Kana Muta O Muñwi Lu Ka Ikola Buiketo Sakata?

KA TABO banana ba bapala ni bashemi ba bona ba ba lilato—ki mañi ya sa tabeli ku buha papali ye cwalo? Banana ba ikutwa ku silelezwa hahulu ha ba inzi ni bashemi ba ba babalela. Niteñi, banana ba bañata haki kamita ba banga ni nako ye cwalo ya tabo. Kono ba bañwi ba bilaelanga ka zazi ni zazi kuli ba ka fumana kai malobalo busihu. Kana banana bao ba ba si na habo bona ni ba bañwi cwalo ba ba sa pili mwa buiketo ba kona ku ba ni sepo luli?

Nako ya kwapili niha ne i ka bonahala ku sabisa, Linzwi la Mulimu li fa sepo. Mupolofita Isaya n’a polofitile kuli lizazi la taha f’o batu kaufela ba ka pila mwa buiketo sakata. N’a ñozi kuli: “Ba ka yaha mandu, ba pile ku ona; ba cale likota za veine mi ba ce ze bewa ki zona. Ha ba na ku ikahela mandu mi ku pile ba sili mwateñi, kamba ku cala likota za veine mi li ciwe ki ba sili.”—Isaya 65:21, 22.

Kono kana sepo yeo i tiile? Puzo yeo ya swanela kakuli linzwi la “sepo” ha li tahisi buikolwiso kamita. Ka mutala, mwa Brazil, mutu hañata u kona ku utwa pulelo ye li: “A esperança é a última que morre.” Pulelo yeo i talusa kuli, “Sepo i banga nto ya mafelelezo ku shwa.” Seo si talusa kuli batu ba bañata ba tundamenanga ku ba ni sepo niha ku si na mutomo sakata wa sepo. Kono sepo ya lu file Mulimu ya pila ya fapahana. Muapositola Paulusi n’a ñozi kuli: “Mutu ni mutu ya lumela ku Yena, h’a na ku swaba.” (Maroma 10:11) Bupolofita bwa Bibele bo se bu talelelizwe bu lu fa sepo ya kuli lisepiso kaufela za sepisize Jehova Mulimu li ka talelezwa ni zona. Lisepiso zeo ha li ka talelezwa, miinelo ye hapeleza banana ku pila mwa makululu i ka ba nto ya kwamulaho.

Nihaiba kacenu kelezo ye tusa ye mwa Bibele ya kona ku tusa ba ba sina sepo ku kondolokisa bupilo bwa bona ni ku fumana buiketo sakata. Seo si konahala cwañi? Lipaki za Jehova mwa silalanda sa mina ba ka tabela ku mi tusa ku ziba kalabo ya puzo yeo.