Ku Toiwa Fela Ku Si Na Libaka
Ku Toiwa Fela Ku Si Na Libaka
“Ba ni toile fela.”—JOANI 15:25.
1, 2. (a) Ki kabakalañi ba bañwi ha ba komoka muta Bakreste ba bulelwa maswe, kono ki kabakalañi ha lu sa swaneli ku komokiswa ki lipulelo ze cwalo? (b) Ki ifi taluso ya linzwi la ku “toya” ye lu ka nyakisisa mwa taba ye? (Mu bone litaluso za kwatasi.)
LIPAKI ZA JEHOVA ba ikataza ku latelela likuka ze mwa Linzwi la Mulimu. Kabakaleo, ba na ni libubo le linde mwa linaha ze ñata. Kono ba sinyizwe libizo ka linako ze ñwi. Ka mutala, likwambuyu la muuso mwa muleneñi wa St. Petersburg, mwa Russia, n’a hupuzi kuli: “Ne lu bihezwi kuli Lipaki za Jehova ki sikwata se siñwi cwalo sa tuto ye keluhile se si ipatile mi ba bulayanga banana ni ku bulayana isali bona.” Kono hamulaho wa ku sebelisana ni Lipaki za Jehova mwa litukiso za mukopano wa macaba, likwambuyu ya swana y’o n’a ize: “Cwale ni bona batu ba ba iketile ni ku taba . . . Ba lata kozo mi ba wile lipilu, mi ba latana hahulu.” N’a ekelize kuli: “Ha ni utwisisi luli batu ha ba ba tamelezanga buhata bo bu cwalo.”—1 Pitrosi 3:16.
2 Batanga ba Mulimu haki kuli ba tabela ku tamelezwa buezalibi, kono ha ba komoki batu ha ba ba bulela maswe. Jesu n’a lemuselize cimo balateleli ba hae kuli: “Lifasi ha li mi toya, mu zibe kuli li toile na, pili. . . . Kono se, si tahile kuli ku ezahale linzwi le li ñozwi mwa Mulao wa bona, le li li: Ba ni toile fela.” * (Joani 15:18-20, 25; Samu 35:19; 69:4) Pili n’a kile a bulelela balutiwa ba hae kuli: “Muñ’a ndu ha ba mu bizize Beelzebule, ba ndu ya hae ba ka nyefulwa hahulu ni ku fita.” (Mateu 10:25) Bakreste b’a utwisisa kuli ku tiyela nyefulo yeo ki kalulo ya [“kota ya linyando,” NW] ye ne ba amuhezi ha ne ba bile balateleli ba Kreste.—Mateu 16:24.
3. Balapeli ba niti ba nyandisizwe ha kuma kai?
3 Balapeli ba niti se ba nyandisizwe ka nako ye telele, ku kalela fela mwa linako za “Abele ya lukile.” (Mateu 23:34, 35) Nyandiso yeo ha i si ka ezahala fela ka siwela. Jesu n’a ize balateleli ba hae ne ba ka ‘toiwa ki batu kamukana’ kabakala libizo la hae. (Mateu 10:22) Hape, muapositola Paulusi n’a ñozi kuli batanga kaufela ba Mulimu—ku kopanyeleza mañi ni mañi wa ku luna—ba swanela ku libelela ku nyandiswa. (2 Timotea 3:12) Libaka ki lifi?
Fo Ku Zwelela Sitoyo sa Fela
4. Bibele i patulula cwañi musimululi wa sitoyo sa fela?
4 Linzwi la Mulimu li patulula kuli ku zwelela fela kwa simuluho, ku bile ni mushamiliketi ya sa bonwi ka meto. Mu nahane fela pulao ye situhu ya Abele, mutu wa pili ku ba ni tumelo. Bibele i bulela kuli muhulwan’a hae wa mubulai, Kaine, “n’a zwa ku ya maswe,” Satani Diabulosi. (1 Joani 3:12, NW) Kaine n’a hozize moya wa Satani, mi Diabulosi a itusisa yena ku peta milelo ya hae ye maswe. Bibele hape i patulula za n’a ezize Satani kuli Jobo ni Jesu Kreste ba tasezwe maswe. (Jobo 1:12; 2:6, 7; Joani 8:37, 44; 13:27) Buka ya Sinulo i tungunyuna hande musimululi wa nyandiso ya balateleli ba Jesu, kuli: ‘Bona, Diabulosi wa ta, s’a t’o kenya ba bañwi ku mina mwa tolongo kuli mu likwe.’ (Sinulo 2:10) Ki niti, Satani ki yena musimululi wa sitoyo kaufela se ba toilwe ka sona batu ba Mulimu ku si na libaka.
