‘Inge Licwe la Sardiyo’

MUAPOSITOLA JOANI n’a boni pono ya lubona lo lu kanya mwa lihalimu. Ya n’a inzi fa lubona lo n’a bonahala “inge licwe la Jaspe.” Hape n’a bonahala inge ‘licwe la Sardiyo,’ lona licwe la butokwa le li fubelu. (Sinulo 4:2, 3) Macwe ao ki macwe a mufuta mañi?

Ao ne si macwe a benya-benya a sa koni ku punyiwa ki liito. Kwakale, linzwi la Sigerike le li tolokilwe kuli “jaspe” ne li itusiswa ku talusa macwe a mibala ye shutana-shutana, hamohocwalo ni macwe a butokwa a belela. A. T. Robertson mwa buka ye bizwa Word Pictures in the New Testament n’a bulezi kuli “licwe la jaspe” le li bulezwi kwa Sinulo 4:3 “kaniti [ne li] si licwe la jaspe le li cipile la mwa miteñi ye.” Hape, hasamulaho mwa buka ya Sinulo, Joani u talusa za Jerusalema, munzi wa kwa lihalimu, kuli: “Liseli la ona li benya sina licwe la butokwa, sina licwe la jaspe le li belela inge kristale.” (Sinulo 21:10, 11) Ku bonahala kuli macwe a’ taluswa ki Joani n’a belela, mi liseli ne li kona ku punya kwa buse.

Mutu ya swanisezwa mwa pono ya Joani ya inzi fa lubona, ki Jehova Mulimu, ya na ni kanya ye tuna ku feleleza mwa pupo kaufela. U twekile mi u kenile ku feleleza. Ka ku lumelelana ni taba yeo, muapositola Joani n’a ñozi kuli: “Mulimu u liseli, mi ha ku na lififi ku Yena ni hanyinyani.” (1 Joani 1:5) Kacwalo, Joani n’a susuelize balumeli ka yena ku ‘ikenisa sina Jehova h’a li ya kenile.’—1 Joani 3:3.

Lu swanela ku ezañi kuli Mulimu a lu bale ku ba ba ba kenile? Nto ya pili ya butokwa ki ku bonisa tumelo mwa mali a Kreste a sululezwi kuli libi za luna li swalelwe. Hape lu swanela ku zwelapili ku “zamaya mwa liseli” ka ku itutanga Bibele kamita ni ku latelela lituto za yona mwa bupilo.—1 Joani 1:7.