“Mu Libelele”

KWAIKALE, balibeleli ne ba libelelanga kwa minyako ya munzi ni ya tempele mi fokuñwi ni kwa minyako ya mandu a batu. Kwand’a ku kwalanga minyako busihu, balibeleli bao hape ne ba londelanga lika. Wo ne li musebezi o mutuna luli, kakuli buiketo bwa munzi ne bu itingile fa ku lemusa kwa bona batu ka za kozi ifi kamba ifi ye ne taha.

Jesu Kreste n’a ziba hande musebezi wa balibeleli. Ka nako ye ñwi, n’a swaniselize balutiwa ba hae kwa balibeleli mi n’a ba susuelize ku libelela maungulo a muinelo wa linto wa Sijuda. N’a ize: “Mu libelele, mu tone, mi mu lapele; kakuli ha mu zibi nako kana i ka ba lili. Ku ka swana inge mutu ya swala musipili, h’a siya ndu ya hae . . . mulibeleli wa munyako u laelwa kuli a libelele. Mu libelele kihona, kakuli ha mu zibi muñ’a ndu nako y’a ka kuta.”—Mareka 13:33-35.

Ka nzila ye swana, ka lilimo ze fitelela 125 ze felile, magazini ye ya Tora ya ku Libelela, i hasanyize susuezo ya Jesu ya kuli lu “libelele.” Ka mukwa ufi? Sina ka mo ku boniselizwe fa likepe 2 la magazini ye, “I tonela likezahalo za mwa lifasi ha li nze li taleleza bupolofita bwa Bibele. I omba-omba batu kaufela ka taba ye nde ya kuli Mubuso wa Mulimu u ka tuha u timeza ba ba nyandisa batu ba bañwi mi hape u ka fetula lifasi ku ba paradaisi.” Bakeñisa kuli likopi za yona ze fitelela 26,000,000 li abelwa kwa batu lifasi kaufela mwa lipuo ze 150, Tora ya ku Libelela ki yona magazini ye abelwa hahulu kwa batu mwa lifasi. Ka magazini ye, Lipaki za Jehova, ka ku swana ni balibeleli ba kwaikale, ba susueza batu kai ni kai kuli ba “tone” kwa moya kakuli Mulena, Jesu Kreste, a tuha a kuta ku to shandaula muinelo wo wa linto.—Mareka 13:26, 37.