Moya wa Mina wa ku Libelela Ki O Cwañi?

MWA lifasi la kacenu, haki batu ba bañata ba ba tabela ku libelela mutu yo muñwi kamba sika se siñwi. Ha ba na pilu-telele. Nihakulicwalo, Mañolo a susueza batu ba Mulimu ku ba ni moya wa ku ‘libelela.’ Ka ku shutana ni batu ba n’a pila ni bona, mupolofita Mika n’a ize: “Ni ka talima ku [Muñ’a] Bupilo, ni libelele Mulimu ya ni pilisa.”—Mika 7:7; Malilo 3:26.

Kono, ku libelela Jehova ku talusañi? Mukreste u swanela ku libelela cwañi Mulimu? Kana ku na ni linzila ze lukile ni ze fosahezi za ku eza cwalo? Ze n’e ezahezi ku mupolofita Jonasi wa mwa lilimo za ma-800 B.C.E. li lu fa tuto fa taba yeo.

Ku Libelela Ko Ku Fosahezi

Jehova Mulimu n’a laezi Jonasi ku yo kutaza kwa batu ba Ninive, munzi o n’o li o mutuna mwa Mubuso wa Asirya. Ninive n’e zibahala ka ku ba “munzi wa mali” bakeñisa likezo ze situhu hahulu, ili taba ye pakilwe hande ki bocaziba ba litaba za kwakale ni ba lika ze pumbuzwi. (Nahumi 3:1) Lwa pili Jonasi n’a likile ku mata musebezi w’o, kono Jehova n’a boni teñi kuli mupolofita kwa mafelelezo n’a ile kwa Ninive.—Jonasi 1:3–3:2.

“Jonasi a kala ku kena mwa munzi, a eza musipili wa lizazi li li liñwi inz’a huweleza, a li: Ku sa na ni mazazi a mashumi a mane, mi Ninive u ka feliswa!” (Jonasi 3:4) Ze n’e zwile mwa buikatazo bwa Jonasi ne li ze tuna luli: “Batu ba mwa Ninive ba lumela ku Mulimu, mane ba toma lizazi la ku itima lico, ba apala masila a masaka, ku kala ka yo muhulu wa bona ku isa ku yo munyinyani.” (Jonasi 3:5) Kacwalo, Jehova, Mulimu ya ‘sa lati ba bañwi ha ba timela, kono ya bata kuli kaufela ba bake,’ a swalela muleñeñi w’o.—2 Pitrosi 3:9.

Jonasi n’a ikutwile cwañi? Taba ya mwa Bibele i li: “Kono taba yeo ya swabisa Jonasi hahulu, a nyema mo ku maswe.” (Jonasi 4:1) Kabakalañi? Mwendi Jonasi n’a ikutwile kuli ku sa talelezwa kwa mushaa wa hae wa sinyeho ka nako ye n’e tomilwe ne ku ka mu tahiseza kashwau ka ku ba mupolofita. Ku bonahala kuli n’a kalile ku bilaela hahulu ka za libubo la hae ku fita ku ba ni sishemo ni ku iyakatwa za puluso ya ba bañwi.

Ki niti kuli Jonasi n’a si ka tuhela musebezi wa hae wa bupolofita. Niteñi, n’a libelezi “kuli a bone se si ka tahela munzi.” Ee, n’a kenezwi ki moya wa ku bilaela, ku tuhela ku sebeza ni ku libelela kuli a bone ze n’e ka ezahala. Ha n’a boni kuli ne ku si ka ezahala ka mwa n’a libelelezi, a ikahela munganda ni ku ina mwa muluti mi a libelela ka maswabi kuli  a bone se ne si ka ezahala. Kono Jehova n’a si ka nga moya wa Jonasi ku ba o lukile, kacwalo ka lilato a sikulula mubonelo o n’o fosahezi wa mupolofita wa hae.—Jonasi 4:5, 9-11.

Libaka Jehova H’a Na ni Pilu-Telele

Nihaike kuli Ninive ne i bakile ni ku swalelwa, ne i kutezi mwa mikwa ya yona ye maswe hasamulaho. Ka mupolofita Nahumi ni mupolofita Zefania, Jehova n’a polofitile ka za sinyeho ya yona. Ka za “munzi wa mali,” Jehova n’a zibahalize kuli n’a ka sinya Asirya ni ku fetula Ninive ku ba matota. (Nahumi 3:1; Zefania 2:13) Ka 632 B.C.E., Ninive ne i sinyizwe mi ne i si ke ya yahiwa sinca ni kamuta.

