Seo Buikokobezo bwa Jehova Bu Talusa ku Luna

DAVIDA ne li mutu ya n’a twaelani ni matata. N’a nyandisizwe ki Mulena Saule, mukwenyan’a hae ya muna. Saule n’a likile ku bulaya Davida halalu ka lilumo mi n’a tundamezi ku mu zuma ka lilimo-limo, ili ku mu tahiseza kuli a be mubalehi. (1 Samuele 18:11; 19:10; 26:20) Niteñi, Jehova n’a tiisize Davida. Jehova n’a mu lamulezi ku Saule ni kwa lila ze ñwi. Kacwalo lwa kona ku utwisisa maikuto a Davida a bonisizwe mwa pina ye li: “[Muñ’a] Bupilo ki licwe la ka, ki sisabelo sa ka, ni mulamuleli wa ka, wa ka luli. Ku pilisa kwa hao [Jehova], ki yona tebe y’o ni file, mi [buikokobezo bwa hao, ki bona bo bu ni ezize yo mutuna, NW].” (2 Samuele 22:2, 36) Davida n’a fitile fa ku ba yo mutuna mwa Isilaele. Kacwalo, buikokobezo bwa Jehova ne bu amilwe cwañi?

Mañolo ha bulela kuli Jehova u na ni buikokobezo, ha talusi kuli ku na ni ze mu fita kwa m’ata ka nzila ye ñwi kamba kuli wa ipeya kwatas’a ba bañwi. Kono kalemeno kao ka kande ka bonisa kuli u na ni hahulu mufelañeke kwa batu ba ba lika ka t’ata luli ku fumana tumelezo ya hae mi kacwalo u bonisa sishemo ku bona. Kwa Samu 113:6, 7, lu bala kuli: “[Jehova] u inamela ku ukumela ze mwa lihalimu ni lifasi? Ya maibile, u mu zwisa mwa liluli.” “Ku ukumela” kwa hae ku talusa kuli “u inamela fafasi kuli a bone” kamba kuli “wa ikokobeza kuli a talime.” (Today’s English Version; Young’s Literal Translation of the Holy Bible) Kacwalo Jehova ka sibili n’a ‘inami’ kamba ‘n’a ikokobelize,’ ku zwelela kwa lihalimu, kuli a ise mamelelo ku Davida, mutu ya si ka petahala kono ili ya ikokobeza ya n’a itakaleza ku sebeleza Mulimu. Kacwalo, Davida u lu kolwisa kuli: “[Muñ’a] Bupilo ki Ya pahami; nihakulicwalo u bona ba ba ishuwa.” (Samu 138:6) Jehova ka mwa n’a sebelisanezi ni Davida ka makeke, pilu-telele, ni mufelañeke ku swanela ku susueza batu kaufela ba ba bata ku eza tato ya Mulimu.

Nihaike kuli Jehova ka ku ba Mubusi ki yo mutuna ka ku fitisisa mwa pupo kaufela, u tabela ku sebelisana ni mañi ni mañi wa luna. Seo si lu fa buikolwiso bwa ku itinga fa tuso ya hae ye sa kuyuki nihaiba mwa miinelo ye t’ata hahulu. Ha ku na libaka la ku saba kuli u ka lu  libala. Ka za sicaba sa hae sa Isilaele wa kwaikale, Jehova u bulelwa ka ku nepahala kuli: “Ki Yena ya [ba] hupuzi mwa ku shubuka kwa [bona], kakuli sishemo sa hae ki sa kamita.”—Samu 136:23.

Ka ku ba batanga ba Jehova ba cwale, lu kana lwa ba mwa likayamana sina Davida. Mwendi lu sheununwa ki batu ba ba sa zibi Mulimu, kamba mwendi lu katazwa ki mapongo kamba lu tomohile pilu bakeñisa ku shwelwa. Ku sina taba ni miinelo ya luna, haiba pilu ya luna ki ye buniti, lwa kona ku atumela Jehova ka tapelo, ku kupa sishemo sa hae. Jehova u ka “ukumela” ku lu isa mamelelo ni ku teeleza kwa litapelo za luna. Walisamu ka ketelelo ya moya wa Mulimu n’a ñozi kuli: “Meto a [Muñ’a] Bupilo a talimile ba ba na ni niti, mi lizebe za hae li teeleza mihuwo ya bona.” (Samu 34:15) Ha mu nahanisisa kalemeno ka kande ka Jehova ka buikokobezo, kana ha mu susuezwi?

[Maswaniso a fa likepe 30]

Sina mwa n’a utwezi litapelo za Davida, Jehova u nyolelwa ku utwa litapelo za luna kacenu