Ba Ba Feza kwa Sikolo sa Giliadi Ba Funduka Ba Li Bakutuli Ba Ba Na ni Cisehelo!

“LUKAU ki lo lutuna luli, kono ba ba kutula ki ba banyinyani. Mu lapele kihona Muñ’a lukau, kuli a lume babeleki mwa lukau lwa hae.” (Mateu 9:37, 38) Manzwi ao n’a na ni taluso ye tuna kwa baituti ba sitopa sa bu-116 be ne ba feza kwa Sikolo sa Giliadi sa Bibele sa Watchtower ha ne ba itukiseza ku ya mwa musebezi wa bona wa bulumiwa.

La Mukibelo, March 13, 2004, batu b’a 6,684 ne ba kubukani kwa Sibaka sa Tuto sa Watchtower kwa Patterson, mwa New York, ni kwa mahae a mañwi a Betele ko ne ku ezizwe tukiso ya ku buha mukiti wa ku feza sikolo fa TV. Mwa tukiso yeo, ba mwa sitopa ne ba filwe manzwi a malaezo ni susuezo. Kaufel’a luna kelezo yeo y’a kona ku lu tusa ha lu nze lu sebeza ka cisehelo mwa musebezi wa kutulo ya kwa moya.

Manzwi a ku kwalula a Theodore Jaracz, yo muñwi wa ba Sitopa Se Si Etelela, ili y’o hape n’a felize mwa sitopa sa bu-7 sa Giliadi, n’a koñomekile manzwi a Jesu a kuli: “Mu ye . . . , mu lute macaba kaufela.” (Mateu 28:19, 20) Manzwi ao ne li a swanela luli kakuli be ne ba feza sikolo ne ba lumelwa ku yo sebeleza mwa linaha ze 20! N’a hupulisize baituti kuli litaelo ze mwa Linzwi la Mulimu li ba talifisa hahulu ilikuli ba kone ku ba babeleki ba ba na ni cisehelo mwa kutulo ya kwa moya ya butokwa ka ku fitisisa.—Mateu 5:16.

Mwa ku Bela Bakutuli Ba Bande

Mubuleli wa pili mwa tukiso ne li Robert Wallen, ya sebelize hahulu ku za Sikolo sa Giliadi ka lilimo-limo. Ha n’a fa ngambolo ye li “Bunde bwa Mufelañeke,” n’a bulelezi baituti kuli: “Mufelañeke ki nto ye kona ku utwiwa nihaiba ki bosusu ni ku boniwa nihaiba ki libofu.” Jesu n’a lemuhanga hahulu manyando a ba bañwi mi n’a batanga mwa ku a feliseza. (Mateu 9:36) Baituti ni bona ba ka ba ni linako ze ñata za ku eza cwalo—mwa musebezi wa ku kutaza, mwa puteho, mwa lihae la balumiwa, ni mwa manyalo a bona. Mubuleli n’a ba susuelize kuli: “Haike mu bonise bunde bwa mufelañeke ha mu nze mu sebeleza ba bañwi. Nto fela ye ka ba ye nde ka ku fitisisa ha mu kana mu pila ka zazi mwa lihae la balumiwa ki mikwa ya mina ye minde. Kacwalo mu tiye mwa ku bata ku apala maikuto a’ na ni makeke.”—Makolose 3:12.

Ngambolo ye tatama ye li “Bashaeli ba Za ku Pilisa” ne i filwe ki Gerrit Lösch, yo muñwi wa ba Sitopa Se Si Etelela, ili y’o hape n’a felize mwa sitopa sa bu-41 sa Giliadi. (Isaya 52:7) Kuli batu ba to puluswa muinelo wa linto wa cwale ha u ka to sinyiwa, ba lukela ku ba ni zibo ye nepahezi ya Linzwi la Mulimu, ku zibahaza tumelo ya bona, ni ku kolobezwa. (Maroma 10:10; 2 Timotea 3:15; 1 Pitrosi 3:21) Kono mulelo wa pili wa ku shaela za ku pilisa haki wa ku pulusa batu, kono ki wa ku tahisa tumbo ku Mulimu. Kacwalo,  Muzwale Lösch a susueza be ne ba tuha ba ba balumiwa kuli: “Mu ise lushango lwa Mubuso kwa mafelelezo a lifasi, mi mu be bashaeli ba ze pilisa ba ba na ni cisehelo, kuli Jehova a lumbekwe.”—Maroma 10:18.

