Ki Mañi Ya Ka Fepa Lifasi?

BA LIKOLO la World Food Programme le li talima za ku felisa tala ili le li mwatas’a Kopano ya ba Macaba, ba akaleza kuli ku tuha ku lapa batu ba 800 milioni, sihulu banana. Cwanoñu fa, likolo leo ne li bulezi kuli lituso ze ne lukela ku fiwa ki linaha ze ñata ze fumile ilikuli butata b’o bu tatululwe, li isizwe kwa lika li sili ze cwale ka likezo za ku tasezana. Ku yamba kwa matuku a yambukela ku ekelize kwa butata b’o. Piho ya likolo leo ye bizwa Global School Feeding Report ne i bulezi cwana ka za linaha za Africa ili mo bu atile butuku bwa AIDS: “Lusika kaufela lwa bashemi lu sweli lwa fela ku shwa. Hañata banana ba ba siyalanga ba na ni ku ipyanga, mi buñata bwa bona ha ba zibi ku lima ni mwa ku ipiliseza.”

Ba World Food Programme ba hupuzi ku eza tukiso ya ku abela lico nihaiba fela hañwi ka zazi fa likolo. Mulelo wa bona haki kuli ba fukuze fela kwa tala kono hape ba bata kuli kwa lituto za bana ba sikolo ku ekeziwe kwateñi litukiso ze lukiselizwe ku sileleza banana kwa butuku bwa HIV/AIDS.

Mwa libaka mo i kalisize tukiso yeo, banana ba konile ku fumana lico, ku lutiwa makete, ni ku fiwa lituso ze ñwi. Hape se ku lemuhilwe kuli batu ha ba cinca mizamao ya bona, palo ya bakuli ba butuku bwa HIV/AIDS ni yona ya fukuzeha.

Ka bumai, lituso za batu hañata li banga ze nyinyani mi ha li fiwangi sina mo ne li sepiselizwe. Kono Bibele i fa sepiso ye nde ya ku felisa tala ku ya ku ile. Samu 72:16 i li: “Buloto bu ka ba bo buñata mwa naha.” Mwa Mubuso wa Mulimu, batu ba ka kona ku bulela ka za Jehova Mulimu kuli: “Ki Wena ya lekula lifasi, wa li kolobisa . . . Ki Wena ya ba meliseza mabele, u sin’o lukisa mubu.”—Samu 65:9.

[Manzwi a bañi ba siswaniso fa likepe 32]

WFP/Y. Yuge