Tapelo ya Mulena Se I Talusa ku Mina

TAPELO ya Mulena ka mo ne i fezwi ki Jesu Kreste mwa Ngambolo ya fa Lilundu i ñozwi mwa Bibele kwa Mateu kauhanyo 6, litimana 9 ku isa 13. Nakonyana pili a si ka fa kale yona tapelo ye, Jesu n’a bulezi kuli: “Ha mu lapela, mu si ke mwa bulela-bulela sina bahedeni; kakuli ba tumana kuli ba ka utwiwa ka ku bulela hahulu.”—Mateu 6:7.

Kwa iponahaza hande kuli Jesu n’a si ka lela kuli Tapelo ya Mulena i petiwe linzwi ka linzwi. Ki niti kuli n’a kutezi yona tapelo yeo kuli a kone ku tusa baputehi ba bañwi. (Luka 11:2-4) Kono muñolelo wa manzwi a tapelo yeo wa shutana hanyinyani mwa libuka za Evangeli za Mateu ni Luka. Hape, litapelo za Jesu ni za balutiwa ba hae ze ne ba lapezi hasamulaho ne li si ka kumalela kwa manzwi ka sibili a mwa tapelo ya Jesu ye li mutala.

Ki kabakalañi Tapelo ya Mulena ha i ñozwi mwa Bibele? Ka yona tapelo ye li mutala yeo, Jesu u lu luta mo lu swanela ku lapelela kuli litapelo za luna li amuhelwe ki Mulimu. Ku yona tapelo yeo, hape lu fumana likalabo kwa lipuzo za butokwa za mwa bupilo. Kacwalo he, ha lu nyakisiseñi kalulo ni kalulo ya Tapelo ya Mulena.

Ki Lifi Libizo La Mulimu?

“Ndat’a luna ya kwa lihalimu, Libizo la hao a li be le li kenile.” (Mateu 6:9) Ona manzwi a makalelo ao a tapelo ye li mutala a lu tusa ku sutelela ku Mulimu ka ku mu biza “Ndat’a luna.” Sina mwana ka sipepo ha sutelelanga ku mushemi ya lilato ni ya na ni kutwisiso, lwa kona ku atumela Ndat’a luna wa kwa lihalimu inze lu na ni buikolwiso bwa kuli u bata ku lu utwa. Mulena Davida n’a opezi kuli: “Wena ya utwa milapelo, batu kaufela ba ka ta ku Wena.”—Samu 65:2.

Jesu u lu luta ku lapela kuli libizo la Mulimu li keniswe, kamba ku biswa le li kenile. Kono ki  lifi libizo la Mulimu? Bibele i alaba ka manzwi a, a’ li: ‘Ki Yena ye ni sepa, mi ha ni na ku saba se siñwi; kakuli mata a ka, ni muñ’a milumbeko ya ka, ki Muñ’a Bupilo Jehova; ki Yena Mupilisi wa ka.’ (Isaya 12:2) Kana mu kile mwa bala libizo la Jehova mwa Bibele?

Mane, libizo la Mulimu, lona la Jehova, li fumaneha ku fitelela h’a 7,000 mwa miputo ya Bibele ya kwaikale. Niteñi, batoloki ba bañwi mane ba zwisize lona libizo leo mwa litoloko za bona za Bibele. Kacwalo, ka swanelo lu lapela ku Mubupi wa luna kuli a kenise libizo la hae, kamba ku li eza le li kenile. (Ezekiele 36:23) Nzila ye ñwi ye lu kona ku pila ka ku ya ka yona tapelo ye ki ka ku itusisa libizo la Jehova ha lu lapela ku Mulimu.

