Kana Mu Bata ku Pila ku Ya Ku Ile?

“HA NI sabi ku shwa. Kono ni utwanga butuku kwa pilu kuli nako ye ñwi ni kabe ni siile mapalisa a.” Cwalo kona mwa n’a bulelezi musali yo muñwi wa musupali wa kwa Japan. Sikombwa wa Mukreste ya n’a mu potezi n’a utwisisize libaka musali y’o ha n’a ikutwa cwalo, kakuli musali y’o n’a na ni simu ye nde. Ba bañata ba ba ikutwa kuli ha ba sabi ku shwa ba itebuha luli pupo ye komokisa mi mane ba kana ba tabela ku pila ku ya ku ile.

Ku pila ku ya ku ile? Ba bañata ba kana ba hana muhupulo wo. Ba bañwi mane ba kana ba bulela kuli ha ba tabeli ku pila ku ya ku ile. Ki kabakalañi mutu ha kona ku ikutwa cwalo?

 Kana Bupilo bwa Kamita Bu ka Nyikwisa?

Ba bañwi ba ikutwa kuli ku pila ku ya ku ile ku ka nyikwisa. Ba kana ba bulela za bupilo bo bu nyikwisa bo ba pila batu ba ba tuhezi musebezi ba ba si na hande za ku eza kwand’a ku buha fela TV. Haiba kona mo mu ikutwela cwalo, mu bone sa n’a bulezi Robert Jastrow, muituti wa za mwa mbyumbyulu ha n’a buzizwe za haiba bupilo bo bu sa feli ne bu ka ba mpo kamba koto. Jastrow n’a alabile kuli: “I ka ba mpo ku ba ba na ni takazo ya ku ituta ka nako kaufela. Muhupulo wa kuli ba ka ba ni nako ya ku ituta ku ya ku ile u ka ba tabisa hahulu. Kono ku ba ba ikutwa kuli ze ba itutile li likani mi ili ba ba si ke ba tabela ku ituta se siñwi, bupilo bwa kamita bu ka nyikwisa luli. Ha ba na ku ziba mwa ku itusiseza nako ya bona.”

Ka za haiba bupilo bo bu sa feli bu ka ba bo bu tabisa kamba ku nyikwisa, ku itingile ku mina. Haiba mu na ni ‘takazo ya ku ituta ka nako kaufela,’ mu nahane ze mu kona ku eza mwa lika ze cwale ka ku swanisa, ku opela, ku yaha, ku lima, kamba mwa nto ye ñwi cwalo ye mu tabela ku eza. Bupilo bo bu sa feli fa lifasi-mubu bu ka mi fa kolo ya ku hulisa buikoneli bwa mina mwa lika ze fitana-fitana ze mu tabela.

Ku bonisa lilato ni ku latiwa ki ba bañwi kamita ku ka bisa bupilo bo bu sa feli ku ba bo bu tabisa luli. Lu na ni buikoneli bwa ka sipepo bwa ku bonisa lilato, mi lwa kondisanga lika haiba lu ikutwa kuli lwa latiwa. Ku bonisana lilato la luli ku tahisa tabo ye sa koni ku fela. Ku pila ku ya ku ile ku ka lu fa kolo isi fela ya ku hulisa lilato la ku lata batu ba bañwi kono sihulu la ku lata Mulimu. Muapositola Paulusi n’a ize: “Mutu h’a lata Mulimu, ki yena ya zibwa ki Mulimu.” (1 Makorinte 8:⁠3) Ki tohonolo kwa butuna​—ku ziba ni ku zibwa ki Mubusi wa pupo kamukana! Mi mane, ku ituta ka za Mubupi wa luna ya lilato ha ku na ku fela. Kacwalo he, bupilo bo bu sa feli bu kona ku nyikwisa kamukwaufi?

Kana Bupilo Bu Munati Ha Bu Li Bo Bu Kuswani?

