Lipuzo Ze Zwa kwa Babali

Kana manzwi a Setefani a kwa Likezo 7:59 a bonisa kuli lu swanela ku lapela ku Jesu?

Likezo 7:59 i li: “Ha ba nze ba mu pobaula ka macwe, Setefani a lapela, a li: Mulena Jesu, amuhela moya wa ka!” Manzwi ao a tahisize lipuzo mwa minahano ya batu ba bañwi, kakuli Bibele i bulela kuli Jehova ki yena ya ‘utwa milapelo.’ (Samu 65:2) Kana Setefani luli n’a lapela ku Jesu? Kana seo si bonisa kuli Jesu wa likana ni Jehova?

Bibele ya King James version i bulela kuli Setefani n’a “biza Mulimu.” Kacwalo, kwa utwahala batu ba bañata ha ba lumela manzwi a n’a bulezi mutalusi yo muñwi wa Bibele Matthew Henry, kuli: “Setefani fa u lapela ku Kreste, kacwalo ni luna lu swanela ku lapela ku Kreste.” Niteñi, mubonelo wo ha u si ka luka. Kabalakañi?

Buka ye bizwa Barnes Notes on the New Testament i bulela ha buniti kuli: “Linzwi la kuli Mulimu ha li yo mwa toloko ya kwa makalelo mi ne li sa swaneli ku itusiswa mwa toloko ye. Ha li fumanehi mwa [miputo] kamba litoloko za kale.” Cwale linzwi la kuli “Mulimu” ne li beilwe cwañi mwa timana ye? Caziba ya bizwa Abiel Abbot Livermore n’a talusize kuli “ne li beilwe ki batoloki ba ne ba latelela lituto ze keluhile.” Kacwalo, mwa litoloko ze ñata kacenu, linzwi leo le ne li ikupulezwi fela li zwisizwe mwateñi.

Nihakulicwalo, litoloko ze ñata li bulela kuli Setefani n’a “lapezi” ku Jesu. Mi litaluso za kwatasi mwa Bibele ya New World Translation li bonisa kuli pulelo ye itusisizwe ya kuli “a kupa” hape i kona ku talusa “ku lapela.” Kana seo ha si bonisi kuli Jesu ki Mulimu ya M’ata Ote? Kutokwa. Hatiso ye bizwa Vine’s Expository Dictionary of Old and New Testament Words i talusa kuli mwa taba m’o, linzwi la Sigerike la e·pi·ka·leʹo, li talusa: “Ku biza, ku kupa; . . . kamba ku ipileza ku mubusi.” Paulusi n’a itusisize linzwi le li swana leo ha n’a ize: “Ni ipileza ku Sesare.” (Likezo 25:11) Kacwalo he, kwa swanela Bibele ye bizwa The New English Bible ha i bulela kuli Setefani n’a “kupa” ku Jesu.

Ki nto mañi ye ne susumelize Setefani ku fitisa kupo ye? Ka ku ya Likezo 7:55, 56, Setefani, “inz’a tezi Moya o Kenile, a talima kwa lihalimu mi a bona kanya ya Mulimu, ni Jesu a yemi ku la bulyo la Mulimu.” Setefani n’a kabe a fitisize kupo ya hae ku Jehova ka libizo la Jesu. Kono ha bona Jesu ya zusizwe kwa bafu mwa pono, ku bonahala kuli Setefani a lukuluha ku fitisa kupo ya hae ku yena, a li: “Mulena Jesu, amuhela moya wa ka.” Setefani n’a ziba kuli Jesu n’a filwe m’ata a ku zusa ba ba shwile. (Joani 5:27-29) Kacwalo n’a kupa Jesu kuli a bukeleze moya wa hae, kamba m’ata a bupilo bwa hae, ku fitela lizazi leo Jesu n’a ka mu zuseza kwa lihalimu ku yo pila ni yena a sa shwi.

Kana manzwinyana a n’a bulezi Setefani ao a bonisa kuli lu swanela ku lapelanga ku Jesu? Kutokwa. Libaka kikuli Setefani n’a taluhanyize Jesu ku Jehova, kakuli liñolo li bulela kuli Setefani n’a boni Jesu a “yemi ku la bulyo la Mulimu.” Hape miinelo ye swana sina wo ne li ya ka siwela. Fo ne ku utwahalezi fela hape mubulelelo w’o wo no libisizwe ku Jesu ki muta muapositola Joani n’a bulezi ku yena ha n’a mu boni mwa pono.—Sinulo 22:16, 20.

Bakreste kacenu ni ha ba lapelanga fela ku Jehova Mulimu, ba na ni tumelo ye tiile ya kuli Jesu ki yena ‘zuho ni bupilo.’ (Joani 11:25) Sina mo ne i tiiselize Setefani, tumelo ya kuli Jesu u na ni m’ata a ku zusa balateleli ba hae ba ba shwile, i ka lu tusa ni ku lu tiisa muta lu ba mwa tiko.