Lawrence Bowen, muluti wa kwa sikolo sa Giliadi n’a buzize puzo ye li, “Liseli la Mina Li Benya ku Fita Kai?” N’a bulezi za manzwi a Jesu a’ kwa Mateu 6:22 ni ku susueza baituti ku ba ni liito ‘le li bona hande’ ilikuli ba kone ku “benyisa liseli la kwa moya le li kanyisa Jehova ni ku tusa batu ba bañwi.” Ku zwelela kwa makalelo a bukombwa bwa hae, Jesu n’a file mutala o petehile wa seo ka ku zwelapili ku isa mamelelo ya hae kwa ku eza tato ya Mulimu. Ku yeya lika ze nde za n’a lutilwe ki Ndat’ahe kwa lihalimu ne ku tusize Jesu ku tiyela litiko za Satani mwa lihalaupa. (Mateu 3:16; 4:1-11) Jesu n’a bonisize kuli n’a sepile Jehova ka ku tala mwa ku peta z’a n’a mu file Mulimu ku eza. Ka nzila ye swana, kuli ba talimane hande ni matata kwapili, balumiwa ba lukela ku zwelapili ku ba ni mikwa ye minde ya ku ituta Bibele ni ku itinga ku Jehova ka ku tala.

Mark Noumair, muluti wa kwa sikolo sa Giliadi, ya n’a keni mwa sitopa sa bu-77 sa Giliadi, n’a file ya mafelelezo kwa lingambolo ze n’e tatamani zeo ye li “Ki Luna Ba, Lu mwa Mazoho  a Hao.” (Joshua 9:25) N’a susuelize baituti ku likanyisa moya wa Magibioni ba kwakale. Gibioni niha ne u li “munzi o mutuna, . . . mi banna ba mwateñi kaufela ne li lindwalume,” Magibioni ne ba si ka lwanela libubo kamba ku bata kuli lika li ezwe mo ne ba batela. (Joshua 10:2) Ne ba itatezi ku ba “ba ba lwalela likota, ni ba ba ka mezi” inze ba zamaiswa ki Malivi, ili ku tusa mwa bulapeli bwa Jehova. (Joshua 9:27) Ba sitopa se si feza sikolo ni bona ku swana inge kuli ba bulelela Joshua Yo Mutuna, yena Jesu Kreste kuli, “Ki luna ba, lu mwa mazoho a hao.” Cwale, ha ba ya kwa ku eza musebezi wa bona kwa linaha li sili, ba tokwa ku amuhela musebezi kaufela w’a ba fa ku eza Joshua Yo Mutuna.

Ze Bonwi ni Lipuhisano

Wallace Liverance, ya n’a felize mwa sitopa sa bu-61 sa Giliadi, ya li hape yo muñwi wa baluti, n’a bile ni puhisano ye li, “Mu Taluse Mañolo ka ku Tala,” ni sikwata sa baituti. Ne ba kandekile ni ku eza liponiso za lika ze ne ba kopani ni zona mwa bukombwa bwa mwa simu mwa nako ye ne ba li mwa sikolo. Ne ku bonahezi hande kuli ku ituta kwa bona Mañolo ka butungi mwa likweli ze ketalizoho ze n’e fitile ne ku susumelize lipilu za bona ni ku ba susueza ku taluseza ba bañwi ze ba itutile. (Luka 24:32) Mwa kosi yeo ye n’e tandile likweli ze ketalizoho, muituti yo muñwi n’a taluselize munyan’a hae za n’a ituta. Ku eza cwalo ne ku susuelize munyan’a hae y’o ku bata puteho mwa sibaka mwa n’a pila mi a kala ku ituta Bibele. S’a li muhasanyi ya si ka kolobezwa.

Hamulaho wa ze bonwi zeo, Richard Ashe ni John Gibbard ba ba ni lipuhisano ni batanga ba Jehova ba sikai be se ba mu sebelelize ka nako ye telele ka busepahali, ku kopanyeleza cwalo ni baokameli ba maeto be ne ba fiwa lituto ze ñwi ze ipitezi kwa Sibaka sa Tuto sa Watchtower. Ne ba kile ba kena mwa Sikolo sa Giliadi. Yo muñwi ku bona n’a hupuzi kuli ha ne ba li mwa sikolo, Muzwale Knorr n’a kile a li: “Kwa Giliadi mu ka ituta hahulu. Kono haiba ha se mu felize, mu ka ba ni muikuhumuso, u zibe ha ku na se lu petile. Se lu bata kikuli ha mu feza, mu be ni pilu ye lilato.” Mizwale ba ba li baokameli ba maeto bao ba eleza ba sitopa se ne si kwaza kuli ba n’o iyakatwa batu, ku eza ba bañwi sina Kreste mwa n’a ezelize, ni ku amuhela ka buikokobezo musebezi kaufela o ba fiwa. Ku sebelisa kelezo yeo kaniti ku ka tusa balumiwa ba banca bao ku eza hande mwa musebezi wa bona.

