Mwa Kona Ku Tabisa Mulimu

KANA likezo za luna za kona ku ama maikuto a Mulimu? Kana Mulimu wa kona ku ba ya tabile? Ba bañwi ba nga kuli Mulimu ki m’ata fela. Kana ne lu ka libelela nto ye si na sibupeho ku taba? Kutokwa. Niteñi, ha mu nyakisise se i bulela Bibele ka za Mulimu.

Jesu Kreste n’a bulezi kuli: “Mulimu ki Moya.” (Joani 4:24) Moya ki mufuta wa bupilo o fapahana ni bupilo bwa batu. Nihaike ha u bonahali kwa batu, moya u na ni mubili—“mubili wa moya.” (1 Makorinte 15:44; Joani 1:18) Ka ku itusisa liswanisezo, Bibele mane i talusa Mulimu kuli u na ni meto, mazebe, mazoho, ni ze ñwi cwalo. * Mulimu hape u na ni libizo—libizo la hae ki Jehova. (Isaya 12:2) Kacwalo, Mulimu ya bulezwi mwa Bibele ki mutu wa moya. (Maheberu 9:24) “Ki Mulimu Ya-Pila, ki Mulena wa ka nako ni nako.”—Jeremia 10:10.

Ka ku ba mutu luli ya pila, Jehova u na ni mihupulo mi wa kona ku eza lika. U na ni tulemeno ni maikuto, ku na ni lika za lata ni za sa lati. Bibele mane i na ni lipulelo ze ñata ze patulula lika za tabela ni lika za sa tabeli. Hailif’o milimu ye ezizwe ki batu ni maswaniso a lapelwa hañata a latelela fela mikwa ni tulemeno twa bañi ba ona, Mulimu ya m’ata ote, Jehova, ki yena luli Musimululi wa maikuto a beile kwa batu.—Genese 1:27; Isaya 44:7-11.

Jehova ku si na ku kakanya ki “Mulimu ya tabile.” (1 Timotea 1:11, NW) H’a tabiswangi fela ki lika za bupile, kono hape u banga ni tabo ya ku taleleza mulelo wa hae. Ka mupolofita Isaya, Jehova u li: “Ni ka eza se ni lata kaufela . . . Ki se ni bulezi mi ni ka si eza; ki se ni lelile mi ni ka si feleleza.” (Isaya 46:9-11) Walisamu n’a opezi kuli: “[Muñ’a] Bupilo a tabele misebezi ya hae.” (Samu 104:31) Kono hape ku na ni libaka le liñwi le li tisa kuli Mulimu a be ya tabile. U li: “Mwan’aka u talife, mi u tabise pilu ya ka.” (Liproverbia 27:11) Mu nahane fela taluso ya manzwi ao. Manzwi ao a bonisa kuli lwa kona ku tabisa Mulimu!

Mo Lu Kona ku Tabiseza Pilu ya Mulimu

Mu nahane ka za m’o toho ya lusika Nuwe n’a konezi ku tabiseza pilu ya Jehova. Nuwe “a shemubiwa ki [Muñ’a] Bupilo” kakuli “ne li mutu ya lukile, ya n’a pila ka mulao mwa linako za hae.” Ka ku fapahana luli ni batu ba ba maswe ba mwa miteñi ya hae, tumelo ni ku ipeya ku utwa kwa Nuwe ne li tabisize Mulimu kuli mane ku konwa ku bulelwa kuli “n’a zamaya ni  Mulimu.” (Genese 6:6, 8, 9, 22) “Ka tumelo, Nuwe . . . a saba Mulimu, mi a yaha aleka ku bandusa ba ndu ya hae.” (Maheberu 11:7) Jehova n’a tabisizwe ki Nuwe mi a mu fuyola ni lubasi lwa hae ka ku ba bandusa kwa muinelo o maswe wa misunga wa mwa linako za hae.