Ka ku swana, lifasi kacenu li na ni mulatu o fitela kwahule wa Ninive wa ikale wa ku sulula mali a mañata. Ka lona libaka leo ni mabaka a mañwi, Jehova u atuzi kuli muinelo wa linto o maswe wa cwale u ka sinyiwa “ñalelwa ye tuna” ka ku fitisisa ha i ka taha.—Mateu 24:21, 22.

Niteñi, Jehova u tibezi sinyeho ye sepisizwe yeo ilikuli batu ba ba na ni niti kacenu, ba ba swana ni be ne ba bakile mwa Ninive, ba kone ku baka ni ku swalelwa. Muapositola Pitrosi u bulela cwana ka za pilu-telele ya Mulimu: “Mulena h’a liyehisi lisepiso za hae, mo ba hupulela ba bañwi kuli ki ku liyeha; kono u isa nako kwapili kabakala luna; kakuli h’a lati ba bañwi ha ba ka timela, kono u lata kuli kaufela ba kene mwa ku baka.”—2 Pitrosi 3:9, 10, 13.

Ku Libelela ka Nzila Ye Swanela

Pitrosi u zwelapili ku bulela kuli: “Cwale linto zeo kaufela sina ha li na ni ku fela, ni li, mu lukela ku pila ka mizamao ye kenile hahulu, ni ka bulapeli; inze mu libelezi ni ku akufisa lizazi la Mulimu.” (2 Pitrosi 3:11, 12) Mu lemuhe kuli ha lu nze lu libelezi lizazi la Jehova, lu swanela ku bonisa ‘mizamao ye kenile hahulu, ni bulapeli’—se si tokwahala ki ku sebeza, isi ku ina fela.

Kaniti, ku ba ni moya wa ku libelela o swanela ku bonisa kuli lu na ni buikolwiso bwa kuli lizazi la Jehova ha li na ku liyeha ni hanyinyani. Tumelo ye cwalo i tahisa ku ba ni mizamao y’e kenile ni likezo za bulapeli, mi kezo ya butokwa hahulu ki ku kutaza taba ye nde ya Mubuso wa Mulimu. Jesu n’a file mutala o munde wa ku kutaza, mi n’a laezi balateleli ba hae ba ba tozizwe kuli: “Mateka a mina a tamwe, mi malambi a mina a tuke. Ni mina mu swane sina batu ba ba libelezi mulen’a bona, kuli u ka kuta lili kwa linyalo; kuli h’a fita, a ngongota, ba mu kwalulele kapili. Mbuyoti ki ya batanga bao mulena h’a fita, a ka ba fumana ba tona.”—Luka 12:35-37.

Batanga ba mwa lilimo za kwa makalelo a Bukreste ne ba ‘itama mwa teka’ ka ku shuña mikanjo ya mwahali ili ku itukiseza ku eza musebezi o n’o tokwa m’ata. Kacwalo, Mukreste u swanela ku ba wa miswalo, ili ya tukufalelwa mwa misebezi ye minde. U swanela ku hana mukwa ufi kamba ufi wa ku ku “fokola” mwa misebezi ya kwa moya, mwendi ili ka ku libisa m’ata a hae kwa minyaka kamba kwa ku  bata sifumu. Kono u swanela ku ba ni “ze ñata za ku eza mwa musebezi wa Mulena” h’a nze a libelela lizazi le li tuna le li sabisa la Jehova.—Maroma 12:11; 1 Makorinte 15:58.

Ku Pateha Ha Lu Nze Lu Libelela

Lipaki za Jehova ba zwezipili ku pateha ha ba nze ba libelela lizazi la Jehova. Ka mutala, mwa silimo sa sebelezo sa 2003, ka avaregi ne ba tandile lihora ze 3,383,000 ka zazi ba nze ba kutaza linzwi la Jehova. Mu nahane kuli ne ku ka ngela Paki a li muñwi lilimo ze 386 za ku paka a sa tuheli kuli a kone ku peta ze n’e ezizwe mwa lizazi li li liñwi!

Nihakulicwalo, lu ipuzeñi kuli, ‘Moya wa ku libelela o ni na ni ona ki o cwañi?’ Jesu n’a file nguli ye bonisa kuli Bakreste ba ba tozizwe ba tokwa ku sebeza ka t’ata. N’a bulezi za batanga ba balalu kuli: “[Mulena] a fa yo muñwi litalenta liketalizoho; yo muñwi a mu fa ze peli; yo muñwi i liñwi; a fa yo muñwi ni yo muñwi ka ku likanyeza mata a hae. Kih’a zamaya. Kapili ya n’a ngile litalenta liketalizoho, a y’o [fundota] ka zona, mi a luwa litalenta ze ñwi liketalizoho. Kamukwaocwalo wa litalenta ze peli a y’o luwa ze ñwi ze peli. Kono ya ngile i liñwi a ya, a yepa fafasi, mi a pata mali a mulen’a hae. Ha ku fitile mazazi a mañata mulena wa batanga bao a kuta, mi a tatuba litaba ni bona.”—Mateu 25:15-19.

