Kana Litapelo za Mina Z’a Kona ku Cinca Miinelo?

KI MAÑI ku luna ya si ka ba kale ni ziyezi ye tuna ye ne lu si na mwa ku i ezeza? Bibele i bonisa kuli muapositola Paulusi n’a ziba kuli tapelo ya kona ku ama mafelelezo a ziyezi ye cwalo.

Paulusi ha n’a tamilwe ka sobozi kwa Roma, n’a kupile balumeli ka yena ku mu lapelela, mi a ekeza kuli: “Ni kupa hahulu luli kuli mu eze cwalo, kuli ni mi kutisezwe kapili.” (Maheberu 13:18, 19) Muta o muñwi hape, Paulusi n’a bulezi ka buikolwiso kuli Mulimu n’a ka alaba litapelo za kuli a lukululwe kapili. (Filemoni 22) Paulusi n’a lukuluzwi hañihañi mi a kutela mwa musebezi wa hae wa bulumiwa.

Kono kana tapelo luli y’a kona ku cinca mafelelezo a butata bwa mina? Mwendi. Kono mu hupule kuli tapelo haki mukwa fela wa bulapeli. Ki ku ambola luli ni Ndat’a luna wa kwa lihalimu y’a lilato ili y’a m’ata. Lu si kata-kati ku talusa lika ka ku nonga mwa litapelo za luna, mi ku tuha f’o, lu litele ka pilu-telele ku bona mw’a ka alabela Jehova.

Mulimu a kana a sa alabi ka ku nonga tapelo ni tapelo, mi haki kamita a ka alaba ka mukwa kamba ka nako ye lu libelela. Paulusi, ka mutala, n’a kuta-kutezi ku lapela ka za “muutwa mwa mubili” wa hae. Ibe kuli butata bwa Paulusi ne li bufi, Mulimu n’a si ka bu zwisa, kono a omba-omba Paulusi ka manzwi a’ tiisa pilu a’ li: “Sishemo sa ka sa ku likana; kakuli mata a ka a petahala mwa mifokolo.”—2 Makorinte 12:7-9.

Ni luna lwa kona ku kolwa kuli Mulimu nih’a sa zwisi butata bo buñwi, w’a kona ku ‘fa nzila ya ku zwa ku bona, kuli lu kone ku itiisa ku bona.’ (1 Makorinte 10:13) Honafa, Mulimu u ka tanyela manyando kaufela a batu. Ka nako ya cwale, ku kupa tuso ku yena Mulimu “ya utwa milapelo” kw’a kona ku cinca miinelo.—Samu 65:2.