Toho ya lubasi Abrahama ni yena hape n’a na ni temuho ye tuna ya maikuto a Jehova. Zibo ya hae ka za munahano wa Mulimu ne i bonahezi hande muta Jehova n’a mu taluselize kuli batu ba mwa minzi ya Sodoma ni Gomora ne ba ka sinyiwa bakeñisa muzamao wa bona o maswe. Abrahama n’a ziba hande Jehova kuli mane n’a fitile fa kutwisiso ya kuli Mulimu n’a si ke a bulaya ya lukile hamoho ni ya si ka luka. (Genese 18:17-33) Lilimo-limo hasamulaho, ka ku ipeya ku utwa ketelelo ya Mulimu, Abrahama “a tahisa Isaka” kakuli n’a “kolwa kuli Mulimu u kona mane ku zusa ba ba shwile.” (Maheberu 11:17-19; Genese 22:1-18) Abrahama n’a lemuhile hahulu maikuto a Mulimu mi n’a bonisize tumelo ni buipeyo bo butuna kuli mane “a bizwa mulatiwa wa Mulimu.”—Jakobo 2:23.

Mutu yo muñwi ya n’a likile ka t’ata ku tabisa pilu ya Mulimu ne li Mulena Davida wa Isilaele ya ikale. Ka za hae, Jehova n’a ize: “Ni fumani Davida mwan’a Jese, munna ya kolisa pilu ya ka, ya ka eza se si latwa ki Na kaufela.” (Likezo 13:22) Pili a si ka talimana kale ni singangalume se si bizwa Goliati, Davida n’a beile sepo ya hae kaufela ku Mulimu mi a bulelela Saule Mulena wa Isilaele kuli: “[Muñ’a] Bupilo ya ni lamulezi kwa manala a tau, ni kwa manala a bere, u ka ni lamulela cwalo ni mwa mazoho a Mufilisita yo.” Jehova n’a fuyozi Davida kabakala sepo ya hae ku Yena, mi n’a konisize Davida ku bulaya Goliati. (1 Samuele 17:37, 45-54) Davida n’a bata kuli likezo hamohocwalo ni ‘manzwi a mwa mulomo wa hae, ni minahano ya mwa pilu ya hae, ibe z’a ka amuhela Muñ’a Bupilo.’—Samu 19:14.

Luna bo? Lu kona ku tabisa cwañi Jehova? Ka mo lu itutela hahulu ka za maikuto a Mulimu, ki ka m’o hape lu ka fitela fa ku lemuhela ze lu kona ku eza kuli lu tabise pilu ya Mulimu. Ha lu nze lu bala Bibele, ki kwa butokwa kuli lu eze buikatazo bwa ku ituta ka za maikuto a Mulimu ilikuli ‘lu tale zibo ya tato ya hae, ye ka yona lu ka fiwa butali ni kutwisiso ya za Moya, kuli lu zamaye ka mukwa o swanela Mulena, a lu katelwe kai ni kai.’ (Makolose 1:9, 10) Mi zibo i kona ku tiisa tumelo ya luna. Seo ki sa butokwa hahulu kakuli ‘kwand’a tumelo mutu h’a koni ku tabelwa ki Mulimu.’ (Maheberu 11:6) Ee, ha lu ikataza hahulu ku tiisa tumelo ya luna ni ku pila ka ku lumelelana ni tato ya Jehova, lwa kona ku tabisa pilu ya hae. Ka nako ye swana, lu swanela ku tokomela hahulu kuli lu si ke lwa utwisa pilu ya Jehova butuku.

Mu Si Ke Mwa Utwisa Pilu ya Mulimu Butuku

Taba ya ze ne ezahezi mwa linako za Nuwe i bonisa ka m’o pilu ya Jehova i kona ku utwisezwa butuku. Ka nako yeo, “lifasi ne li tezi lipulayano. Mulimu a talima lifasi, mi a bona kuli li bolile, ni kuli nama kaufela i sinyize mukwa wa yona mwa lifasi.” Mulimu n’a ikutwile cwañi ha n’a nze a bona bumaswe ni mifilifili? Bibele i bulela kuli: “[Muñ’a] Bupilo a bilaela kuli u ezize mutu mwa lifasi, mi pilu ya hae ya swaba.” (Genese 6:5, 6, 11, 12) Mulimu n’a bilaezi kakuli muzamao wa batu ne se u bile o maswe hahulu mi ne u tahisize kuli a cince mubonelo wa hae ka za lusika lo lu maswe lo ne lu bile teñi pili Munda u si ka taha kale. Bakeñisa ku sa tabela muinelo wa bona o maswe, Mulimu a cinca mubonelo  wa hae wa ku ba Mubupi wa batu ni ku ba musinyi wa bona.

