Se Si Tokwahala Luli Kuli Mutu A Be Ya Tabile

JEHOVA, “Mulimu ya tabile,” ni Jesu Kreste, yena “Mubusi . . . ya tabile,” ba ziba ku fita mutu kaufela se si tokwahala kuli mutu a be ya tabile. (1 Timotea 1:11, NW; 6:15, NW) Kacwalo, ha ku komokisi kuli simbule sa tabo si fumaneha mwa Linzwi la Mulimu, yona Bibele.—Sinulo 1:3; 22:7.

Mwa Ngambolo ya hae ye zibahala hahulu ya fa lilundu, Jesu n’a talusize se si tokwahala kuli mutu a be ya tabile. N’a ize: “Tabo ki ya ba ba” (1) ikutwa bubotana mwa pilu, (2) ba ba lila, (3) ba ba ishuwa, (4) ba ba utwa tala ni linyolwa la ku luka, (5) ba ba sishemo, (6) ba ba na ni pilu ye kenile, (7) ba ba tiseza batu kozo, (8) ba ba nyandiswa kabakala ku luka, ni (9) ba ba tapaulwa ni ku nyandiswa kabakala hae.—Mateu 5:3-11, NW. *

Kana Lipulelo za Jesu Li Nepahezi?

Buniti bwa manzwi a mañwi a Jesu ha bu tokwi ku taluswa. Ki mañi ya ka latula taba ya kuli mutu ya ishuwa, ya sishemo, ni ya lata kozo ili ya susuezwa ki pilu ye kenile u ka ba ya tabile ku fita mutu ya nyemile, ya lata hahulu likañi, ni ya si na makeke?

Kono ne lu kana lwa komoka kuli batu ba ba utwa tala ya ku luka ni linyolwa la  kona kamba ba ba lila b’a kona ku bulelwa kuli ba tabile. Batu ba ba cwalo ba ziba hande miinelo ya lifasi. Ba ‘tonga ni ku lila, kabakala bumaswe kaufela bo bu eziwa’ kacenu. (Ezekiele 9:4) Miinelo yeo ka ili yona ha i ba bisi ba ba tabile. Niteñi, ba banga ni tabo ye tuna luli ha ba ituta ka za mulelo wa Mulimu wa ku tisa miinelo ye lukile mwa lifasi ni katulo ye lukile ku ba ba hatelezwi.—Isaya 11:4.

Lilato la ku lata ku luka hape li tahisezanga batu ku lila kabakala ku palelwa kwa bona kamita ku eza se si lukile. Kacwalo, ba ikutwa bubotana bwa kwa moya mwa pilu. Batu ba ba cwalo ba bata ketelelo ku Mulimu kakuli ba lemuhile kuli ki yena fela a nosi ya kona ku ba tusa ku tula mifokolo ya bona.—Liproverbia 16:3, 9; 20:24.

Batu ba ba lila, ba ba utwa tala ni linyolwa la ku luka, ni ba ba ikutwa bubotana bwa kwa moya mwa pilu ba ziba butokwa bwa ku ba ni silikani se sinde ni Mubupi. Silikani se sinde ni batu si tisanga tabo, kono silikani se sinde ni Mulimu ki sona sihulu se si kona ku tisa tabo sakata. Ee, batu ba ba lata luli ze lukile, ba ba lakaza ku amuhela ketelelo ya Mulimu, ka niti luli ba kona ku bulelwa kuli ki ba ba tabile.

Kono ku kona ku mi bela t’ata ku lumela kuli mutu ya nyandiswa ni ku tapaulwa wa kona ku ba ya tabile. Niteñi, i lukela ku ba niti, kakuli ki Jesu ka sibili ya n’a bulezi cwalo. Kacwalo, manzwi a hae a talusañi?

Ba Nyandiswa Kono Ba Tabile—Ka Mukwa ufi?

Mu lemuhe kuli Jesu n’a si ka bulela kuli ku tapaulwa ni ku nyandiswa ka ili kona kwa kona ku tisa tabo. N’a ize: “[Tabo, NW] ki ya ba ba nyandiswa kabakala Ku Luka, . . . ha ba mi tapaula kabakala ka, ha ba mi nyandisa.” (Mateu 5:10, 11) Kacwalo mutu u kona ku ba ni tabo haiba a tapaulwa kabakala ku ba mulateleli wa Kreste ni kabakala ku pila bupilo bwa ku latelela likuka ze lukile za n’a lutile Jesu.

