Ku Swalisaniswa ki Lilato La Ku Lata Mulimu

PUTEHO ya Sikreste ha ne i tomilwe mwa linako za baapositola, ne i zibahala hahulu ka ku ba ye swalisani niha ne i na ni batu ba lisimuluho ze fapahana. Balapeli ba Mulimu wa niti bao ne ba zwa mwa linaha za mwa Asia, Yurope, ni Africa. Ne ba na ni lisimuluho ze fitana-fitana—ba bañwi ne ba li maprisita, masole, babalehi, licaziba, ni ba lipisinisi. Ba bañwi ku bona ne li Majuda, mi ba bañwi ne li Balicaba. Buñata bwa bona ne ba banga babuki, ba kalombe, matakwa, masholi, ni ba mukwañuli. Nihakulicwalo, ha ne ba bile Bakreste, ne ba tuhezi mikwa ya bona ye maswe ni ku fita fa ku swalisana hahulu mwa tumelo.

Ki sikamañi se ne si konisize Bukreste bwa kwa makalelo ku swalisanisa batu ba ba cwalo? Ki kabakalañi ha ne ba pilisana ka kozo mwahal’a bona ni ku pila ka kozo ni ba bañwi kaufela? Ki kabakalañi ha ne ba si ka ikenya mwa lindwa ni lipetuho? Ki kabakalañi Bukreste bwa kwa makalelo ha bu shutana ni bulapeli bo butuna bwa kacenu?

Ki Sikamañi Se Ne Si Swalisanisize Puteho?

Libaka le lituna le ne li swalisanisize Bakreste ba kwa makalelo ki lilato la bona ku Mulimu.  Bakreste bao ne ba lemuhile tamo ya bona ye tuna ya ku lata Mulimu wa niti, Jehova, ka pilu ya bona kaufela, ni ka moya wa bona kaufela, ni ka kutwisiso ya bona kaufela. Ka mutala, muapositola Pitrosi, ya n’a li Mujuda, n’a laezwi ku potela mutu wa naha i sili ili yo n’a si ke a swalisana ni yena ni hanyinyani kambesi a laelwa ku eza cwalo. Lilato la hae ku Jehova sihulu ki lona le ne li mu susumelize ku eza za n’a laezwi. Pitrosi ni Bakreste ba bañwi ba kwa makalelo ne ba ikozi silikani se si tiile ni Mulimu se ne si tomile fa zibo ye nepahezi ya ku ziba butu bwa Hae, z’a lata ni z’a sa lati. Nako ha inze i ya, balapeli kaufela ba fita fa ku utwisisa kuli ki tato ya Jehova kuli ba “kopane hande ka maikuto a li mañwi, ni ka muhupulo u li muñwi.”—1 Makorinte 1:10; Mateu 22:37; Likezo 10:1-35.

Tumelo ku Jesu Kreste ni yona ne i konisize balumeli ku swalisana. Ne ba bata ku hata mwa n’a hatile Jesu. N’a ba laezi kuli: “Mu latane; sina mo ni mi latezi . . . Se ba ka ziba batu kaufela kuli mu balutiwa ba ka ka sona, ki ha mu latana.” (Joani 13:34, 35) Seo ne ni sa talusi ku bonisa maikuto a fahalimu fela, kono ne ba tokwa ku bonisa lilato la buitomboli. Ki sikamañi se ne si ka zwa mwateñi? Jesu n’a lapezi cwana ka za ba ne ba bonisize tumelo ku yena: ‘Ni lapela kuli kaufela ba be a li muñwi, sina Wena Ndate ha u li ku na, ni na ku Wena. Ni bona cwalo, ba be a li muñwi ku luna.’—Joani 17:20, 21; 1 Pitrosi 2:21.

