“Kona Nto Ye Nde Ka Ku Fitisisa Ye Mu Kona Ku Eza”

ALEXIS ki mushimani wa lilimo ze ketalizoho ya pila mwa muleneñi wa Morelia, mwa Mexico, mi bashemi ba hae ba ituta Bibele ni ku yanga kwa mikopano ya Lipaki za Jehova. Ha na li kwa mukopano wa mupotoloho ni lubasi lwa habo yena, a bona poniso ya za ku kutaza fa ndu ni ndu. Honaf’o a fetuhela ku bondatahe ni ku ba buza kuli, “Tate, Tate, kiñi ha mu sa yangi kwa ku kutaza?” Bondatahe ba mu alaba kuli, “Ni sa ituta Bibele ilikuli ni kone ku kutazanga.” Alexis a alaba ka mafulofulo a li, “Tate, kona nto ye nde ka ku fitisisa ye mu kona ku eza.”

Mwanana yo munyinyani y’o n’a lemuhile butokwa bwa kuli a eze ka ku ya ka zibo ya za Jehova ya na ni yona mutu. Ka ku ba kuli ne ba pila lapa le li swana ni banyani ba hae ba ku bondatahe ba basali, pili a lapela ku Jehova kihona a ba bulelela za n’a itutile ka tuso ya bashemi ba hae mwa Buka Ya Ka ya Makande a Bibele. Nihaike Alexis n’a si ka ziba kale ku bala, n’a zibile hande ze mwa buka yeo ka ku itusisa maswaniso a bonisa ze mwa makande. Mane n’a bulezi kuli n’a bata ku yo potela batu fa mandu a bona kuli a ba taluseze za n’a ituta ka za milelo ya Mulimu.

Kaniti, banana hamoho ni ba bahulu b’a kona ku pila ka ku lumelelana ni z’a tokwa ku bona Jehova, yena “Ya-Kenile,” mi kacwalo ba na ni tohonolo ye tuna ya ku fa bupaki bwa za hae mwahal’a macaba. (Isaya 43:3; Mateu 21:16) Ku si na ku kakanya, yeo ki ye ñwi ya lika ze nde ka ku fitisisa z’a kona ku eza mutu.