Buikatazo bwa Batu bwa ku Bata Ku Tabisa Mulimu

“KWA li ku simwa, ha ku si ka ba kale ni lusika lwa batu lo ne lu s’a ngi Mulimu kuli ki yena muzamaisi ni mubupi. Ku bile cwalo luli nihaiba kwa macaba a iketezi ku sa lumela ku Mulimu kabomu.” Kona mw’a bulelela John Bowker mwa buka ya hae y’e li God—A Brief History. Ka nzila ye ñwi, buikatazo bwa ku bata Mulimu ni ku shemubiwa ki yena bu bile nto ya ka taho kwa batu kamukana. Mwa lifasi kamukana, batu ba bañata ba na ni takazo ye buniti ya ku bata ku tabisa Mulimu. Niteñi, mukwa o ba lika ku tabisa Mulimu ka ona wa fapahana-fapahana ka ku ya ka litumelo za bona.

Ba bañwi ba lumela kuli se si tokwahala fela kuli lu shemubiwe ki Mulimu kiha lu ka pila bupilo bo bunde. Ba bañwi bona ba ikutwa kuli b’a kona ku tabelwa ki Mulimu ka ku tusa babotana. Mi hape ku na ni batu ba bañata ba b’a nga mikiti ya bulapeli ni lizo ku ba za butokwa hahulu.

Kwa neku le liñwi, ku na ni batu ba ba ikutwa kuli ha ba koni ku fita ku Mulimu—ba ikutwa kuli u kwahule hahulu kamba u patehile hahulu ni litaba ze ñwi kuli mane ha koni ku isa pilu kwa batu-tu fela. Epikure, muluti wa za mihupulo ya batu wa kwa Greece ya kwaikale kutwi n’a lumela kuli ‘milimu i kwahule hahulu mi ha i koni ku ezeza batu ze nde kamba ze maswe.’ Niteñi, buñata bwa ba ba na ni mihupulo ye cwalo ki balumeli. Ba bañwi mane ba kana ba fa matabelo ni ku eza lizo ze ñwi za bulapeli ka sepo ya ku tabisa bokukululu ba bona ba ba shwile.

Mina mu nahana cwañi? Kana Mulimu luli wa lemuha buikatazo bwa luna bwa ku bata ku shemubiwa ki yena? Kana kwa konahala ku luna ku tabisa pilu ya Mulimu?

 [Manzwi a bañi ba siswaniso fa likepe 2]

LIKEPE LA FAHALIMU: Ka tumelezo ya ba ROE/Anglo-Australian Observatory, siswaniso si swanisizwe ki David Malin