“Lu Lakaza ku Alaba Kuli, ‘Ee!’”

CWANOÑU fa, ofisi ya mutai wa Lipaki za Jehova mwa Nigeria ne i amuhezi liñolo leo kalulo ye ñwi ya lona i li:

“Mwan’a luna, Anderson, n’a na ni lilimo ze 14 ka nako ya timela. A si ka timela kale, n’a uta likuhu ze peli. N’a bata kuli a li lekise mi hasamulaho ni ku lumela masheleñi kwa mutai sina nubu kwa musebezi wa ku kutaza mwa lifasi kaufela. Kono n’a itobalezi likuhu zeo li si ka lekisiwa kale.

“Ka ku hupula mulelo wa Anderson, luna bashemi ba hae, lwa uta likuhu zeo ni ku li lekisa. Lu mi lumela masheleñi a, sina nubu ya Anderson. Kabakala sepiso ya Jehova, lu na ni tumelo ye tiile ya kuli ona cwale-cwale fa lu ka tuha lu bonana ni Anderson hape. Lu bata kuli h’a ka buza nji ne lu mu lumezi masheleñi a hae kwa ofisi ya mutai, sina mwa n’a lakaleza, ite lu to alaba kuli ‘Ee!’ Kaniti, lu nyolelwa ku bona isi fela Anderson kono hamoho cwalo ni ‘lilu le lituna la lipaki’ ba ba ka zusiwa kwa bafu.”—Maheberu 12:1; Joani 5:28, 29.

Sina liñolo le ha se li bonisize, sepo ya zuho i tiisa Bakreste ba niti. I ka ba tabo ye tuna hakalo bolule-lule ha ba ka swalisana ni lubasi lwa Anderson mwa ku amuhela balatiwa ba bona be ne ba ngilwe ki sila, lona lifu!—1 Makorinte 15:24-26.

Linzwi la Mulimu li fa sepo ya zuho ye omba-omba ku ba ye ñwi ya lika ze makaza ze ka tuha li talelezwa mwa lifasi le linca la ku luka le li ka zamaiswa ki Mubuso wa Mulimu. (2 Pitrosi 3:13) Bibele i bulela cwana ka za seo Mulimu a ka ezeza batu ka nako yeo, i li: “U ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.”—Sinulo 21:4.