Ba bañwi ba nga kuli bupilo ha bu li bo bu kuswani kona bu ba munati. Ba kana ba bapanya bupilo kwa gauda, ye fumaneha fela ka bunyinyani. Ba bulela kuli gauda ha ne i ka fumaneha kai ni kai, ne i si ke ya ngiwa ku ba ya butokwa hahulu. Nihakulicwalo, gauda ne i ka zwelapili ku ba ye kateleha. Kaniti, ni bupilo bu ka zwelapili ku ba bo bu munati.

Lu kana lwa bapanya ku ikola bupilo kwa ku ba ni moya o muñata. Bafuluhi ba ba  mwa sisepe se si tibile ba nga moya ku ba wa butokwa hahulu. Ha se ba yangwezwi, kana mu hupula kuli ne ba ka tongoka ku ba ni moya o muñata hape? Kutokwa ni hanyinyani!

Sina bafuluhi bao, lwa kona ku yangwelwa ni ku ba ni sepo ye tuna ni ku fita ya bupilo bo bu sa feli. Muapositola Paulusi n’a ñozi kuli: “Mupuzo wa sibi ki lifu; kono mpo ya sishemo sa Mulimu ki bupilo bo bu sa feli ka Jesu Kreste Mulen’a luna.” (Maroma 6:23) Ka sitabelo sa tiululo sa Jesu, Mulimu u ka felisa ku sa petahala kwa batu ni lifu mi u ka fa mpo ya bupilo bo bu sa feli kwa batu ba ba ipeya ku utwa. Lu swanela ku ba ba ba itebuha luli tukiso ye lilato yeo!

Balatiwa Ba Mina Bo?

Ba bañwi ba kana ba nahana kuli: ‘Balatiwa ba ka bo? Bupilo bo bu sa feli fa lifasi ne bu si ke bwa tabisa ha ne ba si ke ba ba ni na.’ Mwendi mu fumani zibo ya mwa Bibele mi mu itutile ka mo mu kona ku ikolela bupilo bo bu sa feli mwa paradaisi ya fa lifasi-mubu. (Luka 23:43; Joani 3:​16; 17:⁠3) Kacwalo, mu bata kuli lubasi lwa mina, balatiwa ba mina ba bañwi, ni balikani bo mu lata ba fumanehe teñi, kuli ba ikole bunde bo mu lakaza ku ikola mwa lifasi le linca la ku luka la sepisize Mulimu.​—2 Pitrosi 3:⁠13.

Kono ku cwañi haiba balikani ni balatiwa ba mina ha ba bonisi kuli ba tabela ku pila ku ya ku ile mwa paradaisi fa lifasi-mubu? Mu si tuheleli nto yeo ku mi zwafisa. Mu zwelepili ku ekeza kwa zibo ya mina ye nepahezi ya Mañolo, ni ku mamela ze mu ituta. Muapositola Paulusi n’a ñozi kuli: “U ka ziba cwañi, wena musali wa mulumeli, kuli u ka kona ku pilisa munn’a hao? Kamba u ka ziba cwañi, wena mulumeli wa munna, kuli u ka kona ku pilisa musal’a hao?” (1 Makorinte 7:​16, Bibele ye Kenile, hatiso ya 1984) Batu ba kona ku cinca. Ka mutala, munna yo muñwi ya n’a lwanisanga Bukreste muta o muñwi a cinca mi hamulaho a ba eluda mwa puteho ya Sikreste. U bulela kuli: “Ni ya itumela hahulu kuli lubasi lwa ka lo lu lateha ne lu tundamezi ku latelela likuka za lona ze tomile fa Bibele ka nako kaufela ye ne ni lu lwanisa.”

Mulimu wa iyakatwa bupilo bwa mina ni bwa balatiwa ba mina. Kaniti, “Mulena h’a . . . lati ba bañwi ha ba ka timela, kono u lata kuli kaufela ba kene mwa ku baka.” (2 Pitrosi 3:⁠9) Jehova Mulimu u bata kuli mina ni balatiwa ba mina mu pile ku ya ku ile. Lilato la hae li fita lilato la batu ba ba si ka petahala. (Isaya 49:15) Kacwalo mu itame silikani se sinde ni Mulimu. Kona cwale mu ka tusa balatiwa ba mina ku eza nto ye swana. Niha ba si na sepo ya ku pila ku ya ku ile ka nako ye, mubonelo wa bona u kana wa cinca muta ba mi bona mu pila ka ku ya ka zibo ye nepahezi ya mwa Bibele.

