Butata bwa ku Uta Bana Kacenu

SE LI swalala, muñ’a licelo u itukiseza ku kwala kuli a kotoke. Basali ba babeli ni mwanana ba kena ni ku t’o leka lico. Bakeñisa ku katala hahulu, muñ’a licelo u bata ku ba bulelela kuli u kwalile, kono u ikatulela ku ba lekisa lico. Basali ba babeli bao ha ba nze ba ikambota inze ba ca, mwanana wa mata-mata mwa licelo, inz’a wisakela mambisikiti fafasi ni ku a lyatingela. Ku fita ku mu kalimela, bomahe ba menya fela. Basali bao ha se ba ile, muñ’a licelo ya topwezi u na ni ku tanyela masila ao.

Sina mo mu kana mwa zibela, taba yeo ye ezahalanga luli mwa bupilo i bonisa kuli mwa mabasi a mañata bana ha ba lutiwi hande. Mabaka a seo a’ shutana-shutana. Bashemi ba bañwi ba tuhelela bana ba bona ku ya mutende, ka ku nahana kuli bana ba swanela ku utiwa ka ku fiwa tukuluho. Kamba mwendi kabakala ku pateha hahulu, bashemi ba kana ba palelwa ku fumana nako ya ku isa pilu kwa bana ba bona ni ku ba luta ka mo ku tokwahalela. Bashemi ba bañwi ba ikutwa kuli sikolo kona nto ya butokwa hahulu kwa bana ba bona, kacwalo ba ba fa tukuluho ye tuna ibile fela ba pasa hande kwa sikolo ni ku amuhelwa kwa koleji ye kutekeha.

Kono, ba bañwi ba li likuka za bashemi ni za nyangela li swanela ku cinciwa. Ba bulela kuli banana ba ikenya mwa bukebenga bwa mifuta kaufela mi mifilifili ya kwa sikolo i sweli ku ekezeha ka zazi ni zazi. Kona libaka muzamaisi wa sikolo sa praimari kwa Seoul, mwa Republic of Korea, n’a koñomekile kuli ku luta bana ku ba ni butu bo bunde kona nto ye lukela ku ba ya pili. N’a ize: “Ha se mu hulisize butu bo bunde kihona ku ka latelela za ku fa zibo.”

Bashemi ba bañata ba ba bata bana ba bona ku ya kwa koleji ni ku kondisa mwa bupilo ha ba isangi pilu kwa litemuso ze fiwa. Haiba mu bashemi, mu bata mwan’a mina ku ba mutu ya cwañi? Kana mu bata kuli ha s’a hulile a be wa mikwa ye minde ni ya itingwa? Kana mu tokwa kuli a be ya isa ba bañwi pilu, ya kona ku cinca ku likana ni miinelo, ni ya tezi sepo? Haiba ki cwalo, shangwe mu nyakisise taba ye tatama.