Jehova hape n’a ikutwile bumaswe muta batu ba hae ka sibili, sona sicaba sa Isilaele wa ikale ha ne si zwezipili ku sa isa pilu kwa maikuto ni kwa ketelelo ya hae ye lilato. Walisamu n’a bilaezi kuli: “Mwa lihalaupa ba mu shemaeta hañata-ñata! Mi mwa naheñi ba atisa ku mu swabisa! Ba kala hape ku lika Mulimu, ku sa kolwa Ya-Kenile wa Isilaele.” Niteñi, “Yena, ka mukekecima n’a swalelanga lifoso za bona, mi h’a si ka ba yundisa. Hañata n’a iswala mwa ku halifa kwa hae, mi a hana ku fa buhali sibaka.” (Samu 78:38-41) Nihaike kuli Maisilaele ba baipanguli ka swanelo ne ba nyanda bakeñisa bumaswe bwa bona, Bibele i lu taluseza kuli ‘mwa liñalelwa za bona Mulimu a kalelwa hamoho ni bona.’—Isaya 63:9.

Ku si na taba ni bupaki bo buñata bwa lilato la Mulimu ku bona, sicaba sa Isilaele sa “seha ba ba lumilwe ki Mulimu, ba shwaula manzwi a hae, ba soma bapolofita ba hae; ku fitela [Muñ’a] Bupilo h’a halifela sicaba sa hae, mane ku tokwe ni se sikana se si ka tusa.” (2 Makolonika 36:16) Kwa nalulelule, ku tundamena bukwenuheli kwa bona kwa “swabisa Moya wa hae o kenile” mi mane ba latehelwa ki sishemo sa Jehova. (Isaya 63:10) Ne ku zwileñi mwateñi? Mulimu ka swanelo a zwisa silelezo ya hae, mi ne ba bile mwa ñalelwa muta Mababilona ne ba hapile Juda ni ku yundisa Jerusalema. (2 Makolonika 36:17-21) Kw’a swabisa luli haiba batu ba tundamena ku pila bupilo bo bu maswe ili ku foseza ni utwisa Mubupi wa bona bumaswe!

Bibele i lu taluseza hande kuli Mulimu u utwiswa hahulu butuku ki likezo ze maswe. (Samu 78:41) Ku Mulimu, lika ze maswe—mane ili ze nyenyisa—ki ze cwale ka muikuhumuso, lishano, bubulai, bulauli, bunuhi, ku lapela bokukululu, ku tokwa buiswalo, kalombe, ku sa sepahala mwa linyalo, sindoe, ni ku hatelela babotana.—Livitike 18:9-29; 19:29; Deuteronoma 18:9-12; Liproverbia 6:16-19; Jeremia 7:5-7; Malaki 2:14-16.

Jehova u ikutwanga cwañi ka za ku lapela maswaniso? Exoda 20:4, 5 i li: “U si ke wa ikezeza siswaniso se si betilwe, nihaiba siswaniso sifi kamba sifi sa linto ze kwahalimu mwa lihalimu, nihaiba sa ze mwatasi mwa lifasi, nihaiba sa ze mwa mezi mwatas’a lifasi. U si ke wa si kubamela, u si ke wa si sebeleza.” Libaka? Kakuli milimu ya maswaniso “ki lika ze masila ku [Muñ’a] Bupilo Mulimu.” (Deuteronoma 7:25, 26) Muapositola Joani n’a elelize kuli: “Bana ba ka ba banyinyani, mu itibelele kwa milimu ya buhata.” (1 Joani 5:21) Mi muapositola Paulusi n’a ñozi kuli: “Balatiwa ba ka, mu sabe kwa sebelezo ya milimu.”—1 Makorinte 10:14.

Mu Bate Tumelezo ya Mulimu

“Ya lukile u latwa ki” Mulimu. Mi “ba ba na ni mizamao ye sa nyazahali, wa ba tabela.” (Liproverbia 3:32; 11:20) Kono ba ba zwelapili ku nyemisa Mulimu ka ku sa isa pilu ka bomu kwa maikuto a hae a lukile ona cwale-cwale fa ba ka fiwa koto kabakala ku palelwa ku mu tabisa. (2 Matesalonika 1:6-10) Kaniti, u ka tuha a felisa bumaswe kaufela bo bu li teñi kacenu.—Samu 37:9-11; Zefania 2:2, 3.

