Nako ya Lico Haki Nako Fela ya Ku Ca!

MAÑI ni mañi u ikolanga sico se sinde. Mi haiba lu ikola makande a mande ni siango se sinde ni batu be lu lata ha lu nze lu ca lico, nako yeo i ka ba ye tabisa luli isi fela nako ya ku ikola sico. Mabasi a mañata a na ni mukwa wa ku kopananga hamoho nihaiba fela hañwi ka zazi kuli a kone ku ca lico hamoho. Nako ya lico i konisa lubasi ku buhisana lika za ku eza kamba ze ezahezi mwahal’a lizazi. Bashemi ba ba teelezanga ku ze ba bulela bana ba bona ba fitanga fa ku ziba minahano ni maikuto a bona. Nako ha i nze i ya, siango se sinde se lu ikolanga lubasi ka nako ya lico si ka tahisa kuli mwa lubasi ku be ni ku sepana ni ku latana ili nto ye kona ku tiisa lubasi.

Kacenu, bakeñisa kuli ba bañata mwa mabasi ba patehile, ku t’ata ku kopana kuli ba ce lico hamoho. Mwa linaha ze ñwi, lubasi ka sizo ha lu koni ku ca hamoho kamba mane ku ambolisana ka nako ya lico. Mabasi a mañwi a tukisanga TV ka nako ya lico, mi kacwalo ha ba ambolisanangi hande ka nako yeo.

Kono bashemi ba Sikreste ki ba ba tona kamita kuli ba fumane kolo ya ku luta mabasi a bona. (Liproverbia 24:27) Kwamulaho k’o, bashemi ne ba taluselizwe kuli nzila ye nde hahulu ya ku luta ka yona bana ba bona linzwi la Mulimu ki ha ba ‘inzi mwa ndu ya bona.’ (Deuteronoma 6:7) Ku canga lico hamoho sina lubasi ku fa bashemi kolo ya ku suña lilato le lituna la ku lata Jehova ni likuka za hae ze lukile mwa lipilu za bana ba bona. Ka ku bisa nako ya lico ku ba nako ye nde ya tabo, mwa kona ku tahisa kuli nako yeo i be nako ye nde ya ku ikola ku ambola lika ze yahisa. Kacwalo he, nako ya lico i si ke ya ba fela nako ya ku ca!