5. Satani u toyeziñi balapeli ba niti?
5 Satani u toyeziñi balapeli ba niti? Ka mulelo o bonahaza moya wa hae wa ku ikunga, Satani ka sibili u lwanisa “Mulena wa kamita,” Jehova Mulimu. (1 Timotea 1:17; 3:6) U piha kuli mubusezo wa Mulimu kwa libupiwa za hae wa imeza ni kuli ha ku na ya sebeleza Jehova ka mulelo o munde, kono kuti batu ba mu sebeleza fela kuli ba fumane se siñwi. Satani u ipapata kuli, kuli a fiwe sibaka sa ku lika batu, wa kona ku kwenula mañi ni mañi wa ku bona ku tuhela ku sebeleza Mulimu. (Genese 3:1-6; Jobo 1:6-12; 2:1-7) Ka ku sawana Jehova kuli ki muhateleli, lihata, ni mupalelwi, Satani u bata ku lwanisa Jehova kuli ni yena a be mubusi wa pupo kamukana. Kacwalo, mabifi a hae fahalimw’a batanga ba Mulimu a tiswa ki takazo ya hae ya ku bata ku lapelwa.—Mateu 4:8, 9.
6. (a) Lu amiwa cwañi ka butu mwa taba ya bubusi bwa Jehova? (b) Ku utwisisa taba ye, ku lu tusa cwañi ku zwelapili ku sepahala? (Mu bone sikwenda, fa likepe 16.)
6 Kana mwa iponela taba yeo mo i amela bupilo bwa mina? Ka ku ba mutang’a Jehova, mu swanela kuli mu lemuhile kuli ku eza tato ya Mulimu niha ku tokwa buikatazo bo butuna, ku na ni lituso ze ñata luli ze zwa mwa ku eza cwalo. Kono ku cwañi haiba miinelo ya mwa bupilo bwa mina i tatafala, kamba mane ku mi utwisa butuku, ha mu bata ku zwelapili ku latelela milao ni likuka za Jehova? Mi ku cwañi haiba ku bonahala inge kuli ha ku na lituso ze mu fumana mwa ku eza cwalo? Kana ne mu ka bulela kuli ha ku na tuso ya ku zwelapili ku sebeleza Jehova? Kamba lilato la mina la ku lata Jehova ni buitebuho bwa mina kwa tulemeno twa hae to tu makaza ne li ka mi susumeza ku zwelapili ku zamaya mwa linzila za hae kaufela? (Deuteronoma 10:12, 13) Ka ku lumeleza Satani ku lu tiseza manyando a mañwi, Jehova u file mañi ni mañi wa ku luna kolo ya ku alaba Satani mwa taba ya ipapata ku yona.—Liproverbia 27:11.
“Ha Ba Mi Tapaula”
7. Ki lifi lyano le liñwi l’a itusisa Diabulosi mwa ku lika ku lu kwenula ku Jehova?
7 Cwale ha lu nyakisiseñi hande ye ñwi ya likezo za m’ano a bupumi zeo Satani a itusisa mwa ku ikataza ku icemela mwa taba—ona ku tapaula ka bupumi. Jesu n’a bizize Satani kuli ki “ndat’ahe lishano.” (Joani 8:44) Libizo le li mu talusa la Diabulosi, le li talusa “Musawani,” li mu paka ku ba musawani yo mutuna wa Mulimu, linzwi la hae le linde, ni libizo la hae le li kenile. Diabulosi u itusisa liakalezo ze si ka nepahala, litamilikezo za buhata, ni buhata bo bunsu mwa ku lwanisa bubusi bwa Jehova, mi u itusisanga mano a swana ao mwa ku sawana batanga ba Mulimu ba ba sepahala. Ka ku tapaula Lipaki bao, u kona ku tahisa kuli tiko ye tuna mane i ba tatafalele hahulu.
