Kana Buikambuso kwa Lipolitiki Bwa Tibela Lilato la Sikreste?

KU BA Mukreste ku ama ze ñata ku fita fela ku bala Bibele, ku lapela, ni ku opela lipina la Sunda. Ku ama ku ezeza Mulimu lika mi hape ni ku ezeza batu. Bibele i li: “Ku lata kwa luna ku si ke kwa ba ka manzwi ni ka lulimi, kono ibe ka likezo ni ku eza niti.” (1 Joani 3:18) Jesu n’a isa hahulu ba bañwi pilu, mi Bakreste ba bata ku mu likanyisa. Muapositola Paulusi n’a susuelize balumeli ba bañwi kuli ba “tiise kamita musebezi wa Mulena.” (1 Makorinte 15:58) Kono musebezi wa Mulena ki ufi? Kana u ama ku lika ku cinca miezezo ya lika ya muuso ili ku tusa babotana ni ba ba hatelezwi? Kana kona sa n’a ezize Jesu seo?

Nihaike Jesu n’a susuelizwe ku kena mwa litaba za bupolitiki kamba ku yemela ba bañwi ku zona, n’a hanile ku eza cwalo. N’a  hanile ku fiwa ki Satani m’ata fahalimw’a mibuso kaufela ya lifasi, n’a hanile ku kenyiwa mwa likañi la za ku lifa mitelo, mi n’a picukile muta batu ne ba bata ku mu eza mulena. (Mateu 4:8-10; 22:17-21; Joani 6:15) Kono ku ikambusa kwa hae ne ku si ka mu palelwisa ku tusa ba bañwi.

Jesu n’a isize pilu ku ze n’e ka tusa batu ku ya ku ile. Nihaike ku fepa kwa hae batu ba 5,000 ni ku folisa kwa hae bakuli ne ku imuluzi batu ba sikai ka nakonyana, tuto ya hae ne i fumanisize batu kaufela limbuyoti ze inelela. Jesu n’a t’o zibahala kuli ki “Muluti,” isi muonga-ongi wa misebezi ya kimululo. (Mateu 26:18; Mareka 5:35, NW; Joani 11:28) N’a ize: “Ki sona se ni pepezwi, ni se ni tezi mwa lifasi: kuli ni t’o paka niti.”—Joani 18:37.

Ku Kutaza Nto Ye Nde Ye Fita Lipolitiki

Niti ya n’a lutile Jesu ne si ya za bupolitiki. Kono ne i tomile fa Mubuso wa n’a ka ba Mulena wa ona. (Luka 4:43) Mubuso wo ki mulonga wa kwa lihalimu, mi u ka yola lipuso kaufela za butu ni ku tiseza batu kozo ye inelela. (Isaya 9:6, 7; 11:9; Daniele 2:44) Kacwalo, ki wona fela fo i yendami sepo ya niti ya batu. Kana ku shaela sepo ya niti ye cwalo ya za kwapili ha ku bonisi lilato le lituna ku fita ku susueza batu ku sepa batu ba bañwi kuli ba ba lukiseze za kwapili? Bibele i li: “Mu si ke mwa isepisa ka malena, nihaiba ka bana ba batu, ba ba palelwa ku tusa. Moya wa bona wa yelela, ba kutela mwa liluli; isali ka lizazi lona leo, milelo ya bona ya fela. U filwe mbuyoti mutu ya na ni Mulimu wa Jakobo ku mu tusa, ya isepisa ka [Muñ’a] Bupilo, Mulimu wa hae.” (Samu 146:3-5) Kacwalo, mwa sibaka sa ku luma balutiwa ba hae ku yo kutaza za mwa ku onga-ongela hande milonga, Jesu n’a ba lutile ku kutaza ‘evangeli ya mubuso.’—Mateu 10:6, 7; 24:14.

Kacwalo, wo ki ona “musebezi wa Mulena” o ba filwe ku peta bakutazi ba Sikreste. Bakeñisa kuli babusiwa ba Mubuso wa Mulimu ba tokwiwa kuli ba latane, Mubuso wo u ka kona ku felisa bubotana ka ku abela batu lika ka ku likanelela. (Samu 72:8, 12, 13) Yeo ki taba ye nde mi kaniti i swanela ku kutazwa.

Kacenu, Lipaki za Jehova ba swalisani mwa ku peta “musebezi wa Mulena” wo mwa linaha ze 235. Ka ku likana ni taelo ya Jesu, ba bonisa likute kwa milonga kaufela. (Mateu 22:21) Kono hape ba mamela manzwi a n’a bulelezi balateleli ba hae, a’ li: “Ha mu ba lifasi, ni kuli ni mi ketile mwa lifasi.”—Joani 15:19.