Musali ya bizwa Patricia n’a hulezi mwa Katolika mi n’a tekelezi hande Tapelo ya Mulena. N’a ezizeñi muta yo muñwi wa Lipaki za Jehova n’a mu bonisize libizo la Mulimu mwa Bibele? U bulela kuli, “Ne ni si ka lumela! Kacwalo kiha ni apula Bibele ya ka, mi ni mwa Bibele ya ka ne li li teñi. Cwale Paki a ni bonisa Mateu 6:9, 10 ni ku talusa kuli libizo la Mulimu li amilwe mwa Tapelo ya Mulena. Ne ni tabile hahulu mi na mu kupa kuli a itute Bibele ni na.”

Se Si Latwa Ki Mulimu Si Ezwe Mwa Lifasi

“Ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu.” (Mateu 6:10) Kalulo ye ya tapelo ya Jesu ye li mutala i kona ku talelezwa cwañi? Batu ba bañata ba nahana kuli lihalimu ki sibaka sa kozo ni mbombolelwa. Mañolo a bulela kuli lihalimu ki ‘sibaka se si kenile, se si liseli’ sa Jehova. (Isaya 63:15) Ki ka lona libaka leo ha lu lapela kuli se si latwa ki Mulimu si ezwe mwa lifasi “mo si ezezwa kwa lihalimu”! Kono kana nto yeo i ka ezahala?

Daniele mupolofita wa Jehova n’a sinuzi kuli: “Mulimu wa mwa lihalimu u ka tahisa mubuso o si na ku sinyeha ku ya ku ile; mi bulena bwa ona ha bu na ku shimbulukela kwa sicaba si sili. Mubuso wo, u ka ketula ni ku feza mibuso [ya lifasi] kaufela; kono ona u ka ba teñi kamita ni ku ya ku ile.” (Daniele 2:44) Ona Mubuso kamba mulonga wa kwa lihalimu wo, u tuha u nga muhato wa ku tisa kozo mwa lifasi kamukana ka puso ye lukile.—2 Pitrosi 3:13.

Ku lapelela Mubuso wa Mulimu kuli u tahe ni kuli tato ya hae i ezwe mwa lifasi ku bonisa tumelo ye si ke ya tisa maswabi. Muapositola wa Sikreste Joani n’a ñozi kuli: “Na utwa linzwi  le lituna le li zwa mwa Lubona, li li: Mu bone Tabernakele ya Mulimu, i inzi ni batu; U ka yaha ni bona, ba be macaba a hae; mi Mulimu u ka ba ni bona, Yena luli, ibe Mulimu wa bona; mi u ka takula miyoko kaufela kwa meto a bona; mi lifu ha li sa na ku ba teñi; nihaiba ku tahelwa ki maswabi ni ku lila, ni ku utwa butuku; kakuli za pili li felile.” Mi Joani a zwelapili kuli: ‘Cwale Ya inzi mwa Lubona a li: Ñola; kakuli manzwi ao a sepahala, ki a niti.’—Sinulo 21:3-5.

Ku Lapelela Lika Ze Lu Tokwa

Ka ku ya ka za n’a bulezi mwa tapelo ye li mutala, Jesu n’a bonisize kuli nto ya butokwa ha lu lapela i swanela ku ba libizo la Mulimu ni tato ya hae. Niteñi, tapelo yeo ye li mutala i zwelapili ku bulela za likupo za ka butu ze fitiswa hande ku Jehova.

Ya pili kwa likupo zeo ki ye li: “U lu fe kacenu buhobe bwa luna, mo u lu felanga ka zazi ni zazi.” (Mateu 6:11) Ye haki kupo ya ku bata sifumu. Jesu n’a lu susueza ku lapelela “buhobe bwa luna bo bu likana ka zazi ni zazi.” (Luka 11:3) Mi ku likana ni Tapelo yeo ya Mulena, lwa kona ku lapela ka tumelo kuli Mulimu a lu fe ze lu tokwa ka zazi haiba lwa mu lata ni ku mu utwa.

