“Ni Itebuha Hahulu Lituto Ze Ni Lutilwe”

MUSIZANA wa libizo la Kazuna n’a komokile hahulu bo muluti ba hae ha ba mu bulelela kuli a yo yemela sikolo sa habo mwa kangisano ya ku bulela Sikuwa. Kangisano yeo ne li ya likolo kaufela ze pahami za mwa sioli se situna sa Hokkaido sa kwa mutulo wa Japan, mi ne li lona lwa pili sikolo sa habo ku ba mwa kangisano yeo. Lizazi la kangisano ha li fita, Kazuna a ikalelwa hahulu kakuli n’a ka kangisana ni bana ba sikolo ba bañwi ba ba bat’o ba 50. Cwale ha sa lemuhile kuli banna ba babeli ba ba zamaisa za kangisano ye ki Makuwa, Kazuna a saba hahulu.

Bawini ne ba zibahalizwe, mi ba kala ku fiwa mipuzo ili ku kala ka wa mafelelezo. Kazuna h’a bizwa kuli a yo fiwa mupuzo, a makala hahulu. Yena ni bo muluti ba hae, ba ne ba li mabapa ni yena, ba talimana ka ku komoka hahulu. Inge a ikomokezi cwalo, Kazuna a ya fa libulelelo ku yo amuhela komoki—ili mupuzo wa pili!

Kazuna a bulela kuli: “Ne ni winile bakeñisa lituto ze i luta kopano ya Jehova ka Sikolo sa Bukombwa sa Teokratiki. Ni itebuha hahulu lituto ze ni lutilwe.” Sona sikolo seo, sa keni Kazuna mane ku kala kwa bwanana, ki o muñwi wa mikopano ya puteho ya Lipaki za Jehova. Ha n’a itukiseza kangisano yeo, Kazuna n’a isize hahulu mamelelo kwa muitusisezo wa maikrofoni, ku bulela ka silikani ni ka mafulofulo, ku itusisa liponiso za ka mazoho, ku libisa meto kwa bateelezi ni ku ze ñwi ze lutiwa mwa Sikolo sa Bukombwa sa Teokratiki.

Shangwe mu memiwa kuli mu to bona sikolo seo se si zamaiswanga sunda ni sunda kwa Ndu ya Mubuso ya Lipaki za Jehova ye mwa silalanda sa mina. Mu to iponela mo ba tusehela banana ni ba bahulu. Batu kaufela ba amuhelwa. Haiba mu bata ku ziba ze ñata ka za sikolo seo, shangwe mu atumele Lipaki za Jehova bo mu inzi ni bona mwa sibaka.