Kana mwa Tiiswa ki Linzwi la Mulimu?

HA MU li mwa matata, mu ezanga cwañi? Mwa taba ya Jesu, ku hupula liñolo le li swanela ne ku mu tusize ku tiyela miliko ya Satani. (Mateu 4:1-11) Ka ku swana, Mulena Davida ha na libani ni miliko ya ka butu, na tiisizwe ki Linzwi la Mulimu. N’a ize: “Mwa buñata bwa minahano ya ka, likutazo za hao ki zona ze ni tiisize pilu.”—Samu 94:19.

Ka mukwa o swana, ku hupula liñolo le lu lata hahulu kwa kona ku lu omba-omba kamba ku lu tiisa ha lu li mwa matata. Ka mutala, Rex, ya na ni lilimo ze 89 cwale, u bile mukutazi wa ka nako kaufela ku zwa ka 1931. Niteñi, u li: “Hañata ne ni ikutwanga ku sa swanela ha ni fiwa musebezi o ipitezi mwa bukombwa.” Na ezize cwañi? “Ne ni hupuzi liñolo le ni lata hahulu, la Liproverbia 3:5, le li bulela kuli: ‘U sepe [Muñ’a] Bupilo ka pilu ya hao kaufela, mi u si ke wa tiyela fa butali bwa hao.’ Ku hupula ni ku itusisa liñolo le, ku ni tusize ku kondisa hande misebezi ye ni fiwa mwa bukombwa.”

Nihaiba banana b’a fumananga tuso ka ku ba ni liñolo le ba lata hahulu. Jack wa lilimo ze 6 u bulela kuli liñolo la lata hahulu ki Mateu 24:14. Liñolo leo li mu susueza ku yanga mwa ku kutaza ni bashemi ba hae. U bulela kuli: “Ni yanga mwa bupaki la Mukibelo ni la Mukibelo ni boma, bondate, ni kaizel’a ka.”

Sina Jesu, kana fokuñwi mwa libananga ni matata a’ lika tumelo ya mina? Kacwalo liñolo la Mafilipi 4:13 l’a kona ku ba le liñwi la mañolo e mu lata hahulu. Sina Mulena Davida, kana mw’a katazwanga ki “buñata bwa minahano”? Haiba ki cwalo, ku hupula liñolo la Mafilipi 4: 6, 7 ku ka mi tiisa. Kana fokuñwi mu ikutwanga ku bilaela kuli sebelezo ya mina ku Mulimu ki ya mbango? Haiba ki cwalo, ku hupula liñolo la 1 Makorinte 15:58 ku ka mi tiisa.

Ka ku hupula mañolo a swanela, lu lumeleza Linzwi la Mulimu ku lu fa m’ata. (Maheberu 4:12) Mañolo a cwalo e lu lata a’ kona ku lu tiisa ni ku lu omba-omba.—Maroma 15:4.