Mulimu Luli Wa Iyakatwa Mina

KU KUPA kuli Mulimu a lu tuse ha lu na ni butata bo butuna ki kwa ka taho. Mane, yena “ki yo muhulu, mi mata a hae ki a matuna, butali bwa hae ha bu na mo bu felela.” (Samu 147:5) Ki yena ya kona luli ku lu tusa ku tatulula matata a luna. Hape, Bibele i lu susueza ku ‘sululela lipilu za luna’ fapil’a hae. (Samu 62:8) Ki kabakalañi he, batu ba bañata ha ba ikutwa kuli Mulimu ha alabangi litapelo za bona? Kana f’o kikuli ha na taba?

Ku fita ku matukela ku nyaza Mulimu ka za lika ze bonahala inge kuli h’a li isi pilu, mu nahane nako ye ne mu sa li banana. Bashemi ba mina ha ne ba sa mi fi ze ne mu bata kaufela, kana ne mu kile mwa li ha ba mi lati? Banana ba bañata ba ezanga cwalo. Kono ha ne se mu hulile, ne mu utwisisize kuli lilato li boniswa mwa linzila ze ñata ni kuli ku lumela kaufela z’a bata mwanana haki ku eza ka lilato luli.

Ka ku swana, haiba Jehova ha alabi kamita litapelo za luna mo lu batela, f’o ha ku talusi kuli h’a lu isi pilu. Niti kikuli, Mulimu u bonisanga lilato ku luna kaufela mwa linzila ze fapahana-fapahana.

“Ka Yena Lu Na ni Bupilo”

Sa pili, kabakala Mulimu “lu na ni bupilo, lwa nyanganya, mi lu teñi.” (Likezo 17:28) Ku lu fa bupilo kwa bonisa luli kuli wa lu lata!

Hape, Jehova u lu fa ze lu tokwa kuli lu zwelepili ku pila. Lu bala kuli: “U meliseza makomu bucwañi, ni ze mela ze ba pila batu; kuli ba fumane lico ka ku itimela mubu.” (Samu 104:14) Mane, Mubupi wa luna u lu fanga ze ñata mwa bupilo ku fita fela ze lu tokwa. Ka sishemo u lu fa ‘lipula za kwa lihalimu, ni linako za ku kutula, u lu fa lico ka buñata, u taza lipilu za luna tabo.’—Likezo 14:17.

Niteñi, ba bañwi ba kana ba li, ‘Haiba Mulimu u lu lata hahulu, ki kabakalañi h’a lu tuhelela ku nyanda?’ Kana mwa ziba kalabo kwa puzo yeo?

Kana Ki Mulatu wa Mulimu?

Buñata bwa manyando a batu ki a ku ipatiseza. Ka mutala, likozi za likezo ze ñwi ze lubeta za zibahala. Niteñi, batu ba ezanga buhule, ku nwa maswe bucwala ni milyani ye miñwi ye kola, ku zuba, ku ikenya mwa lipapali ze lubeta, ku matisa mota ka lubilo lo lu tuna ni ze ñwi cwalo. Haiba mikwa ye cwalo ye lubeta i tahisa kozi, mulatu ki wa mañi? Kana ki wa Mulimu kamba ki wa ya eza a sa nahanisisi? Linzwi la Mulimu le li buyelezwi li li: “Mu si ke mwa ipuma, Mulimu h’a somiwi; kakuli s’a cala mutu, ki sona s’a ka kutula.”—Magalata 6:7.

Hape, batu ba utwisanga ba bañwi butuku. Sicaba ha si kala ndwa, kaniti Mulimu h’a koni ku fiwa mulatu wa manyando a zwa mwateñi. Haiba sikebenga si lwanisa mutu wa mwa naha ya habo sona, kana ha ku ba ni kolofalo ifi ni ifi kamba lifu, ki mulatu wa Mulimu? Batili! Mubusi ya busa ka buhateleli ha lwanisa, ku tukufaza, ni ku bulaya batu b’a busa, kana lwa swanela ku nyaza Mulimu? F’o ne ku si ke kwa ba hande.—Muekelesia 8:9.

Kono ku cwañi ka za bolule-lule ba ba botanile hahulu kamba ba ba mwa tala? Kana ki mulatu wa Mulimu? Batili. Lifasi la luna li tahisa lico ze ñata hahulu ze kona ku fepa mañi ni mañi. (Samu 10:2, 3; 145:16) Ku sa abiwa hande kwa lico z’a lu file Mulimu ka buñata ki kona ko ku tahisa lukupwe ni bubotana bo  bu atile mwa lifasi. Mi ku itata kwa batu ku palelwisa butata b’o ku tatululwa.

Ze Tahisa Cwalo

Kono ki mañi ya lukela ku nyaziwa haiba mutu yo muñwi a kula kamba ku shwa kabakala busupali? Kana ku ka mi komokisa ku ziba kuli ni zona zeo haki Mulimu ya li tahisa? Mulimu na si ka bupa mutu kuli a supale ni ku shwa.

