Lipuzo Ze Zwa kwa Babali

Ki kabakalañi Lipaki za Jehova ha ba nga kuli palo ya 144,000 ye bulezwi mwa buka ya Sinulo ki palo ya luli mi haki ya swanisezo?

Muapositola Joani n’a ñozi kuli: “Na utwa palo ya ba ba swailwe nombolo; i eza 144,000.” (Sinulo 7:4) Mwa Bibele, pulelo ya kuli “ba ba swailwe nombolo” i ama kwa sikwata sa batu ba ba ketilwe mwahal’a batu kuli ba buse lifasi le li li Paradaisi hamoho ni Kreste mwa lihalimu. (2 Makorinte 1:21, 22; Sinulo 5:9, 10; 20:6) Palo ya bona ye eza 144,000 i utwisiswa kuli ki palo ya luli ka mabaka a sikai. Libaka le liñwi li mwa manzwi a latelela Sinulo 7:4.

Muapositola Joani ha sa bulelezwi mwa pono ka za sikwata se sa batu ba 144,000, n’a bonisizwe sikwata se siñwi hape. Joani u talusa sikwata seo sa bubeli kuli ki ‘buñata bo butuna bwa batu, ku si na ya kona ku ba bala; ba zwa mwa macaba kaufela, ni mwa mishobo, ni mwa masika, ni mwa lipuo kaufela.’ Buñata bo butuna b’o ki batu ba ba ka punyuha “ñalelwa ye tuna” ye taha, ye ka sinya muinelo wa cwale o maswe.—Sinulo 7:9, 14.

Kono, mu lemuhe fapahano ya bonisa Joani ye mwahal’a timana 4 ni timana 9 za Sinulo kauhanyo 7. U bulela kuli sikwata sa pili, sa “ba ba swailwe nombolo,” si na ni palo. Kono sikwata sa bubeli sa “buñata bo butuna,” ha si na palo. Kacwalo, kwa utwisiseha kuli palo ya 144,000 ki palo ya luli. Kambe kuli palo ya 144,000 ne li palo fela ya swanisezo ya sikwata se si na ni palo ye sa zibahali, fohe fapahano ye bonisizwe mwahal’a litimana zeo ze peli ne i si ke ya utwahala kuli ki fapahano luli. Kacwalo, litimana zeo li bonisa hande fo ku sweu kuli palo ya 144,000 i lukela k’u ngiwa kuli ki palo ya luli.

Bocaziba ba Bibele ba bañata, ba kwaikale ni ba miteñi ye, ba fitile fa kutwisiso ye swana—ya kuli, palo yeo ki palo ya luli. Ka mutala, lilimo ze 100 kwamulaho k’o, caziba wa manzwi wa kwa Britain, Dr. Ethelbert W. Bullinger, ha n’a talusa Sinulo 7:4, 9, n’a bulezi kuli: “Taba ya niti kikuli: mwa kauhanyo m’o, ku boniswa za palo tenyene ni za palo ye sa zibwi.” (The Apocalypse or “The Day of the Lord,” likepe 282) Cwanoñu fa, Robert L. Thomas, Jr., caziba wa New Testament kwa sikolo sa The Master’s Seminary kwa United States, n’a ñozi kuli: “Taba ya kuli palo ya 144,000 ki palo ya swanisezo fela ha i na mutomo.” A ekeza kuli: “Ki palo ya luli [ye kwa Sinulo 7:4] ka ku fapahana ni palo ye sa zibahali ye kwa Sinulo 7:9. Ha ne i ka ngiwa kuli ki ya swanisezo, u zibe ha ku na palo ni ye kana mwa buka yeo ye ne ka ngiwa kuli ki palo ya luli.”—Revelation: An Exegetical Commentary, Volyumu 1, likepe 474.

Ba bañwi ba kanananga kuli ka ku ba kuli Sinulo i tezi litaba za swanisezo, linombolo kaufela ze fumaneha mwa buka yeo, hamoho ni yona palo ya 144,000, li lukela ku ba za swanisezo. (Sinulo 1:1, 4; 2:10) Nihakulicwalo, muhupulo wo ha u si ka nepahala. Ki niti  kuli Sinulo i na ni linombolo ze ñata za swanisezo, kono hape i na ni linombolo ze si za swanisezo. Ka mutala, Joani u bulela za “mabizo a lishumi ka a mabeli a baapositola ba Ngunyana.” (Sinulo 21:14) Kwa iponahaza hande kuli nombolo ya 12 ye bulelwa mwa timana ye ki nombolo ya luli, isi ya swanisezo. Hape, muapositola Joani u ñola ka za “lilimo ze sikiti” za puso ya Kreste. Ku nyakisisa Bibele ka tokomelo ku bonisa kuli nombolo yeo ni yona ki nombolo ya luli. * (Sinulo 20:3, 5-7) Kacwalo, mwa buka ya Sinulo, se si bonisa haiba nombolo ki ya luli kamba ki ya swanisezo, ki taba ye bulelwa.

Taba ya kuli palo ya 144,000 ki palo ya luli mi i ama kwa palo ye likani ya batu ha i bapanyiwa kwa palo ya ba “buñata bo butuna,” hape i lumelelana ni litimana ze ñwi za mwa Bibele. Ka mutala, hasamulaho mwa pono yeo ya n’a filwe muapositola Joani, ba 144,000 ba taluswa kuli ki ‘ba ba liuluzwi mwahal’a batu, kuli ba be mitamuno.’ (Sinulo 14:1, 4) Pulelo yeo ya kuli “mitamuno” i ama kwa palonyana ya ba ba ketilwe. Mi hape, Jesu ha n’a li fa lifasi, n’a bulezi ka za be ne ba ka busa ni yena mwa Mubuso wa hae wa kwa lihalimu mi n’a ba bizize kuli ki ‘mutapinyana.’ (Luka 12:32; 22:29) Kacwalo, ba ba zwa mwa macaba ba ba ka busa mwa lihalimu ki ba banyinyani ha ba bapanyiwa kwa batu ba ba ka yaha mwa lifasi le li li Paradaisi.

Kabakaleo, ze bulezwi kwa Sinulo 7:4 ni litaba ze ñwi ze swana ze fumaneha ko kuñwi hape mwa Bibele li paka hande kuli palo ya 144,000 ki palo ya luli. Ki palo ya ba ba ka busa lifasi le li li Paradaisi hamoho ni Kreste mwa lihalimu, ili lifasi le li ka tazwa ka palo ye tuna ye sa zibahali ya batu ba ba tabile ba ba lapela Jehova Mulimu.—Samu 37:29.

[Litaluso za kwatasi]

[Siswaniso se si fa likepe 31]

Palo ya bacalifa ba kwa lihalimu ki 144,000 fela

[Siswaniso se si fa likepe 31]

Ba “buñata bo butuna” ha ba na palo

[Manzwi a bañi ba siswaniso fa likepe 31]

Linaleli: Ka tumelezo ya ba Anglo-Australian Observatory, siswaniso si swanisizwe ki David Malin