Piho ya Bashaeli ba Mubuso

‘Sila U T’o Lu Tusa’

MWA July 2000, kwa linaha za Austria, Germany, ni Switzerland ne ku ile pizo ya kuli Lipaki ba ba bulela Sijelemani ba tutele kwa naha ya Bolivia. Kabakalañi? Kakuli ma-Mennonite ba ba bulela Sijelemani ba ba pila mwa minzi ye eza likilomita ze 300 ku zwa Santa Cruz, mwa Bolivia, ne ba tabela hahulu Bibele.

Lipaki ba ba bat’o ba 140 ne ba amuhezi pizo yeo. Ba bañwi ne ba il’o ina teñi ka livikinyana fela, ba bañwi ne li ka silimo kamba mane ku fitelela f’o. Ka ku eza cwalo, ne ba bonisize moya o swana ni wa balumiwa ba mwa linako za baapositola be ne ba amuhezi pizo ye li: “Silela mwa Masedonia, u t’o lu tusa.”—Likezo 16:9, 10.

Ku kutaleza mwa kalulo yeo ku cwañi? Eluda wa mwa puteho ya kwateñi u li: “Ku ya ku o muñwi wa minzi ye 43 ya ma-Mennonite ku kona ku nga lihora ze 8 mwa mukwakwa o maswe ka mota ye kona ku fita mwa lishabati. Ku potela minzi ye inzi kwahule kamita ku tokwa ku zamaya mazazi a mane ni ku lobala mwa litende. Kono kaniti luli buikatazo b’o bwa swanela, kakuli ha ku na nihaiba a li muñwi ku bona batu bao ya kile a utwa taba ye nde.”

Kwa makalelo, buñata bwa ma-Mennonite ne ba sa lati ku potelwa. Kono ku kuta-kutela ku bona ku ba tusize ku lemuha ze ba yelanga teñi Lipaki. Ka mutala, mulimi yo muñwi n’a bulezi kuli n’a s’a balile magazini ya Awake! ka silimo. Mi a ekeza kuli: “Na ziba kuli buñata bwa batu kwanu ha ba lumeli ze mu bulela, kono na na lumela kuli ki niti.” Mwa munzi o muñwi, munna yo muñwi n’a ize: “Be ni bapani ni bona ba bañwi ba bulela kuli mu bapolofita ba buhata, ba bañwi ba li kuti mu bulela niti. Ni bata ku ziba kuli niti ki ifi.”

Cwale ku na ni puteho ya Sijelemani mwa Bolivia ye na ni bahasanyi ba 35, mi mwahal’a bona ku na ni mapaina ba 14. Kacenu le, ba 14 be ne ba li ma-Mennonite se li bahasanyi ba Mubuso mi ba bañwi ba 9 ba yanga kamita kwa mikopano. Musupali yo muñwi ya sa zo kolobezwa n’a ize: “Lu iponezi ketelelo ya Jehova. U lumile mizwale ni likaizeli ba Majelemani ba ba na ni yeloseli kuli ba to lu tusa. Lu itumezi hahulu.” Mwan’a munna y’o, ili musizana wa lilimo ze 17 ya kolobelizwe, n’a ekelize kuli: “Moya wa tukufalelo wa mizwale ni likaizeli ba ba tile kwanu wa yambukela. Buñata bwa bona ki mapaina, ba ba itusisa nako ni masheleñi a bona mwa ku tusa ba bañwi. Ku ni susueza ku eza cwalo ni na.”

Kaniti, be ne ba ikatalize ku “silela” kwa naha i sili ku yo tusa ba bañwi ba fumani tabo ni nyakalalo ye tuna.