Haki Nako Fela ya ku Sinya

BANANA ba lata ku bapala. Kono sina mo i taluseza buka ye bizwa The Developing Child, “lipapali zeo haki nako fela ya ku sinya. Ku bonahala kuli lipapali li tusa hahulu banana ku twaela silalanda sa bona.” Mwa lipapali, banana ba ituta ku itusisa ngana ya bona, ku twaela silalanda sa bona, ni ku utwana ni ba bañwi.

Ha se ba li ba lilimo z’e ne kamba ze ketalizoho, banana ba kalanga ku likanyisa ba bahulu mwa lipapali za bona. Jesu ka nako ye ñwi n’a bulezi ka za banana ha ba bapala. Ba bañwi ku bona ne ba bata papali ya “sinawenga,” ba bañwi hape ne ba bata papali ya “maswabi,” mi sina mo ku belanga kwa banana, ba kala ku kananisana kabakala kuli ba bañwi ne ba sa lati ku bapala. (Mateu 11:16, 17) Lipapali za mufuta o cwalo li tusa mwanana ya s’a hula ku ituta misebezi ya butokwa.

Banana ba ba bonisizwe mwa maswaniso a’ fa likepe le, ba likanyisa muluti wa Bibele ni muituti. Haki kuli ba eza tuto ya luli, kono kwa bonahala luli kuli ba nahana za ku taluseza ba bañwi lushango lwa mwa Bibele. Mi yeo ki tuto ya butokwa hahulu, kakuli Jesu n’a laezi balateleli ba hae kaufela kuli ba tahise balutiwa ni ku ba luta ku mamela lika kaufela za n’a ba lutile.—Mateu 28:19, 20.

Bashemi ba ba na ni bana ba ba lata ku bapala lipapali za ku zamaisa lituto za Bibele, ku fa lingambolo, kamba ku kutaza fa ndu ni ndu, ba swanela ku ba ba ba tabile. Kamita, banana ba likanyisanga ze ba bona ba bahulu ba eza. Lipapali za bona ze tomile fa litaba za mwa Bibele li bonisa kuli ba hulisizwe ka “tuto ya Mulena.”—Maefese 6:4.

Jehova u bata kuli banana ba abane mwa bulapeli bwa niti. N’a bulelezi Mushe kuli “bana” ni bona ba fumanehange teñi Mulao ha ne u baliwa. (Deuteronoma 31:12) Haiba banana ba abana mwa bulapeli bwa niti, lipapali za bona ni zona li ka bonisa cwalo. Mi mwanana ya bapala ka ku likanyisa sikombwa sa Mulimu u nga muhato wa pili o libisa kwa ku ba sikombwa.