8. Satani n’a nyefulisize cwañi Jobo, mi ne ku zwileñi mwateñi?
8 Mu nyakisise ze ne ezahezi ku Jobo, ili y’o libizo la hae li talusa kuli “Ya Toilwe.” Kwand’a ku sinya mubili wa Jobo, bana ba hae, ni bufumu bwa hae, Satani a ezisa kuli ku bonahale inge kuli Jobo ki muezalibi ya n’a otiwa ki Mulimu. Nihaike n’a kutekeha hahulu, Jobo n’a fitile fa ku shwaulwa, mane nihaiba ki bahabo yena ni balikani ba hae ba batuna. (Jobo 19:13-19; 29:1, 2, 7-11) Hape ka ku itusisa baomba-ombi be ne ba ipumisa, Satani a lika ku ‘lobaka Jobo buemba-emba’ ka manzwi, ka ku akaleza pili kuli Jobo u swanela kuli n’a ezize sibi se situna mi ku zwa f’o kihona a mu nyaza patalaza inge kuli n’a fosize. (Jobo 4:6-9; 19:2; 22:5-10) Zeo ne li kana li nyefisize maswe Jobo!
9. Jesu n’a bonahalisizwe cwañi ku ba muezalibi?
9 Ka ku ba muyemeli yo mutuna wa bubusi bwa Jehova, Mwan’a Mulimu ki yena ya n’a toilwe maswe ki Satani. Jesu ha n’a tile fa lifasi, Satani, sina mwa n’a ezelize ku Jobo, n’a bata ku mu bonahalisa kuli u sinyehile kwa moya, inge kuli Jesu ki muezalibi. (Isaya 53:2-4; Joani 9:24) Batu ne ba mu bizize kuli ki munwi ni muci mi ne ba ize ‘n’a na ni mudimona.’ (Mateu 11:18, 19; Joani 7:20; 8:48; 10:20) N’a tamelelizwe kuli ki munyefuli. (Mateu 9:2, 3; 26:63-66; Joani 10:33-36) Litamilikezo zeo ne li tunkile hahulu Jesu, kakuli n’a ziba kuli ne li shwaulisa fela Ndat’ahe ku si na libaka. (Luka 22:41-44) Kwa mafelelezo, Jesu n’a kokotezwi inge sikebenga se si kutilwe. (Mateu 27:38-44) Ha n’a bonisa busepahali bo bu petehile, Jesu n’a itiisize “niha n’a hanyezwa” hahulu “ki baezalibi.”—Maheberu 12:2, 3.
10. Bomasiyaleti ba ba tozizwe ba yemwi cwañi ki Satani mwa miteñi ye?
10 Mwa miteñi ye, bomasiyaleti ba balateleli ba Kreste ba ba tozizwe ni bona ba toilwe ki Diabulosi. Satani u taluswa ku ba ‘mutami wa banyani ba Kreste, ya ba tamanga litaba fapil’a Mulimu wa luna, musihali ni busihu.’ (Sinulo 12:9, 10) Ku zwa fa lundulezwi kwa lihalimu ni ku wisezwa bukaufi ni lifasi, Satani u ekelize kwa buikatazo bwa hae bwa ku bonahalisa banyani ba Kreste kuli ki bahaniwa ba ba lukela ku zwapaulwa. (1 Makorinte 4:13) Mwa linaha ze ñwi, ba bizizwe ka busawani kuli ki sikwata se si lubeta sa tuto ye keluhile, sina mo ne ba bizelizwe Bakreste ba kwa makalelo. (Likezo 24:5, 14; 28:22) Sina mo ku bulelezwi kwa makalelo, ba sawanilwe ka ku ba tameleza litaba za buhata. Niteñi, ibe ‘mwa ku kutekiwa, ni mwa ku shubulwa; mwa ku bulelwa maswe, ni mwa ku bubekwa,’ banyani ba Kreste ba ba tozizwe, ka ku tusiwa ki balikani ba bona ba “lingu ze ñwi,” ba ikatalize ka buikokobezo ku ‘buluka milao ya Mulimu, ni ku swala bupaki bwa Jesu.’—2 Makorinte 6:8; Joani 10:16; Sinulo 12:17.
11, 12. (a) Bakreste ba tapaulelwa lika mañi ze ñwi? (b) Mukreste u kona ku nyandisezwa cwañi tumelo ya hae ku si na libaka?
11 Kono haki kuli mutang’a Mulimu yo muñwi ni yo muñwi u tapaulwa “kabakala Ku Luka.” (Mateu 5:10) Matata a mañwi a kana a tiswa ki mifokolo ya luna beñi. Ha ku na tumbo ye li teñi haiba “lu itiisa mwa ku natwa kabakala ku fosa.” Kono “ki nto ye lumelelwa” ki Jehova, haiba Mukreste a “itiisa mwa manyando a ku utwiswa butuku nih’a si na mulatu, inz’a eza cwalo kabakala lizwalo la ku utwa Mulimu.” (1 Pitrosi 2:19, 20) Seo si kona ku ezahala mwa miinelo mañi?