Seo si bonisizwe hande mwa taba ye ne ba ipumani ku yona Bakreste ba kwa makalelo. Ba Kuta ye Tuna ya Majuda ba “biza baapositola, ba ba nata, mi ba ba laela kuli ba si ke ba kutela ba luta batu ka Libizo la Jesu; kiha ba ba lukulula.” Baapositola ne ba ezize cwañi? ‘Baapositola ba zwa fa Kuta ba tabile, kakuli ba ezizwe ba ba lukela ku swabiswa kabakala Libizo la Jesu. Ha ba si ka lisela, ka mazazi kaufela, ku luta batu, ni ku bulela mwa Tempele ni mwa mandu kuli Jesu ki Kreste.’—Likezo 5:40-42; 13:50-52.

Muapositola Pitrosi u lu fa kutwisiso ye ñwi hape ka za m’o ku tapaulwa ku tahiseza tabo. N’a ñozi kuli: “Ha mu nyefulelwa Libizo la Kreste, mu na ni [tabo, NW]; kakuli Moya wa kanya, Moya wa Mulimu, u inzi fahalimu a mina.” (1 Pitrosi 4:14) Ee, nihaike kuli ku maswe, ku nyandiswa sina Mukreste kabakala ku eza ze lukile, ku tisa tabo ya ku ziba kuli mutu u amuhela moya o kenile wa Mulimu. Moya wa Mulimu u tahisa cwañi tabo?

Misebezi ya Nama Kamba Muselo ya Moya?

Moya o kenile wa Mulimu u fahalimw’a fela ba ba utwa Mulimu ka ku ba mubusi. (Likezo 5:32) Jehova h’a fi moya wa hae ku ba ba eza “misebezi ya nama.” Misebezi yeo “ki ku buka, ni buhule, ni mikwa ye masila, ni bubelete, ki ku lapela milimu, ni buloi, ki sitoyo, ni lifapano, ni lifufa, ni buhali, ni likañi, ni likauhano, ni lituto za buhata; ki muna, ni butahwa, ni ku ca maswe, ni ze ñwi ze cwalo.” (Magalata 5:19-21) Ki niti kuli mwa lifasi la kacenu “misebezi ya nama” i atile hahulu. Niteñi, ba ba ikenya ku yona misebezi yeo ha ba na tabo sakata ye inelela. Mi mane ku eza zona lika zeo ku sinya swalisano ye nde ni banabahabo mutu ni balikani ba hae. Mi  hape Linzwi la Mulimu li bulela kuli ba ba eza likezo ze cwalo “ha ba na ku ca sanda sa mubuso wa Mulimu.”

Ka ku fapahana, Mulimu u fa moya wa hae ku ba ba beya “muselo wa moya.” Tulemeno to tu bupa ona muselo wo ki “lilato, ni tabo, ni kozo, ki pilu-telele, ni musa, ni bunde, ki [tumelo NW], ni ku ishuwa, ni buiswalo.” (Magalata 5:22, 23) Ha lu bonisa tona tulemeno to, lu ba ni silikani sa kozo ni ba bañwi ni Mulimu, ili nto ye tahisa tabo sakata. (Mu bone kakwenda.) Sa butokwa mane kikuli, ha lu bonisa lilato, musa, bunde, ni tulemeno to tuñwi twa Mulimu, lu ka tabisa Jehova mi lu ka ba ni sepo ye nde ya bupilo bo bu sa feli mwa lifasi le linca la Mulimu la ku luka.