Muta bosinyalana ba pili, bo Adama ni Eva, ne ba beilwe mwa simu ya Edeni, Jehova na ba file tibelelo ya bupilo bo bu sa feli mwa lifasi le li li paradaisi. Kono kaniti n’a bata kuli lifasi li tale batu be ne ba ka itebuha lona. Kacwalo, tibelelo ya bupilo bwa bona bwa kwapili ne i itingile fa nto ye ñwi. Bo Adama ni Eva ne ba ka pila mwa Paradasi haiba fela ne ba ka zwelapili ku utwa Mubupi wa bona ya lilato.—Genese 2:17; 3:2, 3, 17-23.

Ka bumai, bo Adama ni Eva ba ipangula. Eva a iketela ku teeleza ku Satani Diabulosi. Na mu pumile mi a mu bulelela kuli Mulimu na mu tima nto ye nde. Kacwalo a iketela bupilo bwa ku ipusa mi a lika ku ‘ba sina Mulimu, ku ziba bunde ni bumaswe.’ Adama a swalisana ni yena mwa bukwenuheli.—Genese 3:5, 6.

Ha ne ba fosize ka nzila yeo, bo Adama ni Eva ne ba iponahalize kuli ha ba swaneli ku pila ku ya ku ile. Ba tahelwa ki ze maswe ze n’e zwile mwa sibi sa bona. M’ata ni buikoneli bwa bona za fela, mi kwa nalulelule ba shwa. (Genese 5:5) Kono bukwenuheli bwa bona ne bu tahisize ze maswe ni ku fita. Lu sa nyandiswa ki ze ne tahisizwe ki sibi sa Adama ni Eva. Muapositola Paulusi na ñozi kuli: “Sibi sina ha si keni mwa lifasi ka mutu a li muñwi [Adama], mi ka sibi ku keni lifu, kamukwaocwalo lifu li tile kwa batu kaufela kakuli ba ezize sibi kaufela.” (Maroma 5:12) Ee, bakeñisa bukwenuheli bwa Adama ni Eva, sibi ni lifu za yamba sina butuku bo bu tahisa lifu kwa batu kaufela.

Bupaki Bo Bu Tiile bwa Buiyakato bwa Mulimu

Kana fo ku talusa kuli pupo ya Mulimu ya batu i sinyehelezi ku ya ku ile? Kutokwa, mi f’a cwale, lu fita fa bupaki bo  butuna ka ku fitisisa bo bu bonisa hande kuli Mulimu wa iyakatwa luna. Ka buitomboli bo butuna, Mulimu n’a file nzila ya ku liulula ka yona batu kwa sibi ni lifu. Teko ya tiululo ne li bupilo bo bu petehile bwa Jesu, bo ne bu filwe ka ku itatela bakeñisa luna. (Maroma 3:24) Kacwalo, muapositola Joani na ñozi kuli: “Mulimu u latile lifasi hahulu, mane u li file Mwan’a hae wa libanda, kuli mutu ufi kamba ufi ya lumela ku yena a si ke a shwa, kono a be ni bupilo bo bu sa feli.” (Joani 3:16) Kabakala kezo ye ipitezi yeo ya lilato, se lu na ni hape ni tibelelo ya ku pila ku ya ku ile. Paulusi na ñolezi Maroma kuli: “Ku luka kwa mutu a li muñwi, ku tahiseza batu kaufela ku luka ko ku fa bupilo.”—Maroma 5:18.

Lwa kona ku kolwa kuli ka nako ya Mulimu ye swanela, ha ku sa tola ku ba ni manyando kamba lifu fa lifasi-mubu. Kono miinelo ye bonezwi cimo mwa buka ya Sinulo i ka ba teñi ye li: “Mu bone Tabernakele ya Mulimu, i inzi ni batu; u ka yaha ni bona, ba be macaba a hae; mi Mulimu u ka ba ni bona, yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” (Sinulo 21:3, 4) Mu kana mwa bulela kuli, ‘Ha ni na ku pila ku fita ka nako yeo.’ Nihakulicwalo, buniti ki bwa kuli mwendi mu ka fita kwa nako yeo. Mi niha mu shwa, Mulimu wa kona ku mi zusa kwa bafu. (Joani 5:28, 29) Seo ki sona s’a lela ku lu ezeza Mulimu, mi ki sona se si ka ezahala. Kaniti ku bulela kuli Mulimu h’a na taba ni batu ki ku sa bulela niti!

