Ka Tuso ya Bibele, N’a Tuzi Muliko

Miliko i atile hahulu mwa lifasi kacenu. Ku buluka likuka za Bibele haki ko ku bunolo. Ka mutala, ku kana kwa ba t’ata hahulu ku utwa kelezo ya Bibele ye li: “Mu sabe buhule.”—1 Makorinte 6:18.

Yo muñwi wa Lipaki za Jehova, ye lu ka li ki Sebastian, n’a belekile mwa kampani ya Scandinavia mwa Poland. N’a na ni ku eza ka t’ata kuli a bukeleze busepahali bwa hae.

Sebastian a zibahala ka ku ba yo muñwi wa Lipaki za Jehova. Bazamaisi ba hae, ka ku itebuha mubelekelo ni ku luka kwa hae, ne ba mu kapwekile matohonolo a fitana-fitana a musebezi. Nihakulicwalo, lika za fetuha, kuli mane matohonolo ao ne a ka tokwa kuli a fumanehange kwa mikopano ya pisinisi ili ko ne ku eziwanga za ku itabisa ka zona ze sa swalehi hande.

Hañi-hañi lizwalo la Sebastian la kalisa ku mu sisita. “Muzamaisi wa ka wa ziba kuli ni yo muñwi wa Lipaki za Jehova. Kona libaka h’a ni sepile ni ku itinga ku na. Haiba ni hana ku abana teñi, ni ka sinyehelwa ki musebezi, o ne ni fumani ka t’ata. Ku cwañi ha ne ni ka fumanehanga fela kwateñi ni sa ezi se siñwi?”

Ku tuha f’o Sebastian a ziba ze ñwi za n’a ka tokwiwa ku ezanga. N’a ka libelelwa kutwi ku babalela makasitoma ba ba zwa kwa linaha li sili ka ku ba lukiseza basali ka milelo ya linyawe kuli ba ba sindeketange manzibwana. N’a ka eza cwañi?

Sebastian a lela ku hupulisa muzamaisi ka za mubonelo wa hae o tomile fa Bibele o ama muzamao o maswe. Kapili-pili kwa iponelwa hande kuli musebezi wo ne u sa swaneli Sebastian ni kuli nako ha i nze i ya n’a ka tokwa ku u tuhela. A fumana musebezi u sili kwa n’a hola mali a manyinyani kono ili o ne u si na miliko ye cwalo. Cwale s’a na ni lizwalo le li kenile.

Ne mu ka eza cwañi haiba yo muñwi a mi hapeleza ku eza kamba ku lumelela buhule? Kana ne mu ka tabela ku eza cinceho ye tuna? Kona mwa na ezelize Josefa wa kwaikale, sina ha ku bonisizwe kwa Genese 39:7-12.