Kaufela bona batanga ba balalu ba libelela ku kuta kwa mulena. Ba babeli be ne ba patehile ha ne ba nze ba libelela, mulen’a bona ha n’a kutile n’a ba bulelezi kuli: “Ki hande mutanga yo munde, ya sepahala.” Kono ne ku si ka ba cwalo ku ya n’a libelela a si ka pateha. Mulena n’a ize: “Mu mu latele mwa lififi la kwande, ki mo ku na ni lililo ni likwecameno.”—Mateu 25:20-30.

Nihaike kuli nguli ye i ama Bakreste ba ba tozizwe, lwa kona ku ituta se siñwi ku si na taba ni sepo ye lu na ni. Mulena, Jesu Kreste, u bata kuli mañi ni mañi wa luna a sebeze ka t’ata mwa sebelezo ya hae ha lu nze lu libelela ku kuta kwa hae fa lizazi la Jehova le lituna. Wa itebuha musebezi wa yo muñwi ni yo muñwi “ka ku likanyeza mata a hae” ni miinelo ya hae. I ka ba tabo hakalo mafelelezo a ku libelela ha s’a fitile mi Mulena ha k’a lu bulelela kuli “ki hande”!

 Pilu-Telele ya Mulen’a Luna I Tahisa Puluso

Ku cwañi haiba muinelo wa linto w’o se u inzi nako ye telele ku fita mo ne lu nahanela kamba mo ne lu libelelezi? Ku na ni libaka ha ku bile cwalo. Muapositola Pitrosi n’a ñozi kuli: “Mu lemuhe kuli, ku iswala kwa Mulena, ki ku piliswa kwa batu.” (2 Pitrosi 3:15) Zibo ye nepahezi ya mulelo wa Mulimu ni ku itumelela ka buikokobezo kuli se si butokwa hahulu ki ku talelezwa kwa milelo ya Mulimu li ka lu konisa ku ba ni pilu-telele ka ku ya ka nako yeo Jehova a bona kuli wa swanela ku ba ni pilu-telele kwa muinelo wa kale wo.

Kuli a susueze Bakreste kuli ba be ni pilu-telele, Jakobo muñoli wa Bibele n’a itusisize swanisezo. N’a ñozi kuli: “A mu bone, mulimi h’a libelela lukau lwa butokwa lwa lifasi, wa itiisa, mane a tambule pula ya maseulo ni ya matabula. Ni mina mu libelele; mi mu itiise mwa lipilu za mina; kakuli ku taha kwa Mulena ku se ku li fakaufi.”—Jakobo 5:7, 8.

Jehova Mulimu h’a tabeli kuli lu katale kamba ku zwafa ha lu nze lu libelela. U na ni musebezi wa bata kuli lu pete mi w’a tabela ha lu itusisa nako ya ku libelela mwa ku abana ka tukufalelo mwa musebezi w’o. U bata kuli lu be mwahal’a ba n’a bulezi muapositola Paulusi mwa liñolo la hae kwa Maheberu kuli: “Kono lu shukelwa kuli mutu ni mutu ku mina a bonise ku tukufalelwa cwalo, kuli a be ni sepo ye tezi, ku isa kwa mafelelezo. Mu si ke mwa fetuha ba ba buzwa; kono mu likanyise ba ba fumani ku yola lisepiso, ka tumelo ni ka ku itiisa.”—Maheberu 6:11, 12.

Kacwalo lu si ke lwa katala. Kono, haike silikani sa luna sa ka butu ni Jehova Mulimu, tumelo ya luna mwa sitabelo sa tiululo sa Jesu, ni sepo ya luna ye nde ka za nako ya kwapili mwa muinelo wa linto o munca li kone ku ba zona z’e lu tiisa mwa bupilo bwa luna. Sina batanga ‘ba bande, ba ba sepahala’ ba mwa nguli ya Jesu, haike lu bonise kuli lwa swanela ku babazwa ni ku fiwa mupuzo ka ku pateha ku lumbeka Mulimu wa luna, sina mwa n’a ezelize walisamu ya n’a ize: “Ni ka ba ni sepo ka nako ni nako, ni tiiseze mwa ku ku lumbeka.”—Samu 71:14.

[Siswaniso se si fa likepe 21]

Ka ku swaba, Jonasi n’a libelezi kuli a bone se ne si ka tahela Ninive

[Maswaniso a fa likepe 22, 23]

Lu bonise misebezi ya bulapeli ha lu nze lu libelela lizazi la Jehova