Lipuzo Ze Zwa kwa Babali

Jesu n’a talusañi ha n’a bulelezi balutiwa ba hae kuli: “Ne ni talima Satani inz’a wa kwa lihalimu sina mulilo wa pula”?

Jesu kihona ha n’a sa z’o keta balutiwa ba 70, mi “a ba luma ka bubeli, ka bubeli, kuli ba mu zamaye kwapili mwa minzi kaufela, ni mwa mabaka mw’a n’a ka ya ni yena.” Balutiwa bao ba 70 ba kuta ba tabisizwe ki ze nde ze ne zwile mwa musebezi wa bona wa ku kutaza. Ba talusa, ba li: “Mulena, mane ni mioya ye maswe ne i tulwa ki luna, ka Libizo la hao.” Ka yona nako yeo, Jesu a bulela a li: “Ne ni talima Satani inz’a wa kwa lihalimu sina mulilo wa pula.”—Luka 10:1, 17, 18.

Pili, ku kana kwa bonahala inge kuli Jesu n’a bulela za nto ye n’e se i ezahezi kale. Kono, hamulaho wa lilimo ze 60 ku zwa fa n’a bulelezi Jesu manzwi ao, muapositola Joani ya na s’a supezi n’a itusisize mubulelo o swana, ha n’a ñozi kuli: “Drakoni ye tuna, yona noha ya kale, ye bizwa Diabulosi ni Satani, ye pumanga lifasi kamukana, ya nepelwa mwa lifasi, ni mangeloi a yona a nepwa hamoho ni yona.”—Sinulo 12:9.

Ka nako ya n’a ñola Joani manzwi ao, Satani n’a sa li kwa lihalimu. Lu ziba cwañi cwalo? Kabakala kuli Sinulo ki buka ya bupolofita, isi ya litaba za kwa kale. (Sinulo 1:1) Kacwalo, ku t’o fita ka nako ya n’a sa pila Joani, Satani n’a si ka nepelwa kale mwa lifasi. Mane bupaki bu bonisa kuli n’a til’o nepelwa fa lifasi hasamulahonyana wa ku beiwa kwa Jesu fa lubona sina Mulena wa Mubuso wa Mulimu ka 1914. *—Sinulo 12:1-10.

Kacwalo he, ki kabakalañi Jesu ha n’a bulezi za ku lundulwa kwa Satani kwa lihalimu ka mukwa o bonahalisa inge kuli seo ne se si ezahalile kale? Bocaziba ba bañwi ba akaleza kuli Jesu n’a nyaza balutiwa ba hae kabakala ku bonisa buikuhumuso bo bu sa swaneli. Ba lumela kuli f’o, n’a ba bulelela kuli: ‘Mu konile ku tula badimona, kono mu si ikuhumusi ka seo. Satani n’a ikuhumusize, mi seo ne si tisize kuli a wisiwe kapili.’

Ha lu bati ku ba bañañeli mwa taba ye. Kono ku bonahala luli kuli Jesu n’a tabile ni balutiwa ba hae, mi n’a bulela za ku timezwa kwa Satani mwa nako ya kwapili. Jesu n’a ziba hande ka za sitoyo se situna sa Diabulosi ku fita ufi kamba ufi wa balutiwa ba hae. Mu nahane tabo ya n’a ikutwile Jesu ha n’a utwile kuli badimona ba ba m’ata ne ba tuzwi ki balutiwa ba hae ba ba si ka petahala! Ku tulwa k’o kwa badimona ne li mutala o n’o bonisa muhato wa na k’a nga Jesu kwapili, sina Mikaele, yena nduna wa mangeloi, wa ku lwanisa Satani ni ku mu lundula kwa lihalimu, ku mu nepela mwa lifasi.

Ka mo ku bonahalela, Jesu ha n’a bulezi kuli n’a talima Satani “inz’a wa,” n’a koñomeka kuli Satani n’a ka wiswa luli. Seo si swana ni bupolofita bo buñwi bwa Bibele bo bu bonisa likezahalo za kwapili inge kuli li talelelizwe kale. Ka mutala, mu bone bupolofita bo bu ama Mesiya mo bu ñolezwi kwa Isaya 52:13–53:12, mwa likalulo ze ñwi inge kuli bu talelelizwe kale, mi mwa likalulo ze ñwi inge kuli bu ka talelezwa kwapili. Mwendi Jesu n’a bonisa buikolwiso bwa kuli Satani n’a ka lundulwa kwa lihalimu ka ku ya ka mulelo wa Ndat’ahe. Hape Jesu n’a ziba kuli ka nako ya Mulimu, Satani ni badimona ba hae ne ba ka tamwa mi hasamulaho ni ku timelelezwa.—Maroma 16:20; Maheberu 2:14; Sinulo 20:1-3, 7-10.

[Litaluso za kwatasi]