Ku Kutaza kwa Saule Ku Shangumuna Sitoyo

MAJUDA ba mwa Damaseka ne ba sa utwisisi libaka muyemeli yo mutuna wa bulapeli bwa sizo sa Sijuda ha n’a bile mukwenuheli? Mutu yo ki Saule, ya n’a nyandisize batu ba ne ba biza fa libizo la Jesu mwa Jerusalema. N’a tile kwa Damaseka ku to nyandisa balutiwa. Kono cwale ni yena ka sibili na s’a kutaza kuli sibangoki se si swana seo se ne sikendilwe, se ne si kokotezwi bakeñisa bunyefuli ne li yena Mesiya! Kana fo kikuli Saule n’a takani?—Likezo 9:1, 2, 20-22.

Mwendi ku na ni nto ye ne tisize cwalo. Ba bañwi ba ne ba zamaelezi ni Saule ku zwa kwa Jerusalema ne ba kana ba talusize hande se ne si ezahezi mwa nzila. Ha se ba sutelezi kwa Damaseka, ka sipundumukela liseli le li benya la ba beya mwahali, mi kaufel’a bona ba wela fafasi. Hape ne ku utwahezi linzwi le li bulela. Ha ku na ya n’a holofezi kwand’a Saule. N’a lapami mwa nzila. Kwa nalulelule ha s’a zuhile, bazamai ba bañwi konji ko ne ba mu sotelize ku ya kwa Damaseka, kakuli n’a sa boni ni hanyinyani.—Likezo 9:3-8; 26:13, 14.

Mulwanisi U Ba Muyemeli

Kiñi se ne si ezahezi ku Saule mwa nzila ye liba kwa Damaseka? Esi mwendi n’a bombisizwe ki musipili o mutelele kamba kalengelenge ka lizazi la musihali? Ka ku lika ku fumana mabaka, bahononi ba mwa nako ya cwale ba bulela za lika ze cwale ka ku welela, mandingwe, ku lyangana hahulu mwa munahano kabakala ku sisitwa kwa lizwalo la Saule, ku lembwala, ni ze twi ki butuku bwa ku wa.

Se ne si ezahezi ne li kuli Jesu Kreste n’a bonahezi ku Saule mwa liseli leo le ne li benya hahulu, ili ku kolwisa Saule kuli Jesu n’a li yena Mesiya. Maswaniso a mañwi a baswanisi ba kezahalo yeo a bonisa Saule inz’a a wa fa pizi. Nihaike kwa kona ku ba cwalo, Bibele i bulela fela kuli a “wela fafasi.” (Likezo 22:6-11) Muwelo kaufela wa n’a wile ka ona Saule ne si o ipitezi hahulu sina muwelo wa hae wa ku zwa fa mayemo a hae a buikuhumuso. Cwale n’a na ni ku ziba kuli ze ne ba kutaza balutiwa ba Jesu ne li za niti. Nto fela ya n’a kona ku eza Saule ki ku swalisana ni bona. Ku zwa kwa ku ba sila ya maswe wa lushango lwa Jesu, Saule a ba yo muñwi wa bayemeli ba lona ba batuna. Ha sa kalile ku bona hape ni ku kolobezwa, “Saule a itiisa hahulu, a koma Majuda ba ba yahile mwa Damaseka, ka ku ba bonisa kuli Jesu ki Yena Kreste.”—Likezo 9:22.

Mulelo wa ku Lela ku Mu Bulaya wa Pala

Saule ya n’a tilo bizwa Paulusi n’a ile kai hasamulaho wa ku sikuluha? Ha n’a ñolela Magalata, n’a bulezi kuli: “Na ikela mwa Arabia; kiha ni kutela hape kwa Damaseka.” (Magalata 1:17) Pulelo ya “Arabia” i kona ku talusa musipili wa ku ya kwa sibaka sifi kamba sifi sa mwa Sikuli sa Arabia. Bocaziba ba bañwi ba akaleza kuli Paulusi u lukela ku ba ya n’a ile mwa lihalaupa la Syrian Desert kamba kwa sibaka si sili mwa mubuso wa Nabataea  wa mubusi Aretas IV. Ku bonahala kuli Saule n’a ile kwa sibaka se si kuzize ku yo yeya ha sa kolobelizwe, sina mwa n’a yezi Jesu mwa lihalaupa ha sa nwelisizwe.—Luka 4:1.

Saule ha sa kutezi kwa Damaseka “Majuda ba lela ku mu bulaya.” (Likezo 9:23) Mubusisi ya n’a li muyemeli wa Mulena Aretas mwa Damaseka n’a kantela muleneñi kuli a swale Saule. (2 Makorinte 11:32) Kono lila zeo ha ne li lela ku bulaya Saule, balutiwa ba Jesu ba mu tusa ku toba.

Yo muñwi wa ba ne ba tusize Paulusi ku toba ne li Ananiasi ni balutiwa ba n’a ikozi ni bona sango Paulusi ha man’o sikuluha. * (Likezo 9:17-19) Ba bañwi ba ne ba sikuluhile ka ku kutaza kwa Saule mwa Damaseka ba lukela ku ba ba ne ba mu tusize ni bona, kakuli Likezo 9:25 i bulela kuli: “Balutiwa ba y’o mu nga busihu, ba mu bandusa fa lukwakwa lwa munzi, ba mu tuluseza fafasi mwa lishiño.” Pulelo ya kuli “balutiwa ba hae” i kana ya talusa ba n’a lutile Saule. Ibe kuli ne ku bile cwañi, ku konda kwa bukombwa bwa hae ne ku ekelize kwa sitoyo se ne si li teñi ni kale.

Tuto Ye Na ni Ku Itutiwa

Ha lu tatuba ze ñwi za likezahalo ze ne ezahalezi Saule ha sa sikuluhile ni ku kolobezwa, lu bona hande kuli n’a sa bilaezwi hahulu ki mo ne ba mu ngela ba bañwi; mi n’a si ka tuhela kabakala twaniso ye tuna. Nto ye n’e li ya butokwa hahulu ku Paulusi ne li musebezi wa ku kutaza wa n’a filwe.—Likezo 22:14, 15.

Kana kihona mu sa zo ikolwisisa butokwa bwa ku kutaza taba ye nde? Haiba ku cwalo, mwa ziba kuli Bakreste kaufela ba niti ba swanela ku ba bakutazi ba Mubuso. Ha mu swaneli ku komoka haiba bukombwa bwa mina bu mi tahiseza sitoyo ka linako ze ñwi. (Mateu 24:9; Luka 21:12; 1 Pitrosi 2:20) Ku tiyela twaniso kwa Saule ku fa mutala o munde. Bakreste ba ba tiyela miliko ba sa zwafi ba ka fuyaulwa ki Mulimu. Jesu n’a bulelezi balutiwa ba hae kuli: “Mu ka toiwa ki batu kaufela kabakala Libizo la ka.” Niteñi, n’a ba kolwisize kuli: “Mu ka pilisa mioya ya mina ka ku tiya kwa mina.”—Luka 21:17-19.

[Litaluso za kwatasi]

[Siswaniso se si fa likepe 28]

Saule ‘na wezi fafasi’ Jesu ha n’a bonahezi ku yena

[Siswaniso se si fa likepe 29]

Saule n’a picukile mulelo wa ku mu bulaya mwa Damaseka