Mwa ku Fumanela Bupilo Bo Butelele bwa Tabo

BATU ba bañwi ba bulela kuli mutu kaufela w’a lata ku hula; kono ha ku na mutu ya lata ku supala. Batu ba bañata ba ba sutelela kwa lilimo za ku tuhela mubeleko ba libelela ku ba ni nako ye ñata ni ku sa atelwa ki builakabelo. Niteñi, ba sabanga kuli ba ka ba ba ba si na mulelo ili ba ba si na tuso. Hape ba sabanga buinosi, kutokwa tabo, ni ku telwa ki mapongo.

Bupilo bwa tabo bu konwa ku fumanwa cwañi he? Banana ni ba bahulu ba fumananga tabo ka ku ba ni balikani ba bande ni lubasi lo lu lilato. Kono ze ba eza ba bañwi mwa ku tusa mutu wa musupali haki zona fela za butokwa. Sa butokwa ni ku fita ki seo musupali a kona ku ezeza ba bañwi.

Patisiso ye ñwi ya ka nako ye telele ka za bosinyalana ba basupali b’a 423 n’e bonisize kuli “ku tusa ba bañwi ku kana kwa tusa ku ekeza kwa bupilo bwa luna ka sibili.” Stephanie Brown, ya n’a ezize patisiso yeo, u talusa kuli: “Litaba zeo li akaleza kuli haki ze lu fumana mwa silikani sa luna ni ba bañwi ze li za butokwa hahulu; ki ze lu fana.” Ku fana ko ku cwalo ku kana kwa kopanyeleza ku tusa ba bañwi kwa misebezi ya fa lapa, ku babalela banana, ku mata-mata ze ñwi, ku fa nzila, kamba ku teeleza ku mutu y’a bata ku bulela.

Ibat’o ba lilimo ze 2,000 kwamulaho, Jesu Kreste n’a bulezi kuli: “Ku na ni mbuyoti mwa ku fana, ye fita ye mwa ku fiwa.” (Likezo 20:35) Ku fumana bupilo bo butelele bwa tabo ha ku ami ku ba ni mali a mañata kwa panga kamba ku itusisa milyani ni lico za ku sa supala. Kono ku ama ku ba ya patehile ni ku fana nako ni ku ikataza ku kondolokisa bupilo bwa ba bañwi.

Niteñi, kuli lu yangwele bupilo bwa luna kwa ku supala, makulanu, ni lifu, lu tokwa ze ñata isi bufani fela. Ki Mubuso wa Mulimu fela o ka felisa lika zeo. Mwa puso ya ona, makulano a ka feliswa mi ni “lifu ha li sa na ku ba teñi.” (Sinulo 21:3, 4; Isaya 33:24) Mane, batu ba ba ipeya ku utwa ba ka pila ku ya ku ile mwa tabo mwa paradaisi fa lifasi. (Luka 23:43) Lipaki za Jehova ba tabela ku tusa ba bañwi ku ziba mwa ku fumanela bupilo bo butelele bwa tabo.