Mu Funduke Mu Li Bakutuli Ba Ba Na ni Cisehelo!

Baputehi ne ba bile ni kolo ya ku teeleza ku Stephen Lett, yo muñwi hape wa ba Sitopa Se Si Etelela. N’a file ngambolo ye li “Mu Funduke Mu Li Bakutuli Ba Ba Na ni Cisehelo!,” mi yeo ne li yona ngambolo ye tuna ya tukiso. (Mateu 9:38) Mwa kutulo ya luli, nako ya ku kutula i banga ye nyinyani. Bakutuli ba tokwanga ku sebeza ka t’ata. Ku eza cwalo ku butokwa ni ku fita, mwa nako ye ya mafelelezo a muinelo wo wa linto. Mwa kutulo ye tuna ya kwa moya, bupilo bu mwa kozi. (Mateu 13:39) Muzwale Lett n’a susuelize be ne ba feza sikolo kuli ba ‘si ke ba fokola mwa musebezi,’ kono ba “be ni ku tukufalelwa mwa moya” ni ku ‘sebeleza Mulena’ mwa kutulo ye si ke ya kutelwa ye. (Maroma 12:11) Mubuleli n’a bulezi manzwi a Jesu a’ li: “Mu nanule meto, mi mu shalime masimu, kakuli s’a buzwa, a libelezi ku kutulwa.” (Joani 4:35) Kiha susueza be ne ba feza sikolo ku bonisa cisehelo ya bona mwa musebezi wa ku kutula ka ku lika ka t’ata ku fita kwa batu ka nako ye ba fumenaha ni kwa libaka ko ba fumaneha, ni ka ku eza bupaki bwa ku tandalelwa fo ku konahalela kaufela. Ku tonela kolo ya ku kutaza ku kona ku tahisa kuli bupaki bo bunde bu kone ku fiwa. Jehova ki Mulimu ya na ni cisehelo, mi u libelela kuli kaufel’a luna lu mu likanyise ni ku sebeza ka t’ata mwa kutulo ya kwa moya.—2 Malena 19:31; Joani 5:17.

Ka ku ungula tukiso yeo, muina-situlo, Muzwale Jaracz, a fitisa litumeliso ze n’e zwelela kwa liofisi za mitai ze ñata mi a fa baituti mapampili a bona a bonisa kuli ba felize sikolo. Yo muñwi wa be ne ba feza sikolo a bala liñolo le ne li ñozwi ki ba mwa sitopa, la ku fitisa buitumelo bo butuna kwa tuto ye ne ba filwe. Kaniti luli, tukiso ya mukiti wa ku feza sikolo kwa sitopa sa bu-116 ne i tahisize kuli bote be ne ba bile teñi ba ikatulele ku funduka ba li bakutuli ba ba na ni cisehelo.

[Mbokisi fa likepe 25]

LITABA KA ZA SITOPA

Palo ya linaha ko ba zwa baituti: 6

Palo ya linaha ko ba lumezwi: 20

Palo hamoho ya baituti: 46

Avareji ya lilimo za ku pepwa: 34.2

Avareji ya lilimo za ku ba mwa niti: 17.2

Avareji ya lilimo za ku ba mwa bukombwa bwa ka nako ye tezi: 13.9

[Siswaniso se si fa likepe 26]

Sitopa Sa bu-116 Se Si Feza kwa Sikolo sa Giliadi sa Bibele sa Watchtower

Mwa mukoloko o kwatasi, milaini i baliwa ku zwa kwapili ku kuta kwamulaho, mi mabizo a kolohanyizwe ku zwa kwa nzohoto ku ya kwa bulyo mwa mulaini o muñwi ni o muñwi.

(1) Ceansu, R.; Sparks, T.; Piña, C.; Turner, P.; Cheney, L. (2) Suardy, M.; Sjöqvist, Å.; Amadori, L.; Smith, N.; Jordan, A.; Boissonneault, L. (3) Matlock, J.; Ruiz, C.; Dular, L.; Vigneron, M.; Henry, K. (4) Sjöqvist, H.; Laux, J.; Ruzzo, J.; Gustafsson, K.; Boissonneault, R.; Jordan, M. (5) Henry, D.; Turner, D.; Kirwin, S.; Florit, K.; Ceansu, S. (6) Amadori, S.; Cheney, J.; Ross, R.; Nelson, J.; Ruiz, J.; Vigneron, M. (7) Florit, J.; Matlock, D.; Ross, B.; Laux, C.; Ruzzo, T.; Dular, D.; Kirwin, N. (8) Gustafsson, A.; Nelson, D.; Suardy, W.; Piña, M.; Smith, C.; Sparks, T.