Kana Lwa Swanela ku Lapela kwa Mangeloi Kuli A Lu Tuse?

KANA ku lukile ku lapela kwa mangeloi mwa linako za ziezi? Batu ba bañata ba nahana kuli ku lukile. Mane, New Catholic Encyclopedia i bulela kuli: “Mutu u lapela kwa . . . mangeloi . . . kono ili ka ku nahana kuli a ka lu yemela fapil’a Mulimu.” Kana lwa swanela ku lapela kwa mangeloi kuli a lu yemele?

Linzwi la Mulimu li bonisa mabizo a mabeli fela a mangeloi a sepahala a Mulimu, Mikaele ni Gabriele. (Daniele 8:16; 12:1; Luka 1:26; Juda 9) Bakeñisa kuli mabizo ao a bulezwi mwa Bibele, lu lemuha kuli lingeloi ni lingeloi ki mutu wa kwa moya ya ipitezi ya na ni libizo, isiñi fela m’ata a si a butu. Niteñi, mangeloi a mañwi ne a hanile ku bulela mabizo a ona. Ka mutala, Jakobo ha n’a buzize lingeloi le ne li mu potezi kuli li mu bulelele libizo la lona, ne li hanile. (Genese 32:29; Baatuli 13:17, 18) Ha ku na mukoloko wa mabizo a mangeloi o ñozwi mwa Bibele, mi nto yeo i tibela batu ku sa isa hahulu mamelelo ye sa swaneli kwa mangeloi.

O muñwi wa misebezi ya mangeloi ki ku isanga kwa batu mashango a zwa ku Mulimu. Mane, manzwi a Siheberu ni Sigerike a tolokilwe kuli “lingeloi” a talusa “mesinja.” Nihakulicwalo, mangeloi ha sebezi sina bayemeli ba ba isa litapelo za batu kwa lubona lwa Muambakani-ya-pahami. Mulimu u tokwa kuli litapelo li libiswe ku yena ka libizo la Mwan’a hae, Jesu Kreste, ya n’a ize: “Se mu ka kupa ku Ndate ka Libizo la ka, a mi fe sona.”—Joani 15:16; 1 Timotea 2:5.

Jehova Mulimu haki ya patehile hahulu kuli a palelwe ku lu utwa haiba lu mu atumela hande ka tapelo. Bibele i lu kolwisa kuli: “[Muñ’a] Bupilo u fakaufi ni ba ba mu lapela kaufela, ili kaufela ba ba mu lapela ka ku eza niti.”—Samu 145:18.