za nombolo yeo ya sibatana.

Ba bañwi ba nahana kuli 666 ki sisupo sa antikreste ya bulezwi mwa Bibele. Ba bañwi bona ba bulela kuli i yemela sisupo se siñwi se si beilwe ku mañi ni mañi, inge cwalo pazo kamba nto ye ñwi ye beilwe mwahali ku mutu y’e mu zibahaza ku ba mutang’a sibatana. Ba bañwi hape ba lumela kuli 666 ki nombolo ya papa wa Katolika. Ba li kuti linombolo ha ne li ka yola litaku za Siroma za lilumbatina la papa, la Vicarius Filii Dei (Mubakweli wa Mwan’a Mulimu), ni ku li cinca-cinca hanyinyani, ne ku ka fumaneha kuli 666 ki nombolo ya papa. Ba bañwi hape ba bulela kuli nombolo ye swana yeo ya fumaneha ka ku eza lipalo fa libizo la Silatini la Diocletian, Mubusi wa Roma, ni fa libizo la Siheberu la Nero Caesar. *

Nihakulicwalo, litaluso za ku inahanela fela zeo ha li lumelelani ni hanyinyani ni ze i bulela Bibele ka sibili ka za nombolo yeo ya sibatana, sina ka mo lu ka bonela mwa taba ye tatama. Bibele i patulula hande kuli ba ba na ni nombolo yeo ba ka tahelwa ki buhali bwa Mulimu ka nako ya ku fela kwa muinelo wo wa linto. (Sinulo 14:9-11; 19:20) Kacwalo, ku utwisisa taluso ya 666 haki ku tatulula fela kakwaci kono ku ama ze ñata. Ka litohonolo, Jehova Mulimu, ya na ni lilato le lituna ka ku fitisisa ili y’o hape a li Simbule sa liseli la kwa moya, ha si ka siya batanga ba hae mwa simbwi fa taba ya butokwa yeo.—2 Timotea 3:16; 1 Joani 1:5; 4:8.

[Litaluso za kwatasi]