12 Ba bañwi ba nyandisizwe maswe kabakala ku hana ku ikenya mwa lizo za malilo ze lwanisana ni Mañolo. (Deuteronoma 14:1) Lipaki ba mikulwani ba nze ba shendakiwa maswe kabakala ku kumalela lipimo za Jehova za muzamao. (1 Pitrosi 4:4) Bashemi ba bañwi ba Sikreste ba tamelelizwe ka mafosisa kuli ba na ni “likesha” kamba “situhu” kabakala kuli ne ba tokwa bana ba bona ku fiwa kalafo ye si na mali. (Likezo 15:29) Bakreste ba silokiwa ki bahabo bona ni ba ba yahile ni bona kabaka fela la ku ba batanga ba Jehova. (Mateu 10:34-37) Bao kaufela ba latelela mutala o n’o tomilwe ki bapolofita ni Jesu ka sibili wa ku nyanda ku si na libaka.—Mateu 5:11, 12; Jakobo 5:10; 1 Pitrosi 2:21.
Ku Itiisa Ha Mu Tapaulwa
13. Kiñi se si kona ku lu tusa ku zwelapili ku tiya kwa moya ha lu zwapaulwa?
13 Ha lu zwapaulelwa tumelo ya luna, lu kana lwa zwafa, sina mwa n’a zwafezi mupolofita Jeremia, ni ku ikutwa kuli ha lu sa kona ku zwelapili ku sebeleza Mulimu. (Jeremia 20:7-9) Kiñi se si kona ku lu tusa ku zwelapili ku tiya kwa moya? Mu like ku nga lika ka mw’a li bonela Jehova. U nga ba ba itiisa ka busepahali mwatas’a muliko kuli ba tuzi, isiñi kuli ki bonalimai. (Maroma 8:37) Mwa munahano wa mina, mu nahane be ne ba yemezi bubusi bwa Jehova ku si na taba ni nyefulo ifi kamba ifi ye ne zwa ku Diabulosi—ili banna ni basali ba ba cwale ka Abele, Jobo, Maria mahe Jesu, ni basepahali ba bañwi ba kwakale, hamohocwalo ni batanga ka luna ba mwa miteñi ye. (Maheberu 11:35-37; 12:1) Mu kengeyele bupilo bwa bona bwa busepahali. Lilu le lituna leo la basepahali, ba lu biza kuli lu wabelwe ni bona mwa tulo ye bulukezwi ba ba tula lifasi ka tumelo ya bona.—1 Joani 5:4.
14. Tapelo ye zwelela kwa pilu i kona ku lu tiisa cwañi kuli lu zwelepili ku sepahala?
14 Haiba ‘minahano ya luna i ba ye miñata,’ lwa kona ku kupa Jehova mwa tapelo, mi u ka lu toba pilu ni ku lu tiisa. (Samu 50:15; 94:19) U ka lu fa butali bo lu tokwa kuli lu zibe mwa ku tiyela muliko ni ku lu tusa ku sa libala taba ye tuna, yona ya bubusi bwa Jehova, ye tisa kuli batanga ba hae ba toiwe fela ku si na libaka. (Jakobo 1:5) Jehova hape wa kona ku lu kapweka “kozo ya Mulimu ye fita kutwisiso kaufela.” (Mafilipi 4:6, 7) Mbombolelwa yeo ye zwa ku Mulimu i lu konisa ku zwelapili ku ombala ni ku tiya ha lu li mwa matata a matuna, lu sa komiwi ki sabo kamba ku honona. Ka moya wa hae, Jehova wa kona ku lu tiisa mwa butata kaufela bwa tuhelela ku lu tahela.—1 Makorinte 10:13.
