Piho Ya Bashaeli Ba Mubuso

Ku Fumana Batu kwa Libaka za Bona za Mubeleko

BAAPOSITOLA bo Mateu, Pitrosi, Andreasi, Jakobo, ni Joani ne ba swana mwañi? Kaufel’a bona ne ba bizizwe ki Jesu ha ne ba li kwa libaka za bona za mubeleko. Bo Pitrosi, Andreasi, Jakobo, ni Joani ne ba patehile mwa musebezi wa bona wa bundui Jesu ha n’a ba memile kuli: “Mu ni latelele.” Mateu n’a inzi fapil’a ndu ya mutelo ha n’a memilwe ku ba mulutiwa wa Jesu.—Mateu 4:18-21; 9:9.

Ku kutaza batu kwa libaka za bona za mubeleko ku kona ku tahisa mupuzo. Ka ku lemuha seo, Lipaki za Jehova ba mwa Japan cwanoñu fa ne ba likile ka t’ata ku abana mwa kalulo ye cwalo ya bukombwa. Ki lika mañi ze ne zwile mwateñi? Mwa likweli fela li sikai, misipili ya makutisezo ye likiti-kiti n’e ezizwe, mi lituto za Bibele ze 250 ne li kalisizwe. Mu nyakisise ze bonwi ze latelela.

Sikombwa wa ka nako kaufela wa mwa Tokyo n’a fumani muzamaisi wa licelo ya n’a kile a ambola ni Paki inze a sa li kwa sikolo ibat’o ba lilimo ze 30 kwamulaho. Nihaike muzamaisi y’o n’a si ka utwisisa ze ñata ze ne bulezwi ka nako yeo, n’a kalile ku tabela Bibele. Cwale bakeñisa kuli cisehelo ya hae ne i zusulusizwe, ka tabo a lumela ku zamaisezwa tuto ya Bibele mwa buka ya Zibo Ye Isa kwa Bupilo bo Bu Sa Feli. * Mi hape, a ikezeza tukiso ya ku balanga Bibele zazi ni zazi manzibwana pili a si ka lobala kale.

Paina ya ipitezi a kupa ku ambola ni muzamaisi wa musebezi ka luwaile. Nihaike kuli muzamaisi y’o n’a siyo mwa ofisi, kalibe ya n’a alabile luwaile lwa muzamaisi a buza kuli, “Kana ne mu ka tabela ku ambola ni na?” Ha se ba ambolisani ka bukuswani fa luwaile, kalibe y’o a taha ku paina mwa sibaka mo ku amuhelelwa baenyi mi a mu bulelela kuli n’a tabela ku bala Bibele. Paina ya ipitezi y’o a lukisa ku kutela teñi ni Bibele mi a kalisa ku ituta Bibele ni kalibe y’o, mi tuto ne i zamaiswanga kakusasana hahulu pili musebezi u si ka kalisa kale mwa parki ye ne li bukaufi.

Kwa ofisi ye ñwi, munna yo muñwi n’a boni ya beleka ni yena inze a amuhela Tora ni Awake! kono kapili-pili a li yumba Paki ha sa ile. Munna ya n’a boni limagazini ha li yumbiwa ha n’a caisize ku ya kwa ndu, a yo bulelela musal’a hae ya li Paki ze ne ezahezi ni ku talusa kuli kambe n’a teelelize nihaiba fela hanyinyani. Mwan’a hae wa musizana ya n’a mu utwile ha bulela cwalo, a kandeka taba yeo ku Paki ya n’a kutalezanga mwa kalulo yeo ya lipisinisi. Paki y’o kapili-pili a ya kwa musebezi ku yo potela munna y’o ya nyezi Paki mi a kalisa ku ituta Bibele ni yena. Ku si ka fita nako munna y’o a kalisa ku fumanehanga kamita kwa mikopano la Sunda.

Ku kutaza kwa batu kwa libaka za mubeleko ku tisize limbuyoti ze ñwi. Bahasanyi ba bañata mwa Japan ba cuukile hahulu kwa ku eza misipili ya makutisezo mwa lintolo, lifakitoli, ni liofisi. Hape, ka ona mukutalezo wo, ba bañata ba ba kutezi mwamulaho mwa lilimo-limo ze felile se ba potezwi mi lituto ne li kalisizwe ni bona. Ze zwile mwateñi ki ze nde ni ku fita. Puteho ye ñwi ya mwa Tokyo cwanoñu fa ne i bihile lituto za Bibele ze 108, ili ku minahana habeli palo ye ne bihilwe ñohola.

[Litaluso za kwatasi]