Kana Kelezo Ye Nde Ya Tokwahala?

KACENU, ba bañata ba lumela kuli ba na ni buikoneli bwa ku ziba ku taluhanya bunde kwa bumaswe ni kuli ba na ni tukelo ya ku eza ze ba bata kaufela. Ba bañwi bona ba bulela kuli nto kaufela ki ye nde ibile fela ya tabisa mutu. Linyalo ni lubasi ze ne ngiwa kale kuli ki ona mutomo wa nyangela ya batu, li sweli ku sinyeha hahulu.—Genese 3:5.

Mu nahane ka za Verónica, * ya pila mwa Mexico. U biha kuli: “Nakonyana pili lu si ka eza kale mukiti wa bu-15 wa kupuzo ya sinawenga sa luna, bo munn’a ka ba ni bulelela kuli ne ba zamaya ni musali yo muñwi. Ne ba ize bakeñisa kuli musali y’o n’a sa li kalibe mi n’a ba tabisa, ne ba si ke ba mu siya. Ne ni komokile ha ni nahana kuli mulikan’a ka yo mutuna n’a si ke a zwelapili ku ni ina bukaufi. Ne ni hupulanga kuli ku shwelwa ki mulatiwa ki yona nto ye butuku ku feleleza. Kono ku na, bubuki cwale ki bona bo ne bu ni utwisize hahulu butuku kakuli ne ni si ka luza fela mulatiwa wa ka kono hape n’a zwezipili ku ezanga lika ze n’e ni utwisa butuku.”

Mi ku na ni taba ya munna wa lilimo ze 22 ya s’a lelekani kale ni musal’a hae mi u na ni mwan’a mushimani kono h’a lati ku mu babalela ka ku ba yena ndatahe. U libelela kuli bomahe ba ute yena ni mwan’a hae. Bomahe ha ba hana ku eza za tokwa kaufela, wa halifanga ni ku ba lwanisa ka lipulelo, sina fela mwana ya bambabile. Bomahe ba ikutwanga kutokwa tuso muta a kala ku bonisa mikwa ye cwalo ya ku bambaba.

Zeo haki zona fela ze ezahala. Likauhano ni litelekano za ka mulao za ekezeha kai ni kai. Banana ba bañata ba iponela yo muñwi wa bashemi ba bona h’a zwa fa ndu ni ku yo kalisa ku pila ku sili. Banana ba bañwi ha ba sa na  likute ni le li kana kwa batu, ku kopanyeleza cwalo ni kwa bashemi ba bona, mi ba ikenya mwa muzamao o n’o si ka libelelwa kwakale. Mwa linaha ze ñata, se ku atile hahulu takazo ya ku lika tobali ya mifuta-futa, ku itusisa maswe milyani, ku tasezwa ki mikulwani, ni mafu a baluti kamba bashemi ba ba bulaiwa ki banana. Mi mwendi se mu lemuhile kuli matata mwa lifasi kacenu ha fumanehi fela mwa manyalo kamba mwa ku uta bana.

Ha lu nze lu iponela likezahalo zeo, lu kana lwa ipuza kuli ku ezaheziñi kwa nyangela. Haiba luli batu b’a ziba ku taluhanya bunde kwa bumaswe, ki kabakalañi matata a mañata cwalo ha si ka tatululwa? Kana ku tokwahala kelezo ye nde? Kana ku na ni ko ku kona ku fumanwa kelezo ye tusa cwalo, ye fumanehile ku ba ye itingwa? Nihaike ba bañata ba bulela kuli ba lumela ku Mulimu ni Linzwi la hae, likatulo za bona ha li bonisi kuli li etelelwa ki tumelo yeo. Kono ki lituso mañi ze lu kona ku fumana ha lu bata ni ku fumana kelezo ye zwa ku Mulimu? Ha lu nyakisiseñi seo mwa taba ye tatama.

[Litaluso za kwatasi]