15. Kiñi se si kona ku lu tusa ku sa ba ni ndimbelela ha lu nyanda?
15 Kiñi se si kona ku lu tusa ku sa ba ni mabifi ku ba ba lu toile fela ku si na libaka? Mu hupule kuli lila za luna ze tuna ki Satani ni badimona ba hae. (Maefese 6:12) Nihaike batu ba bañwi ba lu nyandisanga ka bomu inze ba ziba, buñata bwa ba ba lwanisa batu ba Mulimu ba eza cwalo ka ku sa ziba kamba ka ku cowezwa ki ba bañwi. (Daniele 6:4-16; 1 Timotea 1:12, 13) Jehova u lakaza kuli “batu kamukana” ba fumane kolo ya ku ‘piliswa ni ku fita fa zibo ya ku ziba niti.’ (1 Timotea 2:4) Kaniti, ba bañwi ba be ne ba lu lwanisanga kwamulaho se li mizwale ba luna ba Sikreste bakeñisa ku lemuha muzamao wa luna o sa nyazahali. (1 Pitrosi 2:12) Ku zwa f’o, lwa kona ku ituta se siñwi kwa mutala wa Josefa mwan’a Jakobo. Nihaike Josefa n’a nyandisizwe hahulu ki bahulwani ba hae, n’a si ka ba ni ndimbelela. Libaka ki lifi? Kakuli n’a lemuhile kuli Jehova n’a amiwa teñi, mi n’a ka zamaisa litaba kuli mulelo wa Hae u petahale. (Genese 45:4-8) Jehova ka nzila ye swana wa kona ku ezisa kuli manyando afi kamba afi e lu kana lwa kopana ni ona a lumbekehise libizo la hae.—1 Pitrosi 4:16.
16, 17. Ki kabakalañi ha lu sa swaneli ku bilaezwa ki buikatazo bwa bahanyezi bwa ku tibela musebezi wa ku kutaza?
16 Ha lu swaneli ku bilaela hahulu haiba bahanyezi ka nakonyana ba bonahala inge ba ba kona ku tibela taba ye nde ku zwelapili. Jehova cwale u nyanganyisa macaba ka bupaki bo bu sweli ku fiwa mwa lifasi kaufela, mi bufumu bwa macaba bu sweli bwa taha. (Hagai 2:7) Kreste Jesu, Mulisana yo Munde, n’a ize: ‘Lingu za ka, li utwa linzwi la ka; na li ziba, mi za ni latelela. Ni li fa bupilo bo bu sa feli, . . . mi ha ku na mutu ya ka li zwisa mwa lizoho la ka.’ (Joani 10:27-29) Mangeloi a kenile ni ona a teñi mwa kutulo ye tuna ya kwa moya. (Mateu 13:39, 41; Sinulo 14:6, 7) Kacwalo, ha ku na nto ye ba bulela bahanyezi kamba ye ba eza ye ka kona ku palelwisa mulelo wa Mulimu.—Isaya 54:17; Likezo 5:38, 39.
17 Hañata buikatazo bwa bahanyezi bwa ba fetuhelanga. Mwa silalo se siñwi mwa Africa, ne ku hasanyizwe hahulu buhata ka za Lipaki za Jehova, ku kopanyeleza cwalo ni taba ya kuli ne ba lapela Diabulosi. Kabakaleo, Lipaki ha ne ba potelanga Grace, n’a matelanga kwamulaho wa ndu ya hae ku yo ipata ku fitela ba funduka. Ka zazi le liñwi pasita wa keleke kwa n’a lapela a swala ye ñwi ya lihatiso za luna ni ku bulelela be ne ba li teñi kaufela kuli ba si ke ba i bala kakuli ne i ka kelusa tumelo ya bona. Seo sa tahisa kuli Grace a lakaze hahulu ku ziba ka za taba yeo. Lipaki ha ne ba tile musipili o tatama, ku fita ku ipata a ambola ni bona ni ku amuhela kopi ya hatiso yeo. Tuto ya Bibele ne i kalisizwe, mi ka 1996 a kolobezwa. Grace cwale u itusisa nako ya hae ku bata ba bañwi ba ba kana ba bulelezwi lishano ka za Lipaki za Jehova.
Mu Tiise Tumelo ya Mina Cwale
18. Ki kabakalañi ha ku tokwahala ku tiisa tumelo ya luna pili miliko ye mituna i si ka taha kale, mi lu kona ku eza cwañi cwalo?
18 Bakeñisa kuli Satani wa kona ku shangumuna sitoyo sa fela ka nako ifi kamba ifi, ku butokwa kuli lu tiise tumelo ya luna cwale. Lu kona ku eza cwañi cwalo? Piho ye ñwi ye zwa kwa naha k’o batu ba Jehova se ba nyandisizwe, n’e ize: “Ku lemuhilwe nto ye ñwi: Ba ba na ni mikwa ye minde ya kwa moya ili ba ba itebuha hahulu niti ya mwa Bibele ha ba na butata bwa ku itiisa ha ba welwa ki miliko. Kono bao ‘ka linako ze nde’ ba shutanga mikopano, ku sa zwela hahulu mwa sebelezo ya mwa simu ni ku loba likuka ze nde mwa litaba ze nyinyani hañata b’a wanga ha ba banga mwa miliko ye ‘buhali.’” (2 Timotea 4:2) Haiba mu bona likalulo ze mu tokwa ku eza ku zona zwelopili, mu si ke mwa liyeha ku ikataza ku eza cwalo.—Samu 119:60.
