Jesu Mw’a Amezi Batu Lifasi Kaufela

MUTOLOKI wa Bibele ya bizwa Edgar Goodspeed n’a ñozi kuli: “Litaba kaufela ze ñozwi mwa libuka za evangeli za n’a bulezi Jesu kwa mukunda ni fa nyangela, n’a kabe a li bulezi mwa lihora ze peli fela. Kono zona litabanyana za n’a bulezi zeo, za susueza luli, mane ha ku na puzo ha ku bulelwa kuli ha ku na mutu ya kile a susueza hahulu batu ku mu fita.”

Jesu Kreste ha n’a felize bukombwa bwa hae bwa fa lifasi ka silimo sa 33 C.E., n’a bile ni balateleli ba basali ni ba banna ba ba bat’o ba 120. (Likezo 1:15) Kacenu, batu ba ba fitelela 2 bilioni ba ipapata ku ba Bakreste. Mi batu ba ba eza bolule-lule ba lumela kuli Jesu ki mupolofita. Lituto za hae li susuelize hahulu batu ka nzila ye komokisa.

Nihaiba baeteleli ba ba si Bakreste ba lemuhile m’o Jesu a amezi batu lifasi kaufela. Ka mutala, muluti wa Mujuda wa libizo la Hyman Enelow n’a ñozi kuli: “Jesu u tumile hahulu, batu ba ituta hahulu za hae, mi ki yena ya amile hahulu batu ka ku fitisisa mwa bulapeli.” Enelow hape n’a bulezi kuli: “Ki mañi ya kona ku akaleza palo ya lika za ezelize mufuta wa mutu? U susuelize batu ku ba ni lilato, u omba-ombile batu, u tahisize bunde ni sepo ni ku zusulusa tabo—ha ku na  mutu ya kile a peta zeo haisali. Kwa batu kaufela ba ba tumile ni ba bande ba ba kile ba pila, ha ku na ya kile a susueza ni ku ama hahulu batu ku fita Jesu. Ki yena ya hohile hahulu mamelelo ya batu haisali.” Mi mueteleli wa Sihindu ya bizwa Mohandas K. Gandhi n’a bulezi kuli: “Ha ku na mutu ya ezelize batu lika ze ñata ku fita Jesu. Mane Bukreste ha bu si ka fosahala.” Niteñi, n’a zwezipili ku bulela kuli: “Mina Bakreste ki mina ba ba na ni bufokoli. Ha mu pili ka ku ya ka lituto za mina.”

Krestendomu se i shunguzwi kale kuli ha i koni ku pila ka ku ya ka lituto za Jesu. Cecil John Cadoux, caziba wa litaba za kale za Bukreste, n’a ize: “Baeteleli ba Sikreste ku kala fela ka silimo sa . . . 140 A.D.,” ne ba “tuhelezi muzamao o maswe ku kena hanyinyani-hanyinyani mwa Keleke.” N’a lemuhile kuli: “Ona ku tuhelela muzamao o maswe k’o, ne ku tisize kuli balapeli ba likanyise mikwa ya lifasi.”

Mukwa wo ne u ipile hahulu m’ata mwa lilimo za ma-300, ili f’o Constantine, Mulena wa Roma n’a amuhezi Bukreste. Cadoux n’a ñozi kuli: “Bocaziba ba litaba za kale b’a ziba mi fokuñwi ba nyazanga ze maswe ze n’e zwile mwa swalisano ya keleke ni Constantinus.” Haisali ku zwiwa f’o, batu ba ba ipapata ku ba Bakreste ba ezize lika ze ñata ze swabisa ka libizo la Kreste.

Cwale lipuzo ze butokwa ki ze: Kanti Jesu n’a lutileñi luli? Mi lituto za hae li swanela ku lu ama cwañi?

[Siswaniso se si fa likepe 3]

“Ha ku na mutu ya ezelize batu lika ze ñata ku fita Jesu.”​—Mohandas K. Gandhi

[Siswaniso se si fa likepe 3]

“Ha ku na mutu ya kile a susueza hahulu batu ku mu fita.”​—Edgar Goodspeed

[Manzwi a bañi ba siswaniso]

Culver Pictures