Ba bañwi be ne ba kutaza lipolitiki ba cincize hamulaho wa ku ituta Bibele ka tokomelo. Mutu yo muñwi wa lipolitiki wa kwa Italy ya n’a li mwa kopano ya Catholic Action, ye ne zamaiswa ki keleke, n’a ize: “Ne ni keni mwa lipolitiki ka ku ikutwa kuli mutu u swanela ku ezeza batu se siñwi kuli lipolitiki ni mupilelo li konde.” Ha s’a tuhezi ku ba muzamaisi wa tolopo ilikuli a kutazange Mubuso wa Mulimu ka ku ba yo muñwi wa Lipaki za Jehova, n’a talusize libaka batu ba ba na ni niti ha ba palelwanga ku eza  hande mwa lipolitiki. “Lifasi li mwa muinelo o li li ku ona, isi kabakala kuli batu ba bande ha ba si ka lika ku lukisa miinelo ya bupilo, kono kabakala kuli buikatazo bo bunde bwa batu ba sikai bu komilwe ki bumaswe bwa batu ba bañata.”

Ku sa ikenya mwa lipolitiki ka mulelo wa ku kutaza sepo i nosi ya niti ya batu ha ku palelwisi Bakreste ba niti ku tusa ba bañwi mwa linzila za butokwa. Batu be ba tusa ku ba babusiwa ba Mubuso wa Mulimu ba ituta ku cinca mibonelo ye maswe, ku kuteka tamaiso, ku kondolokisa bupilo bwa lubasi lwa bona, ni ku sa ba ni mubonelo o fitelezi wa sifumu. Sa butokwa hahulu kikuli Lipaki za Jehova ba tusa batu ku ikola silikani se situna ni Mulimu.

Bakutazi ba Mubuso wa Mulimu ba tusa batu ba mwa libaka ze ba pila ku zona. Kono se situna ni ku fita kikuli ba tusa batu ku sepa mulonga wa luli ili wo ka tisa kozo ye inelela kwa batu kaufela ba ba lata Mulimu. Bakeñisa buikambuso bwa bona kwa lipolitiki, Bakreste bao ba lukuluhile ku fa tuso ye ina ku inelela mi yeo ki tuso ya butokwa hahulu ye fumaneha kacenu.

[Mbokisi/Siswaniso se si fa likepe 7]

Ku Siya Lipolitiki ni ku Kala ku Kutaza Mubuso wa Mulimu

Inz’a sa li mushimani, Átila a ituta lituto za tukuluho kwa baprisita ba keleke ya Katolika ya mwa silalanda sa habo mwa Belém, Brazil. N’a tabela ku utwa za kuli batu kwa mafelelezo ba ka lukuluha kwa buhateleli mi a kena mwa sikwata sa batu ba ba wayelela taba yeo, mwa n’a itutile za ku onga-onga likwata ze caula ku bonisa ku sa tabela ni za ku shemaeta muuso kuli u eze mo ba tokwela bona.

Kono Átila hape n’a ikola ku lutanga bana ba batu ba mwa sikwata seo, ka ku itusisa buka ya n’a filwe ya Ku Teeleza ku Muluti Yo Mutuna. * Ne i bulela za muzamao o munde ni za ku utwa tamaiso. Seo sa tahisa kuli Átila a ipuze libaka ba ba yemela tuto ya tukuluho ha ba sa lateleli lipimo za Jesu ze pahami za muzamao ni libaka ba bañwi ha ba libalanga ku tusa ba ba hatelezwi muta ba fumana m’ata. A tuhela ku swalisana ni sikwata seo. Hasamulaho, Lipaki za Jehova ba t’o mu potela fa ndu mi ba mu bulelela za Mubuso wa Mulimu. Kapili-pili a kalisa ku ituta Bibele ni ku ituta za mo bu ka felezwa luli buhateleli bwa batu.

Ibat’o ba ka yona nako yeo, Átila a yo fumaneha kwa mukopano wa Katolika wa za tumelo ni lipolitiki. Bazamaisi ba talusa kuli: “Zeo ki lika ze peli ze peta mulelo o swana.” Hape a yo fumaneha kwa mukopano o muñwi kwa Ndu ya Mubuso. N’a izo bona shutano ye tuna luli! Nto ye ñwi ya n’a boni kikuli ne ku si na ku zuba, ku nwa, kamba ku eza lishea la matapa. A ikatulela ku swalisana ni bona mwa musebezi wa bona wa ku kutaza, mi kapili-pili a kolobezwa. Ka nako ya cwale, wa bona libaka tuto ya tukuluho ha i si tatululo ya niti kwa matata a babotana.

[Litaluso za kwatasi]

[Maswaniso a fa likepe 6]

Buikambuso bwa likombwa za Sikreste ha bu ba palelwisi ku tusa ba bañwi