Jehova n’a sululezi batanga ba hae ba niti moya wa hae o kenile kamba m’ata a’ sebeza . Moya o kenile wo ne u tisize swalisano mwahal’a bona. Ne u ba konisize ku utwisisa lituto za Bibele ze ne amuhezwi mwa liputeho kaufela. Balapeli ba Jehova ne ba kutalize lushango lo lu swana—lona lwa ku bonisa bukeni bwa libizo la Jehova ka Mubuso wa Mulimu o filwe mwa mazoho a Mesiya, ili mulonga wa kwa lihalimu o ka busa batu kaufela. Bakreste ba kwa makalelo ne ba utwisisa kuli ne ba tamehile ku sa ba ba “lifasi.” Kacwalo ha ne ku banga ni lindwa za mukowa, Bakreste ne ba ikambusanga ku zona. Ne ba tabela ku pila mwa kozo ni batu kaufela.—Joani 14:26; 18:36; Mateu 6:9, 10; Likezo 2:1-4; Maroma 12:17-21.

Balumeli kaufela ne ba petile buikalabelo bwa bona bwa ku hulisa swalisano. Kamukwaufi? Ka ku bona teñi kuli muzamao wa bona ne u lumelelana ni Bibele. Kacwalo, muapositola Paulusi n’a ñolezi Bakreste kuli: ‘Mu na ni ku tubula mutu wa kale,’ ni “ku apala mutu yo munca.”—Maefese 4:22-32.

Swalisano Ne I Bukelelizwe

Ki niti kuli balumeli ba mwa linako za baapositola ne ba si ka petahala, mi ne ba ipumani mwa miinelo ye ne kona ku felisa swalisano ya bona. Ka mutala, Likezo 6:1-6 i bonisa fapano ye ne bile teñi mwahal’a Majuda ba Sikreste ba ne ba bulela puo ya Sigerike ni ba ne ba bulela Siheberu. Ba ne ba bulela Sigerike ne ba ikutwa ku ketululwa. Nihakulicwalo, baapositola ba man’o bihelwa taba yeo, ba nga muhato ka bubebe ni ku tatulula butata ka nzila ye lukile. Hasamulaho, puzo ye ne buzizwe ka za swanelo ya Bakreste ba ne ba si Majuda mwa puteho ya Sikreste ne i tisize likañi. Katulo ye ne tomile fa likuka za Bibele ne i ezizwe, mi ne i amuhezwi ki bote.—Likezo 15:1-29.

Mitala ye i bonisa kuli niha ne ba shelananga, nto yeo ne i si ka tisa likauhano mwa puteho ya Sikreste ya kwa makalelo mi hape ne ba si ka ñañelela lituto ze ñwi za bulapeli, ze ne kona  ku ba kauhanya. Ki kabakalañi ha ne ku si cwalo? Kabakala kuli lika ze swalisanisa batu—ze cwale ka lilato la ku lata Jehova, tumelo ku Jesu Kreste, lilato le lituna ku ba bañwi, ku latelela ketelelo ya moya o kenile, kutwisiso i liñwi ya lituto za Bibele, ni ku itakaleza ku eza licinceho mwa muzamao—ne li konisize puteho ya makalelo ku ba ye swalisani ni ku pilisana ka kozo.

Ku Swalisana mwa Bulapeli mwa Linako za Cwale

Kana swalisano ya kona ku ba teñi ka nzila ye swana kacenu? Kana lika ze swana zeo za kona ku swalisanisa batu ba tumelo i liñwi ni ku ba konisa ku ba mwa kozo ni ba mishobo kaufela mwa lifasi kamukana? Ee, za kona! Lipaki za Jehova ba swalisani mwa kopano ya mwa lifasi kamukana ye mwa linaha, lioli ni libaka ze fitelela 230. Mi ba swalisanisizwe ki lika ze swana ze ne swalisanisize Bakreste ba mwa linako za baapositola.

