Lipuzo Ze Zwa kwa Babali

Samisoni n’a konile cwañi ku swala litupu za batu ba n’a bulaile ni ku zwelapili ku ba Munazareni?

Mwa Isilaele ya kwaikale, mutu n’a kona ku eza buitamo ka ku itatela ni ku ba Munazareni ka nako ya itomezi. * Ye ñwi ya likaniso ze ne ama mutu ya n’a eza buitamo bo ki ya kuli: “Mwa mazazi kaufela a’ isumekelezi [Muñ’a] Bupilo, a si ke a sutelela kwa situpu sa ya shwile. A si ke a isilafaza ka situpu sa ndat’ahe, nihaiba sa m’ahe, kamba sa mwanahabo, kamba sa kaizel’a hae h’a tokwahalile.” Ku cwañi haiba mutu yo muñwi ‘a shwa ka sipundumukela fakaufi ni yena’? Ku swala situpu ka ku sa ziba ne ku ka silafaza Bunazareni bwa hae. Kacwalo, ne ku tomilwe kuli: “Mazazi a’ fitile h’a na ku balwa.” N’a ka tokwa ku keniswa ni ku kala sinca Bunazareni.—Numere 6:6-12.

Kono Samisoni ne li Munazareni ka nzila i sili. Pili Samisoni a si ka pepwa kale, lingeloi la Jehova ne li bulelezi bom’ahe kuli: “Bona, u ka ba fa mezi a manca, u pepe mushimani; mi yena a si ke a beulwa ka mbeli; kakuli mwana yo u ka ba Munazareni wa Mulimu a sa li mwa mba. Mi ki yena ya ka kala ku lamulela Isilaele mwa mazoho a Mafilisita.” (Baatuli 13:5) Samisoni n’a si ka eza buitamo bwa Bunazareni. N’a li Munazareni ka ku ketiwa ki Mulimu, mi n’a na ni ku ba Munazareni mwa bupilo bwa hae kaufela. Mulao wa ku sa swala situpu ne u sa mu ami. Kambe ne u mu ama mi ka ku sa ziba a swala situpu, n’a ka kalisa cwañi Bunazareni bwa hae bo ne bu kalile ha pepwa? Kacwalo ku bonahala kuli ze ne tokwahala kwa Manazareni ba ba ketilwe cimo ne li fapahana ka nzila ye ñwi ni ze ne tokwahala kwa Manazareni ba ku itatela.

Mu nyakisise milao ya Jehova ya n’a file kwa batu ba balalu ba ne ba li Manazareni ba ba ketilwe—bo Samisoni, Samuele, ni Joani Mukolobezi—ba ba bulezwi mwa Bibele. Sina ha se ku bulezwi, Samisoni n’a sa swaneli ku kuta milili ya kwa toho ya hae. Ha n’a bulela za mwan’a hae Samuele ya n’a si ka pepwa kale, Anna a itama ka luci kuli: “Ni ka mu fa [Muñ’a] Bupilo mazazi kaufela a bupilo bwa hae, mi mbeli ha i na ku mu beula kwa toho.” (1 Samuele 1:11) Haili ka za Joani Mukolobezi,  lingeloi la Jehova ne li bulezi kuli: “H’a na ku nwa veine kamba bucwala.” (Luka 1:15) Mi hape, “Joani n’a apezi kubo ya boya bwa kamele, a itamile mwa teka lukanda lwa litalo; lico za hae ne li linziye ni linosi za mwa naheñi.” (Mateu 3:4) Ha ku na ni yo mukana kwa batu bao ba balalu ya n’a hanisizwe ku sutelela kwa situpu sa mutu ya shwile.

Ni kwa n’a li Munazareni, Samisoni n’a li yo muñwi wa Baatuli ba n’a ketile Jehova kuli ba lamulele Maisilaele mwa mazoho a ba ba ba swenya. (Baatuli 2:16) Mi ha n’a nz’a peta musebezi wo, n’a swalanga litupu. Ka nako ye ñwi, Samisoni n’a bulaile Mafilisita ba 30 ni ku ba tubula liapalo za bona. Hamulaho, “a ba lobaka lilupi ni mateka, ya ba pulao ye tuna.” Hape a nga mutahali o munca wa mbongolo ni ku itusisa ona ku bulaya banna ba sikiti. (Baatuli 14:19; 15:8, 15) Samisoni n’a ezize zeo kaufela ka ku shemubiwa ni ku yemelwa ki Jehova. Mañolo a talusa kuli Samisoni n’a na ni tumelo ye tiile ye swanelwa ku likanyiswa.—Maheberu 11:32; 12:1.

Kana taba ya kuli Samisoni n’a pazuzi tau fahali “inge ya pazula mwan’a puli” i akaleza kuli ku pazula mwan’a puli ne li nto ye ne eziwanga mwa nako ya hae?

Ha ku na bupaki bo bu bonisa kuli mwa miteñi ya Baatuli ba Isilaele batu ne ba pazulanga mwan’a puli. Baatuli 14:6 i li: “Cwale Moya wa [Muñ’a] Bupilo wa mu tela ka m’ata, a pazula tau inge ya pazula mwan’a puli, bo n’a si na sika mwa mazoho.” Taba ye i lukela ku ba swanisezo.

Pulelo ya kuli a “pazula,” i kona ku talusa lika ze peli. Mwendi Samisoni n’a pazuzi mitahali ya tau kamba n’a pazuzi tau fahali ka mupazulelo o muñwi. Haiba taba yeo ne i talusa ku pazula fahali mitahali ya tau, f’o u zibe mutu wa kona ku eza nto ye swana ku mwan’a puli. Mwa taba ye, swanisezo ki ya kuli ku bulaya tau ku si na silwaniso ne li nto ye bunolo ku Samisoni sina ku bulaya mwan’a puli ka mazoho. Kono ku cwañi haiba Samisoni n’a bulaile tau ka ku i pazula fahali? Taba yeo i kona ku ngiwa kuli ki swanisezo ni yona. Sisupo sa swanisezo yeo ki sa kuli moya wa Jehova ne u file Samisoni m’ata a ku eza nto ye ne tokwa m’ata a matuna hahulu. Kacwalo, taba ye kwa Baatuli 14:6 i bonisa kuli ka tuso ya Jehova, tau ye m’ata ne li nto ye bunolo ku Samisoni ku i bulaya sina mwan’a puli mw’a kona ku bulaelwa ki mutu ufi kamba ufi.

[Litaluso za kwatasi]