Mubuso wa Mulimu Ki wa Luli Kacenu

“Linaha ze ñata, za lizo ze shutana-shutana, ze na ni zwelopili ye shutana li kona ku lumelelana cwañi? Se ku bulezwi kuli nto fela ye kona ku tahisa swalisano mwahal’a batu ki twaniso ye zwelela kwa pulaneti ye ñwi.”—Mutende wa kwa Australia o bizwa The Age.

TWANISO ye zwelela kwa pulaneti ye ñwi? Niha ku sa zibahali luli kuli nto yeo ne i ka swalisanisa linaha za lifasi kamba kutokwa, bupolofita bwa Bibele bu bulela za ziyezi ye taha ye ka tahisa kuli linaha za lifasi li swalisane. Mi kaniti ziyezi yeo i ka tahiswa ki nto ye si ya fa lifasi.

Mulena Davida wa Isilaele wa kwakale n’a polofitile ka za muinelo w’o wa lifasi. Ka ketelelo ya moya wa Mulimu n’a ñozi kuli: “Malen’a lifasi ba lumelelani, ni bazamaisi ba kopani ku lelisana, mo ba ka lwaniseza [Muñ’a] Bupilo ni Mutoziwa wa hae; ba li: A lu pume mawenge a bona, lu nepele kwahule matamiso a bona.” (Samu 2:2, 3; Likezo 4:25, 26) Mu lemuhe kuli malena ba lifasi ne ba ka swalisana mwa ku lwanisa Jehova, yena Mubupi wa pupo kamukana, ni mutoziwa wa hae, kamba Mulena ya ketilwe ki yena, Jesu Kreste. Zeo ne li ka ezahala cwañi?

Ka ku ya ka mo li tatamanela likezahalo za mwa Bibele ni bupolofita bo bu talelelizwe, Mubuso wa Mulimu ne u tomilwe ka 1914 mwa lihalimu mi Jesu Kreste ki yena Mulena wa ona. * Ka nako yeo, linaha za lifasi ne li na  ni muhupulo u li muñwi. Ku fita ku ipeya kwa puso ya Mubuso wa Mulimu o munca, ne li tupwikezi mwa ku lwanela m’ata—ili mwa Ndwa Ye Tuna, kamba Ndwa ya Lifasi ya I.

Jehova Mulimu u nga cwañi kezo yeo ya babusi ba butu? “Ya inzi mwa lihalimu wa ba nyaziseza; [Muñ’a] Bupilo wa ba seha. Kih’a bulela ni bona inz’a halifile, a ba sabisa ka ku nyema kwa hae.” Ku tuha f’o Jehova u ka bulelela Mwan’a hae, yena Mulena ya tozizwe wa Mubuso kuli: “Kupa ku Na, mi ni ka ku fa macaba, ibe sanda sa hao, ni mafelelezo a lifasi, ibe liluwo la hao. U ka ba tubaka ka mulamu wa sipi; u ba pyate tuemba-emba sina pizana ya mubupi.”—Samu 2:4, 5, 8, 9.

Macaba a’ lwanisa a ka tubiwa cwalo lwa mafelelezo ka mulamu wa sipi fa Armagedoni, kamba Har–​Magedon. Buka ya Sinulo, yona ya mafelelezo mwa Bibele, i talusa kezahalo ye tuna yeo kuli ki “ndwa ya lizazi le lituna la Mulimu Ya-Mata-Kaufela” ili k’o “malen’a lifasi kamukana” ba kopanyezwa. (Sinulo 16:14, 16) Ka kukuezo ya sidimona, macaba a lifasi kwa mafelelezo a ka kopana ka mulelo u li muñwi, ona wa ku lwanisa Mulimu Ya-Mata-Kaufela.

Nako yeo batu ba ka lumelelana ni ku lwanisa bubusi bwa Mulimu i sutelela ka bubebe. Kono “swalisano” ya bona ha i na ku ba tusa ka butu. Kezo ya bona i ka ba ona muhato wa pili wa ku tahiswa kwa kozo ya batu ye s’e libelezwi ka nako ye telele. Ka nzila ifi? Mwa ndwa ya mafelelezo yeo, Mubuso wa Mulimu “u ka ketula ni ku feza mibuso kaufela [ya lifasi]; kono ona u ka ba teñi kamita ni ku ya ku ile.” (Daniele 2:44) Ki Mubuso wa Mulimu, isi kopano ifi kamba ifi ya butu ye ka taleleza takazo ya batu ya ku ba ni kozo mwa lifasi.

