Liñolo Le Li Ya ku Nuwe

“NUWE, ni se ni balile hañata mwa Bibele ka za hao, ni mo ne u yahezi aleka yeo ku yona wena ni lubasi lwa hao ne mu puluselizwe ka nako ya Munda.”

Cwalo kona mo li kalela liñolo la Minnamaria, musizana wa lilimo ze 15, ya n’a abani mwa kangisano ya ku ñola ya baituti ba lilimo za buhulu ze mwahal’a 14 ni 21. Kangisano yeo ne i lukisizwe ki ba Finnish postal services, ba Federation for Finnish Mother Tongue Teachers, ni ba Finnish Literature Society. Be ne ba abana teñi ne ba lukela ku ñola liñolo le li tomile fa taba ya mwa buka ye ñwi. Liñolo leo ne li kona ku ñolelwa muñoli wa buka kamba mutu ya fumaneha mwa buka yeo. Baluti ba keta mañolo a fitelela 1,400 kwa litaba ze ne ñozwi ki baituti ba bona ni ku a lumela kwa sitopa sa baatuli ba kangisano yeo. Sitopa seo cwale sa keta taba i liñwi ye nde ka ku fitisisa, ze 10 ze tatama kwa bunde, ni ze 10 ze ñwi ze tatama. Minnamaria n’a tabile kuli liñolo la hae ne li beilwe mwa kalulo ya bulalu.

Ki kabakalañi Minnamaria, muituti wa lilimo ze 15, ha n’a ñolezi Nuwe, munna ya n’a pilile lilimo ze bat’o ba ze 5,000 kwamulaho? U li: “Bibele ne li yona nto ya pili ye ne ni nahanile. Ni se ni tekelezi hahulu batu ba ba ñozwi mwa Bibele. Se ni balile hahulu za bona kuli mane ba bat’o bonahala ku ba ba ba pila ku na. Ne ni ketile Nuwe kakuli bupilo bwa hae ne bu tabisa ni kuli ne bu shutana ni bwa ka.”

Liñolo la Minnamaria ku Nuwe li ungula ka manzwi a li: “U sa li mutala wa mutu ya n’a na ni tumelo ni ya ipeya ku utwa. Bupilo bwa hao bu susueza kaufela ba ba bala Bibele ku pila ka tumelo.”

Liñolo le, la mubali wa Bibele wa mukulwani li bonisa kuli Bibele kaniti ‘ki ye pila, mi i na ni mata’ kwa batu, ili ba bahulu ni banana.—Maheberu 4:12.