Lipuzo Ze Zwa kwa Babali

Jesu ha n’a laezi balutiwa ba hae kuli ‘ba kolotise ba sa tokwi kekelezo, ba sa libeleli ku kutisezwa se siñwi,’ kana f’o n’a talusa kuli ba si ke ba libelela ku kutisezwa nihaiba masheleñi e ne ba kolotisize?

Manzwi a Jesu a ñozwi kwa Luka 6:35 (NW) a kona ku utwisiswa hande ha ne lu ka nyakisisa Mulao wa Mushe ka za seo. Mwa Mulao wa Mushe, Mulimu n’a laezi Maisilaele ku sa bata likekelezo ha ne ba kolotisa mali kwa Maisilaele ba bañwi be ne ba li mwa butokwi. (Exoda 22:25; Livitike 25:35-37; Mateu 5:42) Likoloti zeo ne si za ku ezisa lipisinisi. Kono likoloti ze cwalo ze n’e fiwa ku si na kekelezo ne li felwa ku fukuza kwa bubotana kamba muinelo o muñwi o t’ata. Mane, ku fumanela mali fa butata bwa mutu yo muñwi ya mwa butokwi ne ku si ke kwa ba ko ku lilato. Niteñi, ya n’a kolotisa mali n’a na ni swanelo ya ku kutisezwa mali a n’a kolotisize, mi mane fokuñwi n’a nganga swalele ya ona.—Deuteronoma 15:7, 8.

Niha n’a yemela Mulao, Jesu n’a bonisize kuli u kona ku sebeza ka nzila ye ñwi hape, ka ku bulela kuli ya tusa yo muñwi h’a swaneli ku libelela “ku kutisezwa se siñwi.” Sina Maisilaele, Bakreste fokuñwi ba ipumananga mwa butokwi bwa mali kamba mwa miinelo ye kana ya ba siya mwa bunjebwe. Haiba muzwale wa Sikreste ya mwa butokwi bo bu cwalo a kupa mali, ne ku ka ba hande ha ne lu ka mu tusa. Kaniti, lilato sakata li ka susumeza Mukreste yo muñwi ku tusa muzwale ya ipumani mwa butokwi bwa mali a si ka lela. (Liproverbia 3:27) Mwendi ne ku ka konahala ku fa muzwale ya mwa butokwi yo mpo ya mali niha n’a ka ba a manyinyani kuli a be sina sikoloti.—Samu 37:21.

Mwa linako za baapositola, muapositola Paulusi ni Barnabasi ne ba lumilwe ku shimba lituso ze n’e zwelela kwa Bakreste ba kwa Asia Minor ni ku li iseza mizwale ba bona ba kwa Judea, be ne ba kenezwi ki lukupwe. (Likezo 11:28-30) Ni kacenu, muta ku ba ni kozi, Bakreste hañata ba lumelanga lituso kwa mizwale ba bona ba ba mwa butokwi. Ha ba eza cwalo, hape ba fa bupaki bo bunde ku ba bañwi. (Mateu 5:16) Niteñi, moya ni muinelo wa mutu ya kupa tuso u swanela ku nyakisiswa. Ki kabakalañi h’a li mwa butokwi? Manzwi a Paulusi ki a butokwa a’ li: “Mutu h’a sa lati ku sebeza, hape a si ke a ca.”—2 Matesalonika 3:10.

Haiba muzwale ya bata ku kolota mali ha yo hahulu mwa butokwi kono u bata fela tuso ya ka nakonyana kuli a fumanele fateñi fa ku ituseza, ku kana kwa ba hande ku mu kolotisa mali ku sina ku libelela kekelezo. Mwa miinelo ye cwalo, ne ku si ke kwa ba ku lwanisa manzwi a Jesu a ñozwi kwa Luka 6:35 ha ne lu ka libelela ku kutisezwa mali a kwanile e ne lu kolotisize. Litumelelano li swanela ku ñoliwa, mi ya kolota mali u lukela ku bona teñi kuli wa lika luli ku kutisa mali ao ka ku ya ka tumelelano ye ezizwe. Kaniti, lilato la Sikreste li swanela ku susumeza mukoloti ku kutisa mali a’ kolotile sina lilato h’a ne li susumelize mufani ku a kolotisa.

Mutu ya nahana za ku kolotisa mali (kamba ku fa mpo) u ka tokwa ku bona hape muinelo wa lubasi lwa hae. Ka mutala, kana ku eza cwalo ne ku si ke kwa fokolisa buikoneli bwa hae bwa ku babalela lubasi lwa hae, ili nto ya pili ka ku ya ka Mañolo? (2 Makorinte 8:12; 1 Timotea 5:8) Niteñi, Bakreste ba batanga linzila za ku bonisana lilato, ili ku li bonisa ka likezo ze lumelelana ni likuka za Bibele.—Jakobo 1:27; 1 Joani 3:18; 4:7-11.