“Mu Sutelele ku Mulimu”

Kwa omba-omba ku ziba kuli Mulimu u kalile ku lukisa tatululo ye inelela ya manyando a batu. Kono ku cwañi ka za nako ya cwale? Lu kona ku eza cwañi haiba lu shwelwa ki mulatiwa kamba mwan’a luna ha kula? Nako ya Mulimu ya ku felisa matuku ni lifu ha i si ka fita kale. Bibele i bonisa kuli lu ka libelela ka nakonyana kuli nto yeo i ezahale. Kono Mulimu ha si ka lu yubeka fela. Mulutiwa Jakobo na ize: “Mu sutelele ku Mulimu mi u ka sutelela ku mina.” (Jakobo 4:8) Ee, Mubupi wa luna u lu mema ku eza silikani se si tiile ni yena, mi ba ba eza bulikani ni yena ba ikutwanga kuli wa ba tusa niha ba li mwa miinelo ye t’ata hahulu.

Lu kona ku sutelela cwañi ku Mulimu? Mulena Davida na buzize puzo ye swana lilimo ze bat’o ba ze 3000 kwamulaho kuli: “[Muñ’a] Bupilo, . . . ki mañi ya ka yaha fa lilundu la hao le li kenile?” (Samu 15:1) Davida na ikalabile ha na ize: “Ki ya na ni mizamao ye lukile, mi a eza ka ku sepahala, a bulela niti mo i li teñi mwa pilu ya hae. Ki ya sa tami mutu ka lilimi la lishano, ya sa ezi ya bapani ni yena maswe.” (Samu 15:2, 3) Ka mubulelo o muñwi, Jehova u amuhela ba ba latelela nzila ye n’e hanilwe ki bo Adama ni Eva. U sutelela ku ba ba eza tato ya hae.—Deuteronoma 6:24, 25; 1 Joani 5:3.

Lu kona ku eza cwañi tato ya Mulimu? Lu na ni ku ituta ‘se sinde, s’a katelwa Mulimu Mupilisi wa luna,’ ni ku eza lika ka ku ya ka sona. (1 Timotea 2:3) Seo si kopanyeleza ku ba ni zibo ye nepahezi ya Linzwi la Mulimu, yona Bibele. (Joani 17:3; 2 Timotea 3:16, 17) Ku eza cwalo ha ku ami ku bala fela Bibele. Lu tokwa ku likanyisa Majuda ba mwa Berea ba mwa linako za baapositola be ne ba utwile Paulusi ha na kutaza. Lu bala za bona kuli: “Ba amuhela Linzwi ka ku li tukufalelwa, mi ba batisisa mwa Mañolo, ka mazazi kaufela, ba lemuhe litaba ze ba bulelelwa kana ki mo li inezi.”—Likezo 17:11.

Ni kacenu, tuto ya Bibele ya ka tokomelo i tiisa tumelo ya luna ku Mulimu mi i lu tusa ku eza silikani se si tiile ni yena. (Maheberu 11:6) Hape i lu tusa ku utwisisa hande ka m’o Jehova a tuseza batu—isiñi fela ka nako ye nyinyani kono sihulu ka nako ye telele ku ba ba lata ku luka kaufela.

Mu nyakisise ze ba bulela Bakreste ba sikai ba ba na ni silikani se si tiile ni Mulimu. Danielle wa lilimo ze 16 u li: “Ni lata hahulu Jehova, mi ni na ni ze ñata za ku itumela ku  yena. U ni file bashemi ba ba lilato, ba ba na ni lilato sakata ku yena mi ba ni lutile ka ku ya ka Linzwi la hae.” Mukreste wa mwa Uruguay u ñola kuli: “Pilu ya ka i tezi buitebuho, mi ni susumelizwe ku itumela ku Jehova kwa sishemo sa hae se si si ka libelelwa ni bakeñisa silikani sa hae.” Mulimu u amuhela nihaiba banana ba banyinyani hahulu. Gabriela wa lilimo ze 7 u bulela kuli: “Ni lata Mulimu ku fita nto ifi kamba ifi mwa lifasi kaufela! Ni na ni Bibele ya ka. Ni lata ku ituta ka za Mulimu ni Mwan’a hae.”

Kacenu, bolule-lule ba batu lifasi lote ka lipilu kaufela ba lumelelana ni walisamu ya na bulezi kuli: “Buswa bwa ka, ki ku sutelela ku Mulimu.” (Samu 73:28) Ba tusizwe ku tiyela matata e ba talimana ni ona cwale, mi ba na ni sepo ye tiile ya ku pila ku ya ku ile mwa Paradaisi fa lifasi-mubu. (1 Timotea 4:8) Ki kabakalañi ha mu sa itomeli mulelo wa ku ‘sutelela ku Mulimu’? Kaniti, lu kolwiswa kuli: ‘Ha ini kwahule ni mutu ni mutu wa luna.’ (Likezo 17:27) Ee, Mulimu luli wa iyakatwa mina!

[Maswaniso a fa likepe 5]

Buiyakato bwa Jehova ku luna bu bonahala mwa linzila ze ñata

[Siswaniso se si fa likepe 7]

Nihaiba banana ba kona ku sutelela ku Mulimu

[Maswaniso a fa likepe 7]

Kacenu, Jehova u lu tusa ku tiya. Mwa nako ye swanela, u ka felisa matuku ni lifu