Lipuzo Ze Zwa kwa Babali

Kana Davida, yena munna ya n’a kolisa pilu ya Mulimu, n’a nyandisize h’a situhu batu ba n’a hapile, sina ba bañwi mo ba nahanelanga ha ba bala 1 Makolonika 20:3?

Batili. Davida n’a file fela bahapiwa ba Maamoni misebezi ye t’ata. Za n’a ezize Davida ha li si ka bihiwa ka ku nepahala bakeñisa mo i tolokezwi timana yeo mwa Libibele ze ñwi.

Ha li talusa koto ye ne filwe kwa Maamoni, Libibele zeo li bonisa kuli Davida ne li mutu ya situhu hahulu. Ka mutala, 1 Makolonika 20:3, ka ku ya ka Bibele ye Kenile ya Silozi, hatiso ya 1951, i bala kuli: “Batu ba mwateñi a ba zwiseza kwande mi a ba pumaka ka lisaha, ni ka lipuputiso za lihala za sipi, ni ka lilepe. Davida a eza cwalo ni ka minzi kaufela ya bana ba Amoni.”

Kono niteñi caziba wa Bibele ya bizwa Samuel Rolles Driver u talusa kuli “ka ku ya ka ze lu ziba ka za butu bwa hae, Davida ne si mutu” ya situhu. Kacwalo, mwa The Anchor Bible ku ñozwi manzwi a’ li: “Davida n’a file bahapiwa misebezi ilikuli a ipumanele sifumu mwa naha ye tuzwi, mi ku bonahala kuli ki mona mo ne ba ezezanga malena ba ba tuzi.” Ka ku swana, Adam Clarke u talusa kuli: “Kacwalo ze taluswa kikuli, Davida n’a ezize batu bao batanga, ni ku ba fa musebezi wa ku saha, ku panga lihala za sipi za ku puputisa, kamba ku lafisa, . . . ni wa ku beta, ni wa ku nata masitina. Za ku pumaka batu ka lisaha, ni ku ba lemaka, haki zona ze bulelwa mwa taba ye, kakuli Davida n’a si ke a eza Maamoni cwalo.”

Ka ku bonisa taluso yeo ye nepahezi, litoloko ze ñwi za miteñi ye li bulela ka ku utwahala hande kuli Davida ha swaneli ku ngiwa sina mutu ya situhu. * Mu lemuhe mo ku tolokezwi mwa Bibele ye Kenile ya Silozi, hatiso ya 1984: “A nga batu ba mwateñi, ba bañwi a ba sebelisa kwa masaha, ba bañwi kwa mihuma ni lilepe, mi ba bañwi kwa ku bupa litina. A eza cwalo ni kwa batu kaufela ba minzi ya ba Amoni.” (2 Samuele 12:31) “A nga batu ba mwa hae, mi a ba fa musebezi wa ku lima, ni wa ku lema ni ku saha likota. A eza cwalo kwa batu ba minzi ye miñwi kaufela ya Amoni.” (1 Makolonika 20:3) Mutolokelo wa New World Translation ni ona u lumelelana ni mo ba hupulela baituti ba miteñi ye. I li: “Batu ba ne ba li mwateñi, a ba nga kuli a ba beye kwa ku saha macwe ni kwa libelekiso ze shengile za sipi ni kwa lilepe za sipi, mi a ba beya ku belekela ko ku lubelwa masitina.” (2 Samuele 12:31) “Batu ba ne ba li mwateñi a ba nga, a zwelapili ku ba fa musebezi wa ku saha macwe ni wa ku itusisa liitusiso ze shengile za sipi ni lilepe; mi ki mona m’o Davida n’a ezelize minzi kaufela ya bana ba Amoni.”—1 Makolonika 20:3.

Davida n’a si ka nyandisa h’a situhu kamba ku pumaka h’a situhu Maamoni ba ne ba tuzwi. N’a si ka likanyisa mikwa ya lindwa ye situhu ya batu ba mwa miteñi ya hae.

[Litaluso za kwatasi]