Muzamaisi Yo Mutuna wa Mubuso

W’o ki ona Mubuso w’o batu ba bañata ba ba lata niti ba lapelelanga ha ba li: “Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Ku fita ku ba muinelo fela o mwa pilu ya mutu, Mubuso wa Mulimu ki puso ya luli ye s’e petile lika ze nde ku zwa fo u tomezwi ka 1914. Ha lu nyakisiseñi lisupo ze tuna ze bonisa kuli Mubuso wa Mulimu ki wa luli, o sebeza kacenu.

Pili, u na ni mutai wa tamaiso, o m’ata, o sebeza hande o etelelwa ki Mulena Jesu Kreste. Ka 33 C.E., Jehova Mulimu n’a file Jesu Kreste ku ba yena Toho ya puteho ya Sikreste. (Maefese 1:22) Ku zwelela honaf’o, Jesu u ezize za butoho bwa hae, ili ku bonisa kuli w’a kona ku ba muzamaisi. Ka mutala, mwa Judea ha ne ku keni lukupwe mwa lilimo za baapositola, puteho ya Sikreste honaf’o ya lukisa za ku tusa ba ba ku yona. Kwa lukiswa za ku fa lituso, mi Barnabasi ni Saule ba lumiwa ku zwa kwa Antioke ku isa lituso zeo.—Likezo 11:27-30.

Cwale ka ku ba kuli Mubuso se u tomilwe, lu libelela kuli Jesu Kreste u ka eza ze ñata ni ku fita. Mo ku bela ni likozi kaufela—ili zikinyeho, tala, munda, tukundukundu, mañungwa, ni ku tunya kwa mufuse o cisa ku zwelela mwa lilundu—puteho ya Sikreste ya Lipaki za Jehova ha i liyehangi  ku tusa balumeli ka bona ni batu ba bañwi ba ba tahezwi ki likozi zeo. Ka mutala, lizikinyeho ze tuna ha ne li ezahezi mwa El Salvador ka January ni February 2001, ne ku lukisizwe lituso mwa likalulo kaufela za naha, mi likwata za Lipaki za Jehova be ne ba zwa kwa Canada, Guatemala, ni United States ne ba tusize. Mwa nako ye kuswani fela, ne ku yahilwe sinca libaka ze talu za ku lapelela teñi, ni mandu a fitelela 500.

Babusiwa ba Mubuso wa Mulimu

Ku zwelela fo u tomezwi ka 1914, Mubuso wa Mulimu wa kwa lihalimu u sweli ku kubukanya ni ku onga-onga babusiwa ba ona ku zwelela mwa batu ba mwa lifasi. Seo si taleleza bupolofita bo bu nyangumuna bo bu ñozwi ki Isaya kuli: “Kwa mazazi a kwapili, lilundu la [Muñ’a] Bupilo [bulapeli bwa hae bwa niti bo bu pahami] li ka tomwa fa ngo ya malundu, . . . mi macaba kaufela a ka ya kwateñi.” Bupolofita bu bonisa kuli “macaba kaufela” a ka kambamela kwa lilundu leo ni ku amuhela litaelo ni milao ya Jehova.—Isaya 2:2, 3.

Musebezi w’o u tahisize kopano ye lemuseha ka ku fitisisa mwa linako za cwale, ili kopano ya Bakreste mwahal’a macaba ba ba fitelela 6,000,000 mwa linaha za lifasi ze fitelela 230. Kwa mikopano ya mwahal’a macaba ya Lipaki za Jehova, ba ba bona ze ezahala hañata ba komokiswanga ki lilato, kozo, ni swalisano ze mwahal’a undi wa nyangela, ze banga teñi ku si na taba ni lika ze cwale ka sicaba, sizo, ni puo ya bona. (Likezo 10:34, 35) Kana haki niti kuli, kuli puso i kone ku kopanya mianda-nda ya likwata za mikowa kuli ba be mwa kozo ni swalisano, puso yeo i lukela ku ba ye sebeza hande, ye tiile—mi mane ili ya luli?

Mubuso wa Mulimu ni Tuto

Puso ni puso i na ni lika ze i tokwa kuli babusiwa ba yona ba eze, mi mañi ni mañi ya bata ku busiwa ki puso yeo u lukela ku eza lika zeo. Ka nzila ye swana, Mubuso wa Mulimu u na ni lika ze u tokwa kuli babusiwa ba ona ba eze. Kono ku konisa batu ba bañata ba lisimuluho ze ñata-ñata ku amuhela ni ku latelela lipimo ze swana kaniti ki mungendenge o mutuna. Kacwalo, nto ye ñwi ye bonisa kuli Mubuso wa Mulimu ki wa luli ki tukiso ya ona ye sebeza hande ya lituto ze ama ni ku cinca isi munahano fela kono mane ni pilu.

