Lipuzo Ze Zwa kwa Babali

Muapositola Joani ha n’a ñozi kuli “lilato le li petehile li leleka sabo,” n’a talusañi ka ku bulela kuli “lilato le li petehile,” mi ki “sabo” mañi ye lelekwa cwalo?

Muapositola Joani n’a ñozi kuli: “Ha ku na sabo mwa lilato, kono lilato le li petehile li leleka sabo; kakuli sabo i supa koto; mi ya saba h’a si ka ezwa kale ya petehile mwa lilato.”—1 Joani 4:18.

Taba mo a bulezwi manzwi ao i bonisa kuli Joani n’a ambola za ku bulela ka ku lukuluha—sihulu ka za swalisano ye mwahal’a ku lata Mulimu ni ku bulela ku Yena ka ku lukuluha. Sisupo seo si boniswa ki ze lu bala mwa timana 17 kuli: ‘Lilato li petahala ku luna, kuli lu be ni [tukuluho ya ku bulela, NW] mwa lizazi la Katulo.’ Lilato leo Mukreste a lata Mulimu ka lona ni ku ikutwa kuli Mulimu wa mu lata li ama hahulu ku bulela kwa hae ka ku lukuluha—kamba ka ku sa lukuluha—h’a lapela ku Mulimu.

Pulelo ya “lilato le li petehile” i na ni taluso ye tuna. Ka mo li itusiselizwe mwa Bibele, fokuñwi linzwi la ku ‘petahala’ ha li talusi ku petahala luli ka ku tala, kono hañata li talusanga ku petahala fela ka mo ku konahalela. Ka mutala, mwa Ngambolo ya hae ya fa Lilundu, Jesu n’a ize: “Mu be ba ba petehile, sina Ndat’a mina ya kwa lihalimu h’a li Ya petehile.” Jesu n’a bulelela balateleli ba hae kuli ha ne ba ka lata fela ba ba ba lata, lilato la bona ne li si ke la ba le li kwanile, ne li ka ba le li tokwile nto ye ñwi, mi ne li si ke la ba le li kondile. Ne ba swanela ku petahalisa, kamba ku taleleza lilato la bona ka ku lata nihaiba lila za bona. Kacwalo, ka nzila ye swana, Joani ha n’a ñozi ka za “lilato le li petehile,” n’a bulela za lilato la ku lata Mulimu ka pilu kaufela, le li hulisizwe ka ku tala, le li kopanyeleza likalulo kaufela za bupilo bwa mutu.—Mateu 5:46-48; 19:20, 21.

H’a lapela ku Mulimu, Mukreste wa ziba hande kuli ki muezalibi mi h’a si ka petahala. Kono haiba lilato la hae ku Mulimu ni maikuto a hae a kuli Mulimu wa mu lata li hulisizwe ka ku tala, h’a na ku filikanyiwa ki sabo ya kuli wa nyazahala kamba kuli u hanilwe. Kono u bulela ze mwa pilu ya hae ni ku kupa swalelo ka ku lukuluha, ka ku itinga fa sitabelo sa tiululo seo Mulimu ka lilato a file ka Jesu Kreste. U kolwa kuli Mulimu wa utwa likupo za hae.

Mutu u kona cwañi ku ‘ezwa ya petehile mwa lilato,’ mi kacwalo ili ku “leleka” sabo ya ku ikutwa ku nyazahala kamba ku ba ya hanilwe? Muapositola Joani n’a ize: “Ya mamela Linzwi la hae [Mulimu], lilato la Mulimu li petehile luli ku yena.” (1 Joani 2:5) Mu nahane kuli: Haiba Mulimu u lu latile lu sa li baezalibi, kana n’a si ke a lu lata hahulu ni ku fita haiba lu baka h’a buniti ni ku lika ka t’ata ku “mamela Linzwi la hae”? (Maroma 5:8; 1 Joani 4:10) Luli, ibile fela lwa zwelapili ku sepahala, lwa kona ku ba ni buikolwiso bo bu swana ni bwa n’a na ni muapositola Paulusi ha n’a bulezi ka za Mulimu kuli: “Yena ya si ka katwa Mwan’a hae tota, kono a lu fa yena, kaufel’a luna, u ka eza cwañi, kana a si ke a lu fa ni linto kaufela hamoho ni yena?”—Maroma 8:32.