Ze Swanelwa ku Balwa—Kelezo ye Butali Ya Salumoni

“LIBUKA ze ñolwa ki ze ñata, ha li na mo li felela; mi ku ituta hahulu ku fa mutu mukatala.” (Muekelesia 12:12) Ha n’a ñola manzwi ao lilimo ze 3,000 kwamulahao k’o, Mulena Salumoni ya butali wa Isilaele n’a sa hanisi batu ku bala. Niteñi, n’a talusa butokwa bwa ku no ketanga za ku bala. Kupuliso ye ya swanela luli mwa miteñi ya cwale bakeñisa kuli mishini i hatisa libilioni za makepe a litaba za ku bala ka silimo!

Kwa iponahaza luli kuli ‘libuka ze ñata’ za n’a talusa Salumoni ne li sa yahisi kamba ku katulusa. Kacwalo, n’a talusize kuli ku li bala hahulu ha ku koni ku fa mutu mipuzo ye inelela kono li “fa mutu mukatala.”

Nihakulicwalo, kana Salumoni n’a talusa kuli ha ku na libuka ze kona ku fa ketelelo ye itingwa, ye lukile ni ye kona ku tusa mubali? Batili, esi mane n’a ñozi hape kuli: “Manzwi a ba ba butali a swana sina miwayo; linguli ze kopanyizwe li swana sina limapo ze kokotezwi, ze tiile; li zwa ku mulisana a li muñwi.” (Muekelesia 12:11) Kaniti luli, ku na ni manzwi “a swana sina miwayo” ili a kona ku susueza hahulu mutu. A kona ku susueza mutu ku zamaya mwa nzila ye lukile. Mi hape, “sina limapo ze kokotezwi,” a kona ku tiisa katulo ya mutu ni ku mu matafaza.

Lu kona ku fumana kai manzwi a butali ao? Manzwi a butali ka ku fitisisa, sina mw’a bulelela Salumoni, a simuluha ku Mulisana a li muñwi, Jehova. (Samu 23:1) Kacwalo, ki hande mutu ha ka latelela buka ye tahile ka moya wa Mulimu—yona Bibele. Ku balanga manzwi a tahile ka moya wa Mulimu ao ku bisa mutu ku ‘petahala ni ku talifela luli misebezi kaufela ye minde.’—2 Timotea 3:16, 17.