Niteñi, Bibele i bonisa hande kuli Jehova “h’a lati ba bañwi ha ba ka timela, kono u lata kuli kaufela ba kene mwa ku baka.” (2 Pitrosi 3:9) Mulimu u tabela ku bonisa lilato ku ba ba lukile ili ba ba mu lata ku fita ku bonisa ku sa tabela ba ba iketela ku sa sikululwa. Jehova ‘ha tabeli lifu la ya maswe, kono u tabela ya  maswe h’a bakela mizamao ya hae, kuli a pile.’—Ezekiele 33:11.

Hakulicwalo, ha ku na ya swanela ku ipatiseza fela buhali bwa Jehova. “Mulena u tezi sishemo ni mukekecima.” (Jakobo 5:11) Ka ku sepa ka ku tala maikuto a Mulimu, mwa kona ku ‘nepela lipilaelo za mina kaufela fahalimw’a hae, kakuli wa mi tokomela.’ (1 Pitrosi 5:7) Haike mu kolwe kuli ba ba tabisa pilu ya Mulimu ba na ni tibelelo ye makaza ya ku ikola tumelezo ni silikani se sinde ni Mulimu. Kacwalo, ki kwa butokwa ku fita lili kaufela kuli lu “batisise se si tabisa Mulena.”—Maefese 5:10.

Kwa makaza luli kuli Mulimu ka sishemo sa hae se situna u sinuzi tulemeno ni maikuto a hae a mande! Mi mwa kona ku tabisa pilu ya hae. Haiba mu bata ku tabisa pilu ya Mulimu, lwa mi mema kuli mu bonane ni Lipaki za Jehova ba ba mwa silalanda sa mina. Ba ka tabela ku mi bonisa z’e ba tusize ni z’e ba konisize ku tabisa pilu ya Mulimu.

[Litaluso za kwatasi]

Ki Kabakalañi Bibele Ha I Talusa Mulimu Sina Mutu?

Bakeñisa kuli “Mulimu ki Moya,” ha lu koni ku mu bona ka meto a luna a butu. (Joani 4:24) Kacwalo Bibele i itusisanga liswanisezo ku lu tusa ku utwisisa buikoneli, m’ata, ni misebezi ya Mulimu. Kacwalo nihaike kuli ha lu zibi mo u inezi mubili wa Mulimu wa moya, Bibele i talusa Mulimu kuli u na ni meto, mazebe, mazoho, minwana, mahutu, ni pilu.—Genese 8:21; Exoda 3:20; 31:18; Jobo 40:9; Samu 18:9; 34:15.

Liswanisezo ze cwalo ha li talusi kuli mubili wa Mulimu wa moya u na ni lilama ze swana ni za batu. Liswanisezo zeo ha li swaneli k’u ngiwa sina mo li inezi luli. Li tusa fela batu ku ba ni kutwisiso ye nde ka za Mulimu. Kambe ne ku si na lipulelo ze cwalo za swanisezo, ne ku ka ba t’ata kwa batu-tu fela ku utwisisa mwa inezi Mulimu, niha n’a ka taluswa cwañi kamba cwañi. Niteñi seo ha si talusi kuli tulemeno twa Jehova Mulimu tu simuluzwi fela ki batu. Bibele i talusa hande kuli batu ne ba bupilwe ka siswaniso sa Mulimu—isi Mulimu ka siswaniso sa batu. (Genese 1:27) Bakeñisa kuli bañoli ba Bibele ne ba susumelizwe ‘ki moya wa Mulimu,’ tulemeno to ne ba bonisize kuli ki tulemeno twa Mulimu ki tona luli tulemeno twa hae—mi hape ki tona tulemeno twa n’a beile ka ku shutana-shutana kwa batu ba bupile. (2 Timotea 3:16, 17) Mi ku fita ku ba tulemeno twa batu to tu beilwe ku Mulimu, ki tulemeno twa Mulimu to tu beilwe kwa batu.

[Siswaniso se si fa likepe 4]

Nuwe n’a shemubilwe ki Mulimu

[Siswaniso se si fa likepe 5]

Abrahama n’a utwisisize maikuto a Mulimu

[Siswaniso se si fa likepe 6]

Davida n’a beile sepo ya hae kaufela ku Jehova

[Siswaniso se si fa likepe 7]

Ha mu nze mu bala Bibele, mwa kona ku ituta mwa ku tabiseza Mulimu

[Manzwi a bañi ba siswaniso fa likepe 4]

Ka tumelezo ya ba Anglo-Australian Observatory, siswaniso si swanisizwe ki David Malin