Libaka le lituna le li konisize Lipaki za Jehova ku ba ba ba swalisani ki buineelo bwa bona ku Jehova Mulimu. Seo si talusa kuli ba lika ku bonisa busepahali bwa bona ku yena mwa miinelo kaufela. Lipaki za Jehova hape ba na ni tumelo ku Jesu Kreste ni lituto za hae. Bakreste bao ba bonisa lilato la buitomboli kwa balumeli ba bañwi mi ba kutaza taba ye nde ye swana ya Mubuso wa Mulimu mwa linaha kaufela mo ba fumaneha. Ba itakaleza ku ambola za Mubuso ni batu ba bulapeli kaufela, ba mibala kaufela, ba linaha kaufela ni ba likwata za batu kaufela. Lipaki za Jehova hape ba ikambusanga kwa litaba za lifasi, mi seo si ba tusa kuli ba pime litiko za bupolitiki, za sizo, ni za lipisinisi ze kauhanya batu. Lipaki kaufela ba peta tamo ya bona ya ku tahisa swalisano ka ku latelela litaelo za Bibele mwa bupilo bwa bona.

Swalisano I Hoha Ba Bañwi

Swalisano yeo hañata i hohile mamelelo ya batu ba ne ba si Lipaki. Lu nge mutala wa Ilse * ya n’a li sisita wa keleke ya Katolika mwa Germany. Ki sikamañi se ne si tisize kuli a tabele Lipaki za Jehova? Ilse u li: “Ha ni si ka kopana kale ni batu ba bande inge bona. Ha ba yangi kwa ndwa; ha ba ezangi lika ze kona ku holofaza ba bañwi. Ba bata ku tusa batu kuli ba pile hande mwa paradaisi fa lifasi-mubu mwa Mubuso wa Mulimu.”

Hape ku na ni Günther, lisole wa kwa Germany ya n’a lumilwe kwa France ka nako ya ndwa ya lifasi ya bubeli. Zazi le liñwi muprisita wa keleke ya Protenstanti a eza sebelezo ni masole ba sikwata sa Günther. Muprisita n’a lapezi kuli ba fuyolwe, ba silelezwe ni ku fiwa tulo. Hamulaho wa sebelezo yeo, Günther a yo yema mwa sibaka sa hae sa bulibeleli. Ka tuso ya sihoho, a bona sikwata sa masole ba ne ba li lila za bona mwa buse bo buñwi mi ni bona ne ba eza sebelezo ye ne zamaiswa ki muprisita. Günther n’a bulezi hasamulaho kuli: “Mwendi muprisita yani ni yena n’a lapela kuli ba fuyolwe, ba silelezwe ni ku fiwa tulo. Ne ni komokile ku bona kuli likeleke za Sikreste ne li itwanisa mwa ndwa ye swana.” Nto yeo ne i katalize Günther mwa munahano. Hasamulaho, ha t’o kopana ni Lipaki za Jehova, ba ba sa ikenyangi mwa lindwa, Günther a kena mwa kopano yeo ya mizwale ba mwa lifasi kamukana.

Ashok ni Feema ne ba banga ba bulapeli bo buñwi bwa kwa Upa. Mwa ndu ya bona, ne ba na ni muzuzu mwa ku lapelela mulimu. Ha ne ku bile ni makulanu mwa lubasi lwa bona, ba tatubisisa bulapeli bwa bona. Mwa ku ambola ni Lipaki za Jehova, Ashok ni Feema ne ba tabisizwe ki lituto za mwa Bibele ni lilato le ne ba bonisana Lipaki. Cwale se ba li bahasanyi ba taba ye nde ya Mubuso wa Jehova.

Ilse, Günther, Ashok, ni Feema ba swalisani ni Lipaki za Jehova ba ba eza bolule-lule mwa kopano ya mwa lifasi kamukana. Ba lumela sepiso ya Bibele ya kuli lika ze swana z’e ba swalisanisa mwa bulapeli li ka tuha li swalisanisa batu kaufela ba ba ipeya ku utwa. Mi ha ku na ku ba ni lindwa, ku shelana, ni likauhano ze tiswa ki bulapeli. Lifasi kaufela li ka swalisana mwa bulapeli bwa Mulimu wa niti, Jehova.—Sinulo 21:4, 5.

[Litaluso za kwatasi]

[Maswaniso a fa likepe 4, 5]

Ku si na taba kuli ne ba na ni lisimuluho ze fitana-fitana, Bakreste ba kwa makalelo ne ba swalisani