Ku Eza Ze Nde Ha Ku Na ni Butokwi

MUAPOSITOLA Paulusi n’a susuelize kuli “lu eze batu kaufela hande, sihulu banabahabo luna ba balumeli.” (Magalata 6:10) Lipaki za Jehova mwa lifasi kaufela ba tukufalezwi ku latelela sikuka seo mwa bupilo bwa bona, ku eza batu kaufela hande, sihulu balumeli ba bañwi. Seo si bonahalanga hañata ha ku na ni butokwi. Ha lu boneñi mitala ya cwanoñu fa ye zwa mwa linaha ze talu.

Mwa naha ya Guam ne ku bile ni kakundukundu ka katuna mwa December 2002, ke ne ka mata ka lubilo lo lu fitelela likilomita ze 300 ka hora. Mandu a mañata n’a yayaukile, mi a mañwi n’a shandaukelezi. Liputeho za mwa naha za lukisa likwata za ku tusa mabasi a Lipaki a n’a ziyelehile hahulu. Mutai wa Guam wa lukisa liyahiso ni babeleki ba ku tusa ku lukisa mandu, mi mutai wa Hawaii ni ona ne u tusize. Mwa livikinyana fela, sikwata sa babeti sa fita ku zwa kwa Hawaii ku t’o tusa kwa ku yaha sinca, mi mizwale ba bañwi ba mwa Guam ba kupa pumulo kwa misebezi ya bona kuli ba tusane ni bona. Moya o ne ba bonisize wa ku swalisana ka tabo ne u file bupaki kwa batu kaufela ba mwa sibaka seo.

Mwa sibaka se siñwi mwa tolopo ya Mandalay, mwa Myanmar, ne ku tumbukile mulilo bukaufi ni Ndu ya Mubuso. Kwatuko ne ku na ni ndu ya kaizeli ya n’a fokozi kwa moya ni lubasi lwa hae. Moya ne u fuka ku liba kwa ndu ya hae, kiha s’a matela kwa Ndu ya Mubuso ku yo kupa tuso. Ka nako yeo, Ndu ya Mubuso ne i sweli ku uncafazwa, kacwalo ne ku na ni mizwale ba bañata kwateñi. Ne ba komokile ku bona kaizeli y’o kakuli ne ba sa zibi kuli n’a pila mwa sibaka seo. Kapili-pili, mizwale ba tusa ku yangwela libyana za lubasi lwa hae. Munn’a hae ya n’a si Paki ha utwa za mulilo wo, a matela kwa ndu mi a yo fumana mizwale inze ba babalela lubasi lwa hae. N’a tabile ni ku itebuha hahulu, mi hape n’a imuluzwi kakuli malengwami hañata ba uzwanga ka linako ze cwalo. Moya wa musa o ne ba bonisize mizwale ne u susuelize kaizeli ni mwan’a hae ku kalisa sinca ku swalisana ni puteho ya Sikreste, mi cwale se ba fumanehanga kwa mikopano kaufela.

Mwa silimo sa sebelezo sa ñohola, ba bañata mwa Mozambique ne ba kenezwi ki lukupwe bakeñisa linanga ni ku shwa kwa lico. Ofisi ya mutai wa Lipaki za Jehova mwa naha yeo, ne i ngile muhato kapili-pili ka ku fa lico be ne ba li mwa butokwi. Lico zeo ne li abelwanga  kwa Mandu a Mubuso, fokuñwi hasamulaho wa mikopano ya puteho. Kaizeli yo muñwi ya li me wa likwasha n’a ize: “Ne ni ile kwa mikopano inze ni si na mwangalo, ne ni sa zibi kuli bana ba ka ne ba ka yo cañi ha lu ka kutela kwa ndu.” Tuso ye lilato ye zwa kwa mizwale ne i susuelize kaizeli y’o kapili-pili. N’a ize: “Ne ni ikutwile inge ya zuhile kwa bafu!”

Lipaki hape ba ‘eza ze nde’ kwa moya ka ku bulelela ba bañwi manzwi a mwa Bibele a’ omba-omba ni a’ fa sepo. Ba lumela mwa n’a lumelela munna ya butali wa kwakale kuli: “Kono ya ni utwa [ya utwa butali bwa silumeli] u ka pila mwa kozo, u ka iketa a sa sabi kozi.”—Liproverbia 1:33.

[Maswaniso a fa likepe 31]

1, 2. Ku abela lico kwa batu ba ba mwa butokwi mwa Mozambique

3, 4. Kakundukundu mwa Guam ne ka sinyize mandu a mañata

[Manzwi a bañi ba siswaniso]

Mwanana, kwa nzohoto: Andrea Booher/FEMA News Photo; musali, fahalimu: AP Photo/Pacific Daily News, Masako Watanabe