Ka mwa ku Tiyela ku Zwafa

KANA mu zwafile? Mwa nako ye ya ku tokwa sepo hande ni ya mifilifili, batu ba bañata ba zwafile. Ba bañwi ba zwafile kakuli ha ba beleki. Ba bañwi ba talimani ni matata a tahisizwe ki kozi. Mi ba bañwi ba tundana ni matata a mwa lubasi, butuku bo butuna, kamba ku ikutwa buinosi.

Haiba mu zwafile, mu kona ku fumana kai tuso? Bolule-lule mwa lifasi kaufela ba omba-ombiwa ka ku bala Linzwi la Mulimu, Bibele. Ba kolwiswa ki manzwi a muapositola Paulusi, ya n’a bulezi kuli: “Mulimu a lumbiwe, Yena Ndat’ahe Mulen’a luna Jesu Kreste, Ndate ya mukekecima, Mulimu wa ze tiisa pilu kaufela. Ya lu tiisanga pilu mwa ñalelwa ifi kamba ifi.” (2 Makorinte 1:3, 4) Neikaba hande ha ne mu ka bala taba ye ni litaba ze ñwi ze mwa Bibele ya mina. Ku eza cwalo ku ka ‘tiisa pilu ya mina, ni ku mi tiisa.’—2 Matesalonika 2:17.

Tuso ya ku tiyela ku zwafa i kona ku fumanwa hape ka ku swalisana ni ba ba sebeleza Jehova. Liproverbia 12:25 i bulela kuli: “Pilu ye tezi lipilaelo i inamisa mutu; kono linzwi le li bulelwa ka musa la mu tabisa.” Ha lu fumaneha kwa mikopano ya Sikreste, lu utwa “linzwi le li bulelwa ka musa,” le li ‘munati mwa pilu, ili le li tisa buiketo mwa masapo.’ (Liproverbia 16:24) Mwa kona ku fumaneha kwa mukopano kwa Ndu ya Mubuso ya Lipaki za Jehova kuli mu yo ikutwela ka m’o ku kopana ko ku cwalo ku kona ku mi tiiseza.

Hape mwa kona ku fumana tuso kwa m’ata a tapelo. Haiba mu ikutwa ku imezwa ki lipilaelo za bupilo, mu taluse maikuto a mina luli ku “ya utwa milapelo.” (Samu 65:2) Mubupi wa luna, Jehova Mulimu, wa lu utwisisa hande ku fita mo lu ikutwela luna beñi. Lwa kona ku itinga fa tuso ya hae. Linzwi la Hae li lu sepisa kuli: “U lwalise [Muñ’a] Bupilo mulwalo wa hao, mi u ka ku tiisa. H’a na ku lumela kuli ya na ni niti a nyanganyiswe.” (Samu 55:22) Ee, “ba ba sepa [Muñ’a] Bupilo ba fiwa mata a manca.”—Isaya 40:31.

Jehova Mulimu u lu file liitusiso ze m’ata hahulu ze kona ku lu tusa ku tula ku zwafa. Kana mu ka itusisa zona?