19. Busepahali bwa batanga ba Mulimu niha ba toilwe fela bu petañi?
19 Busepahali bwa balapeli ba niti ku si na taba ni sitoyo sa Satani bu fa bupaki bo bu iponelwa bwa kuli bubusi bwa Jehova ki bona bo bu lukela, bwa swanela, mi hape bu lukile. Busepahali bwa bona bu tabisa pilu ya Mulimu. Nihaike batu ba kana ba ba nyefula maswe, yena ya tompeha fahalimwa lifasi ni lihalimu “h’a swabeli ku ipiza Mulimu wa bona.” Kaniti luli, ku konwa ku bulelwa ka swanelo ka za basepahali bao kuli: “Lifasi ne li sa ba swaneli.”—Maheberu 11:16, 38.
[Litaluso za kwatasi]
^ para. 2 Mwa Mañolo, linzwi la ku “toya” li na ni litaluso ze shutana-shutana. Mwa miinelo ye miñwi, li talusa ku sa lata hahulu. (Deuteronoma 21:15, 16) Ku “toya” hape ku kona ku talusa ku sa tabela hahulu nto ye ñwi ku si na mulelo wa ku i sinya, kono mutu inz’a bata mwa ku picukela nto yeo kabakala kuli ya nyenyisa. Kono hape linzwi la ku “toya” li kona ku talusa lutimbo, lo lu zwelapili ili l’o hañata lu zamaelelanga ni lunya. Yeo ki yona taluso ya linzwi le li bulelwa mwa taba ye.
Kana Mwa Kona ku Talusa?
• Kiñi se si tisa sitoyo sa fela se ba toilwe ka sona balapeli ba niti?
• Satani n’a itusisize cwañi nyefulo kuli a like ku felisa busepahali bwa Jobo ni bwa Jesu?
• Jehova u lu tiisa cwañi kuli lu tiyele sitoyo sa Satani?
[Lipuzo za Tuto]
[Mbokisi/Siswaniso se si fa likepe 16]
Ne Ba Lemuhile Taba Luli Fo Ne Ku Zwelela Sitoyo sa Fela
Yo muñwi wa Lipaki za Jehova mwa Ukraine, m’o musebezi wa ku kutaza ne u kwalezwi ka lilimo ze fitelela 50, n’a bulezi kuli: “Ze ne ba ipumani ku zona Lipaki za Jehova ha li swaneli ku ngiwa fela kuli ne li tisizwe ki batu. . . . Buñata bwa makwambuyu ne ba peta fela musebezi wa bona. Ha ne ku tile muuso u sili, makwambuyu ne ba kalile ku lu eza hande, kono luna ne lu zwezipili mo ne lu inezi. Ne lu lemuhile kuli simbule luli sa matata a luna ne si patuluzwi mwa Bibele.
“Ne lu si ka ikutwa kuli lu nyandiswa fela ku si na libaka ki batu ba ba lunya. Se ne si lu tusize ku itiisa ki ku utwisisa hande taba ye ne zusizwe mwa simu ya Edeni—yona taba ya tukelo ya bubusi bwa Mulimu. . . . Ne lu yemezi taba ye ama isi fela ze ba tokwa batu kono hape ni z’a tokwa Muambakani ya pahami mwa pupo kaufela. Ne lu utwisisa hande litaba luli fo ne ku zwelela sitoyo. Seo ne si lu tiisize ni ku lu konisa ku zwelapili ku sepahala niha ne lu li mwa miinelo ye t’ata ka ku fitisisa.”
[Siswaniso]
Victor Popovych, n’a tamilwe ka 1970
[Siswaniso se si fa likepe 13]
Ki mañi ya n’a tahisize nyefulo ya n’a nyefuzwi ka yona Jesu?
[Maswaniso a fa likepe 15]
Jobo, Maria, ni batanga ba Mulimu ba mwa lizazi la cwale, ba ba cwale ka Stanley Jones, ba yemezi bubusi bwa Jehova