Lipuzo Ze Zwa kwa Babali

Badimona ba ka ba kai mwahal’a Puso ya Kreste ya Lilimo ze Sikiti?

Bibele ha i alabi puzo yeo ka ku nonga. Kono lwa kona ku fita fa ku utwisisa ko ba lukela ku ba badimona mwahal’a Puso ya Kreste ya Lilimo ze Sikiti.

H’a bulela ka ze ka ezahala kwa makalelo ni kwa mafelelezo a Lilimo ze Sikiti zeo, muapositola Joani u li: “Na bona lingeloi le li tuluka kwa lihalimu, li sweli sinotolo sa mukoti, ni liwenge le lituna mwa lizoho la lona. La swala drakoni, noha ya kale, ye li Diabulosi ni Satani; mi la mu tama ka liwenge, myaha ye 1,000; mi la mu kunupela mwa mukoti; la u kiya, mi la u tiisa ka liswayo; kuli a tuhele ku puma macaba, mane ku fite myaha ye 1,000.” (Sinulo 20:​1-3) Litimana zeo li bulela fela za ku tamiwa kwa Satani ni za ku lukululwa kwa hae ka nakonyana. Nihaike badimona ha ba si ka bulelwa za bona, ki nto ye utwahala ku nahana kuli muta lingeloi le li sweli sinotolo sa mukoti​—yena Jesu Kreste ya filwe kanya​—a swala Diabulosi ni ku mu kunupela mwa mukoti, u ka eza nto ye swana ni kwa badimona.​—Sinulo 9: ​11.

A man’o ba Mulena mwa lihalimu ka 1914, Jesu Kreste n’a ngile muhato o n’o amile hahulu Satani hamoho ni badimona. Sinulo 12:​7-9 i bulela kuli: “Ndwa ya lwanwa mwa lihalimu. Mikaele ni mangeloi a hae a lwanisa drakoni. Drakoni ya lwana, i na ni mangeloi a yona [badimona]. Kono mangeloi a Drakoni h’a si ka tula, mi sisa sa ona ha si si ka bonwa hape kwa lihalimu. Mi drakoni ye tuna, yona noha ya kale, ye bizwa Diabulosi ni Satani, ye pumanga lifasi kamukana, ya nepelwa mwa lifasi, ni mangeloi a yona a nepwa hamoho ni yona.” Ku tuha nako yeo, Satani ni badimona ba hae ba kashelizwe mwa sifukambanda sa lifasi. Kanti kwa swanela ku nahana kuli muta Jesu Kreste a kwalela misebezi ya Satani hape ilikuli a zwise moya wa hae o maswe mwa lifasi, U ka eza nto ye swana ni kwa badiomona.

Hape mu nyakisise bupolofita bwa Bibele bwa pili luli. Bu bala kuli: “[Na Mulimu] ni ka beya toyano mwahal’a mina, ni wena [Satani] ni musali [kopano ya Jehova ya kwa lihalimu], ni mwahal’a peu ya hao [Satani] ni peu ya musali [Jesu Kreste]; peu yeo i ka ku pyata toho, wena u i lume fa lisito.” (Genese 3:15) Ku pyatiwa kwa toho ya noha ku kopanyeleza ku tamiwa kwa Satani mwahal’a Puso ya Kreste ya Lilimo ze Sikiti. Bupolofita hape bu bulezi kuli ku na ni sitoyo mwahal’a Yena mupyati y’o ni peu ya Satani. Yona peu yeo, kamba kopano, i kopanyeleza liluko le li sa bonahali la mangeloi a maswe, kamba bona badimona. Kacwalo kwa utwahala ku lumela kuli ka nako yeo Jesu a kunupela Satani mwa mukoti, u ka tama hape ni ku kunupela mwateñi badimona. Kwa iponahaza hande kuli mioya ye maswe ya ziba kuli i ka kwalelwa cwalo kwapili kakuli i bonisize kale sabo ya ku saba ku nepelwa mwa mukoti.​—Luka 8:​31.

Kono kana kwa kona ku ba kuli Sinulo 20:​1-3 ha i buleli ka za badimona kabakala kuli ba ka timezwa fa Armagedoni hamoho ni kalulo  ye bonahala ya peu ya Satani? Bibele ha i bonisi kuli kwa kona ku ba cwalo. I bulela cwana ka za sinyeho ya mafelelezo ya Satani: “Diabulosi ya n’a ba shembile a kunupelwa mwa lisa la mulilo ni sulufula, fo ku na ni sibatana ni mupolofita ya buhata; mi ba ka tukufazwa musihali ni busihu, ku ya ku ile.” (Sinulo 20:10) Sibatana ni mupolofita wa buhata ki likopano za bupolitiki mi ki kalulo ya kopano ya Satani ye bonwa ka meto. (Sinulo 13:​1, 2, 11-14; 16:​13, 14) Sibatana ni mupolofita wa buhata ba ka sinyiwa fa Armagedoni, muta Mubuso wa Mulimu u ka ketula ni ku feza mibuso kaufela ya lifasi. (Daniele 2:44) Bibele i bulela ka za ‘mulilo o sa feli, o lukiselizwe Diabulosi ni mangeloi a hae.’ (Mateu 25:41) Satani ni badimona ba hae ba ka nepelwa mwa “lisa” le li swana “la mulilo ni sulufula” mo ku ka nepelwa sibatana ni mupolofita wa buhata ka kutwisiso ya kuli ni bona ba ka yunda ku yundiselezwa. Kambe kuli kopano yeo ya peu ya Satani ye sa bonwi ya badimona ba ba m’ata ne i ka sinyiwa fa Armagedoni, badimona kaniti ne ba ka bulelwa kuli ba nepezwi kale mwa lisa la swanisezo leo hamoho ni sibatana ni mupolofita wa buhata. Ku sa bulelwa kwa bona kwa Sinulo 20:10 ku bonisa kuli badimona ha ba na ku sinyiwa fa Armagedoni.

Badimona ha ba si ka bulelwa ka ku nonga kuli ba kunupezwi mwa mukoti, mi kacwalo ha ba si ka bulelwa hape ka ku nonga kuli b’a lukululwa mwa mukoti wo. Kono ze ka ezahala ku bona li swana ni ze ka ezahala ku Diabulosi. Ha se ba lukuluzwi hamoho ni Diabulosi ni ku swalisana ni yena mwahal’a tiko ya mafelelezo ya batu kwa maungulo a lilimo ze sikiti, badimona ni bona ba ka nepelwa mwa lisa la mulilo ili ku sinyiwa ku ya ku ile.​—Sinulo 20:​7-9.

Kacwalo, nihaike Sinulo 20:​1-3 i bulela fela za ku tamiwa kwa Satani ni ku nepelwa mwa mukoti ili ku mu tibela ku eza nto ni ye kana, lwa kona ku utwisisa ka swanelo kuli mangeloi a hae ni ona a ka tamiwa ni ku kunupelwa mwa mukoti. Ibe Satani kamba limpi za hae za badimona, ha ku na ya ka lumelezwa ku filikanya talelezo ya mulelo wa Mulimu wa ku fetula lifasi ku ba paradaisi ni ku kutiseza batu kwa bupetehi mwahal’a Puso ya Kreste ya Lilimo ze Sikiti.