Lipilaelo ze sa swaneli ka za butata bwa za mali za kona ku lu tahiseza ku keshebisa butokwi bwa luna bwa ku eza lika za kwa moya mi kacwalo ni ku palelwa ku eza zeo Mulimu a tokwa ku luna. Haiba lu beya za bulapeli bwa Mulimu mwa sibaka sa pili mwa bupilo, lwa kona ku ba ni buikolwiso bwa kuli likupo za luna za lika ze lu tokwa, ze cwale ka lico ni litino, li ka utwiwa. Jesu n’a ize: “Mu bate pili mubuso wa Mulimu ni Ku Luka kwa Hae, mi linto zeo kamukana mu ka li ekelezwa kwateñi.” (Mateu 6:26-33) Ku bata ku luka kwa Mulimu haki nto ye bunolo, bakeñisa kuli kaufela luna lu baeza libi mi lu tokwa ku swalelwa. (Maroma 5:12) Tapelo ya Mulena i bulela ni za yona taba yeo.

Ku Lapelela ku Swalelwa

“U lu swalele milatu ya luna, mo lu swalelela ni luna ba ba lu foselize.” (Mateu 6:12) Mwa Tapelo ya Mulena ye ñozwi ki Luka, “milatu” ye bulelwa f’o, i bulelwa kuli ki “libi.” (Luka 11:4) Kana Jehova Mulimu luli u ka swalela libi za luna?

Nihaike kuli Mulena Davida wa Isilaele ya kwaikale n’a ezize libi ze tuna, n’a bakile mi ka buikolwiso n’a lapezi kuli: ‘Kakuli Wena Muñ’a Bupilo u na ni musa, mi wa lata ku swalela, mi u shemuba hahulu kaufela ba ba ku lapela.’ (Samu 86:5) Yeo ki taba ye omba-omba hakalo! Ndat’a luna wa kwa lihalimu wa “lata ku swalela” ba ba bakile ba ba biza ku yena. Sina milatu ha i konwa ku feliswa, ni Jehova Mulimu wa kona ku swalela libi za luna ka ku tala.

Nihakulicwalo, Jesu n’a bulezi nto ye lu swanela ku eza kuli lu kone ku swalelwa: Kuli lu swalelwe ki Mulimu, ni luna lu lukela ku swalela ba bañwi. (Mateu 6:14, 15) Nihaike kuli mutu ya lukile Jobo n’a nyandisizwe ki balikani ba hae ba balalu, n’a ba swalezi mi mane n’a ba lapelezi. (Jobo 42:10) Haiba lu swalela ba ba lu foseza, lu ka tabisa Mulimu mi lu ka tusiwa ki sishemo sa hae.

Bakeñisa kuli Mulimu wa lata ku utwa likupo za luna, lu swanela ku bata ku mu tabisa. Mi lwa kona ku mu tabisa ku si na taba kuli ha lu si ka petahala. (Mateu 26:41) Mi ni fona f’o, Jehova wa kona ku lu tusa, sina ka mwa n’a boniselize Jesu ka ku ungula tapelo ye li mutala ka kupo ya butokwa hahulu.

Ku Lapelela Tuso ya ku Eza Ze Lukile

“U si ke wa lu kenya mwa muliko, kono u lu lamulele ku ya maswe.” (Mateu 6:13) Jehova h’a lu yubeki kuli lu tulwe ki miliko kamba ku lu tuhelela kuli lu bitiwe ki sibi. Linzwi la hae li li: “Mulimu h’a koni ku likwa ki bumaswe, mi h’a liki mutu.” (Jakobo 1:13) Mulimu wa lu tuhelelanga kuli lu likiwe, kono wa kona ku lu lamulela ku Muliki yo Mutuna—yena “ya maswe” ya bizwa Satani Diabulosi.