Tabo Ki Keto ya Mutu

Bo Wolfgang ni Brigitte bosinyalana ba ba pila mwa Germany ha ne ba kalile ku ituta Bibele ka tukufalelo, ne ba na ni maluo a mañata ili ao batu ba hupula kuli a kona ku tisa tabo. Ne li ba banca mi ne ba na ni buikangulo bo bunde. Ne ba apala litino ze cisa pasa, ne ba pila mwa ndu ye buheha ili ye kabisizwe ka bukwala, mi ne ba na ni pisinisi ye ne fumanisa hande. Ne ba sinyeza nako ya bona ye ñata kwa ku bata hahulu tutu, kono ku eza cwalo ne ku si ka ba tahiseza tabo sakata. Kono kwa nalulelule, bo Wolfgang ni Brigitte ba eza keto ya butokwa hahulu. Ba kala ku neela nako ye ñata ni m’ata a bona kwa ku eza lika za kwa moya ni ku bata linzila za ku sutelela hahulu ku Jehova. Keto ya bona kapili–pili ya cinca mubonelo wa bona, ili nto ye ne ba konisize ku nolofaza mupilelo wa bona ni ku ba konisa ku ba mapaina, kamba bashaeli ba Mubuso ba ka nako kaufela. La kacenu le, ki baitateli ba ba sebeleza fa ofisi ya mutai wa Lipaki za Jehova mwa Germany. Hape, ba ituta puo ya kwa Asia kuli ba kone ku tusa batu ba ba zwa mwa linaha li sili ku ituta litaba ze fumaneha mwa Linzwi la Mulimu, yona Bibele.

Kana bosinyalana bao ne ba bile ni tabo sakata? Wolfgang u li: “Haisali lu kalela ku eza hahulu lika za kwa moya, lu bile ni tabo ye tuna mi lu ikozi bupilo bo bunde luli. Ku sebeleza Jehova ka pilu kaufela hape ku tiisize linyalo la luna. Linyalo la luna n’e li le linde sa pili, kono ne lu na  ni misebezi ni mipateho ye ne lu kauhanyize. Kono cwale lu swalisani hamoho ka ku ba ni musebezi o swana.”

Ku Tokwahalañi Kuli Mutu A Be Ya Tabile?

Ka bukuswani: Mu ambuke “misebezi ya nama,” mi mu beye “muselo wa moya [wa Mulimu].” Kuli mutu a be ni tabo, u tokwa ku nyolelwa ku ba ni silikani se situna ni Mulimu. Mutu ya satalala ku eza cwalo u ka ba mutu ya tabile ya n’a talusize Jesu.

Kacwalo, mu si ke mwa matukela ku atula kuli ha mu koni ku ba ba ba tabile. Ki niti kuli mwendi ka nako ya cwale ha mu na buikangulo bo bunde kamba mwendi mane mu na ni matata mwa linyalo la mina. Mwendi ha mu sa kona ku ba ni bana, kamba mwendi mu futoka ku bata mubeleko o munde. Mwendi ha mu sa na pene ye ñata sina sapili. Niteñi, mu ndumebe, ha mu swaneli ku zwafa! Puso ya Mubuso wa Mulimu i ka tatulula ona matata ao ni a mañwi a mañata. Mane, Jehova Mulimu u ka tuha a taleleza sepiso ya hae ye ne bulezwi ki walisamu kuli: “Mubuso wa hao ki mubuso o sa feli . . . U fumbutulula sata sa hao, mi ze pila kaufela za kula.” (Samu 145:13, 16) Sina bolule-lule ba batanga ba Jehova mwa lifasi kaufela ha ba kona ku paka, ku hupula yona sepiso ya Jehova yeo ye omba-omba ku ka ekeza hahulu kwa tabo ya mina ka nako ye cwale.—Sinulo 21:3.

[Litaluso za kwatasi]

[Mbokisi/Siswaniso se si fa likepe 6]

Tulemeno To Tu Ekeza Kwa Tabo

Lilato li ka susumeza ba bañwi kuli ni bona ba mi late.

Tabo i mi fa m’ata a kuli mu itiise ha mu talimana ni litiko.

Kozo i mi tusa ku pima mikwangalakanyi ni ba bañwi.

Pilu-telele i mi konisa ku zwelapili ku ba ni tabo niha mu li mwa litiko.

Musa u ka suteleza ba bañwi ku mina.

Bunde ha mu bu bonisa ku ba bañwi ni bona ba ka mi tusa ha mu li mwa butokwi.

Tumelo i ka mi tusa ku sepa ketelelo ya Mulimu ye lilato.

Buishuwo bu ka tisa kuli mu be ni buiketo bwa kwa pilu, munahano, ni mwa mubili.

Buiswalo ha mu na ni bona ki ku talusa kuli mu ka ezanga mafosisa a manyinyani fela.

[Maswaniso a fa likepe 7]

Kuli mu be ni tabo, mu swanela ku ifepa ka lico za kwa moya ze mu tokwa