Mubuso u peta cwañi musebezituna w’o? Ka ku itusisa muezezo wa baapositola wa ku kutaza “mwa mandu” ni ku luta Linzwi la Mulimu kwa batu ka buñwi. (Likezo 5:42; 20:20) Mulutelo o cwalo u peta ze kuma kai? Jacques Johnson, muprisita wa Mukatolika n’a ñozi mwa mutende wa kwa Canada wa ka viki ka za buikatazo bwa hae bwa ku zwafisa musali ya n’a ituta ni Lipaki za  Jehova. N’a ize: “Ne ni swabile hahulu mi ne ni lemuhile kuli ne ni lwana ndwa ye ne ni si ke na tula. Na kala ku lemuha kuli ka likweli-kweli, Lipaki ba basali ne ba pangile bulikani bo butuna ni me y’o ya n’a s’a zwangi fandu. Ne ba utwani ni yena ka ku mu tusa, ku eza sango ni yena, ili ku toma swalisano ye tuna ye fita kwa pilu. Ku si ka fita nako a tiya mwa bulapeli bwa bona mi ha ku na se ne ni kona ku eza ka ku tibela nto yeo.” Sina pilu ya musali y’o ya n’a banga Mukatolika mo ne i susumelelizwe ki litaba za mwa Bibele ze ba luta Lipaki za Jehova ni muzamao wa bona wa Sikreste, lipilu za bolule-lule ba batu mwa lifasi kaufela ni zona li sweli ku susumezwa cwalo.

Tuto yeo, ili tuto ya Mubuso, i tomile fa Bibele, mi i yemela lipimo za yona za muzamao. I luta batu ku latana ni ku kutekana ku si na taba ni simuluho ya bona. (Joani 13:34, 35) Hape i tusa batu ku utwa kelezo ye li: “Mu si ke mwa ya ka ku likanyisa lifasi le; kono mu fetuhe ka ku shemunwa mwa kutwisiso ya mina, kuli mu lemuhe se si latwa ki Mulimu kana ki sifi, se sinde, se si kateleha, se si petehile.” (Maroma 12:2) Ha se ba tuhezi mipilelo ya bona ya kale ni ku latelela ka tabo milao ni likuka za Mubuso, ba bañata ba fumani kozo ni tabo cwale ni sepo ya bupilo bo bunde kwapili.—Makolose 3:9-11.

Nto ye tusa hahulu mwa ku ba ni swalisano yeo ki yona magazini ye ya Tora ya ku Libelela. Ka mitolokelo ye lukisizwe hande ni liitusiso za ku hatisa ka zona mwa lipuo ze ñata, litaba ze tuna mwa Tora ya ku Libelela li hatiswanga ka kweli mwa lipuo ze 135, mi babali ba yona ba ba fitelela 95 pesenti mwa lifasi kaufela ba kona ku ituta litaba zeo mwa lipuo za bona ka nako ye swana.

Muñoli yo muñwi wa bulapeli bwa Mormon n’a kolohanyize ze petilwe ki bulumiwa bwa bulapeli bo buñwi. N’a ñozi kuli Tora ya ku Libelela ni Awake!, ze hatisizwe ki Lipaki za Jehova ki zona limagazini ze nde ka ku fitisisa za bukutazi mi n’a ize: “Ha ku na ya kona ku tameleza Tora ya ku Libelela ni Awake! ku ba ze susueza buzwa—batili, zona li tahisa temuho ya lika, ili nto ye ni boni ka siwela mwa lihatiso ze ñwi za bulapeli. Litaba za mwa Tora ya ku Libelela ni Awake! za katulusa kakuli ki litaba za niti, ze batisisizwe hande, za butokwa.”

Ku na ni bupaki bo buñata bwa kuli Mubuso wa Mulimu ki wa luli mi wa sebeza ka ku tala. Lipaki za Jehova ba taluseza ka tabo ni ka cisehelo bomuyahwa ni bona “Evangeli ye ya mubuso,” ni ku ba mema ku ba babusiwa ba ona. (Mateu 24:14) Kana mwa tabela taba yeo? Mwa kona ku ikola limbuyoti ze tahiswa ki ku swalisana ni ba ba sweli ku lutiwa lipimo za Mubuso, ba ba lika ka t’ata ku li latelela. Se sinde ni ku fita, mwa kona ku ba ni sepo ya ku pila mwa puso ya Mubuso mwa lifasi le linca le li sepisizwe mo “ku yahile Ku Luka.”—2 Pitrosi 3:13.

[Litaluso za kwatasi]

[Siswaniso se si fa likepe 4, 5]

Ka 1914, lifasi ne li tupwikezi mwa ndwa ya lifasi

[Maswaniso a fa likepe 6]

Ku itatela ku eza musebezi wa ku tusa ki bupaki bwa lilato la Sikreste le li sebeza

[Siswaniso se si fa likepe 7]

Lipaki za Jehova mwa lifasi kaufela ba tusiwa ka tukiso ye swana ya tuto