Muapositola Pitrosi n’a elelize Bakreste ka yena kuli: “Mu n’o iswala, mu libelele. Diabulosi, sila sa mina u nz’a zamaya sina tau ye lila ye bata ye i ka ca.” (1 Pitrosi 5:8) Mane Satani  n’a likile nihaiba mutu ya petehile Jesu Kreste! Ki ufi o n’o li mulelo wa Diabulosi? N’a bata ku zwisa Jesu mwa bulapeli bwa niti bwa Jehova Mulimu. (Mateu 4:1-11) Haiba mu bata ku sebeleza Mulimu, mulelo wa Satani ki ku bata ku mi ca ni mina!

Ka ku itusisa lifasi le li lapalalezi mwatas’a hae, Diabulosi wa kona ku lu lika kuli lu eze likezo za nyaza Mulimu. (1 Joani 5:19) Kacwalo ki kwa butokwa hahulu kuli kamita lu bate tuso ya Mulimu, sihulu haiba lu talimani ni miliko ye sa feli. Mi haiba lu sebeleza Jehova ka ku ya ka Linzwi la hae le li tahile ka moya, yona Bibele, u ka lu sileleza ka ku lu tusa ku hanyeza Diabulosi. Bibele i lu taluseza kuli: “Mulimu wa sepahala, mi h’a na ku lumela kuli mu likwe ki ze mi fita.”—1 Makorinte 10:13.

Tumelo ku Mulimu Ki Ya Butokwa

Kwa tabisa hakalo ku ziba kuli Ndat’a luna wa kwa lihalimu u tabela mañi ni mañi wa luna! Mane n’a tahisize kuli Mwan’a hae, Jesu Kreste, a lu lute mo lu swanela ku lapelela. Ka niti luli nto yeo i lu susueza ku tabisa Jehova Mulimu. Lu kona ku tabisa cwañi Mulimu?

Bibele i bulela kuli: “Kwand’a tumelo mutu h’a koni ku tabelwa ki [Mulimu]; kakuli ya taha ku Mulimu u swanezi ku lumela kuli Mulimu u teñi, ni kuli ki Yena ya fa ba ba mu bata mupuzo.” (Maheberu 11:6) Lu kona ku ba cwañi ni tumelo ye cwalo? Bibele i li, “Tumelo i zwa kwa ku utwa.” (Maroma 10:17) Lipaki za Jehova ba tabela hahulu ku ambola litaba za Mañolo ni bote ba ba nyolelwa ku sebeleza Mulimu ka tumelo ya niti.

Lu kolwa kuli nyakisiso ye ya Tapelo ya Mulena i tungisize zibo ya mina ka za taluso ya yona. Ka ku ipumanela zibo ye ñwi hape ka za Jehova ni ka za mipuzo ya hae ku “ba ba mu bata,” mwa kona ku tiisa tumelo ya mina ku Mulimu. Haike mu itute ze ñata ka za Mulimu ni milelo ya hae kuli mu kone ku ikola silikani se situna ni Ndat’a mina wa kwa lihalimu kamita ni ku ya ku ile.—Joani 17:3.

[Manzwi a fa likepe 5]

“Ndat’a luna ya kwa lihalimu, Libizo la hao a li be le li kenile; ku tahe mubuso wa hao; se si latwa ki Wena si ezwe mwa lifasi, mo si ezezwa kwa lihalimu; u lu fe kacenu buhobe bwa luna, mo u lu felanga ka zazi ni zazi; u lu swalele milatu ya luna, mo lu swalelela ni luna ba ba lu foselize; u si ke wa lu kenya mwa muliko, kono u lu lamulele ku ya maswe.”—Mateu 6:9-13

[Siswaniso se si fa likepe 7]

Jehova u fa ba ba mu lata ze ba tokwa

[Siswaniso se si fa likepe 7]

Mulimu hape u lu tusa ku hanyeza Diabulosi

[Siswaniso se si fa likepe 7]

Haiba ka ku swana ni Jobo, lu swalela ba ba lu foseza, lu ka tusiwa ki sishemo sa Mulimu