Ku cwañi ka za balatiwa ba mina ba ba shwile? Ka za batu ba bañata ba ba shwile, Bibele i fa sepo ya zuho​—ya ku zuswa kwa bafu ni ku pila mwa Paradaisi fa lifasi-mubu. Jesu Kreste n’a sepisize kuli: “Nako ya ta, mo ba ba li mwa mabita kaufela . . . ba [ka zwa].” (Joani 5:​28, 29) Nihaiba batu ba ba shwile ba si ka ziba Mulimu ba ka zusiwa kwa bafu, kakuli Bibele i li: “Ku zuha kwa bafu ku ka ba teñi, kwa ba ba lukile ni ba ba si ka luka.” (Likezo 24:15) Ku ka tabisa hakalo ku amuhela batu ba ba ka zusiwa kwa bafu!

Bupilo Bwa Kamita Ki Sepo ye Tabisa

Haiba mu kona ku fumana tabo ni mwangalwa cwale ku si na taba kuli mu pila mwa lifasi le li mwa butata, kaniti mu ka kona ku ikola bupilo bwa kamita mwa paradaisi fa lifasi-mubu. Nihakulicwalo, yo muñwi wa Lipaki za Jehova h’a na bonisize limbuyoti ze ka ikoliwa muta batu ba ka pila ku ya ku ile, musali yo muñwi n’a bulezi kuli: “Ha ni tabeli ku pila ku ya ku ile. Ku pila bupilo bwa lilimo ze 70 kamba ze 80 ku likani ku na.” Eluda wa Sikreste ya n’a li teñi ka nako yeo a mu  buza kuli: “Kana mu kile mwa nahana mo ba ka ikutwela bana ba mina ha ne mu ka timela?” A lotisa miyoko ha n’a nahanile ka za m’o bana ba hae ne ba ka tomohela lipilu boma bona ha ne ba ka timela. U itumelela kuli: “Ne li lona lwa pili ku ikutwa kuli ne ni na ni buitati, mi na bona kuli kanti bupilo bo bu sa feli haki sepo ye bonisa buitati kono i ama ni bupilo bwa ba bañwi.”

Ba bañwi ba kana ba ikutwa kuli ha ku na ya ba isa pilu ba pile kamba ba shwe. Niteñi, Mufani wa luna wa Bupilo wa ba isa pilu, kakuli u bulela kuli: “Ki Na Ya Pila, . . . ha ni tabeli lifu la ya maswe; kono ni tabela ya maswe h’a bakela mizamao ya hae, kuli a pile.” (Ezekiele 33:11) Bakeñisa kuli Mulimu wa iyakatwa nihaiba bupilo bwa ba ba maswe, kaniti u iyakatwa hahulu ni ku fita ba ba mu lata.

Mulena Davida wa Isilaele wa ikale n’a na ni buikolwiso bwa kuli Jehova n’a mu babalela luli. Davida n’a kile a bulela kuli: “Ndate ni me, niha ba ka ni tuhela, [Muñ’a] Bupilo u ka ni nopa.” (Samu 27:10) Ku bonahala kuli Davida n’a ziba kuli bashemi ba hae ne ba mu lata. Kono bashemi ba hae​—ba n’a twaezi​—niha ne ba ka mu fulalela, n’a ziba kuli Mulimu n’a si ke a mu yubeka. Ka lilato ni pabalelo, Jehova u lu fa bupilo bo bu sa feli ni bulikani bo bu si ke bwa fela ni kamuta. (Jakobo 2:​23) Kana ha lu swaneli ku amuhela limpo ze tuna zeo ka buitumelo?

[Siswaniso se si fa likepe 7]

Ku lata Mulimu ni batu ba bañwi ku ka bisa bupilo bo bu sa feli ku ba bo bu tabisa