‘Tuso ya Ka I Zwa ku Jehova’

Mikulwani Ba Ba Lumbeka Jehova Ba Kondolokisa Bupilo bwa Bona

“N I BATA lika ze nde ka ku fitisisa mwa bupilo!” Kona mwa n’a bulelezi mushimani yo muñwi ka za litibelelo za hae. Kono mukulwani u kona cwañi ku fumana lika ze nde ka ku fitisisa mwa bupilo? Bibele i fa kalabo ye bunolo, i li: “U hupule Mubupi wa hao mwa mazazi a bucaha bwa hao.”—Muekelesia 12:1.

Haki ba bahulu fela ba ba lukela ku lumbeka ni ku sebeleza Jehova. Samuele mwan’a Elikana ni Anna, n’a sa li mwanana luli ha n’a kalile ku sebeleza Jehova kwa tabernakele. (1 Samuele 1:19, 20, 24; 2:11) Kasizana ka Muheberu ne ka bonisize tumelo ye tiile ku Jehova ha ne ka akalelize kuli Naamani muzamaisi wa mpi ya Siria a ye ku mupolofita Elisha ilikuli a yo foliswa mbingwa. (2 Malena 5:2, 3) Kwa Samu 148:7, 12, batangana hamoho ni likalibe ba laelwa ku lumbeka Jehova. * Ha n’a li fela wa lilimo ze 12 za ku pepwa, Jesu a isa hahulu pilu kwa sebelezo ya Ndat’ahe. (Luka 2:41-49) Bakeñisa kuli ne ba lutilwe Mañolo, banana ba bañwi ba ne ba boni Jesu kwa tempele ba huwa ba li: “Hosanna ku Mwan’a Davida!”—Mateu 21:15, 16.

Ku Lumbeka Jehova Kacenu

Kacenu, mikulwani ba bañata mwahal’a Lipaki za Jehova ba tabela hahulu tumelo ya bona mi ka bundume ba i bulelela ba bañwi kwa likolo ni kwa libaka ze ñwi cwalo. Ki ye mitala ye mibeli.

Mwa Britain, bana ba sikolo ba mwa sitopa sa n’a kena Stephanie wa lilimo ze 18 za ku pepwa ne ba buhisana za ku sulula limba ni litaba ze ñwi za muzamao. Bo muluti ne ba pihelezi kuli la kacenu ku sulula limba se ku amuhelwa ki buñata bwa batu mi ni kuli ha ku na musizana ya na ni libaka la ku hana muezezo wo. Bana ba sikolo kaufela ha se ba lumezi ona mubonelo wo, Stephanie a ikutwa ku susumezwa ku bulela maikuto a hae a tomile fa Bibele. Stepahanie n’a bile ni kolo ya ku eza cwalo bo muluti ha ne ba mu buzize kuli a taluse maikuto a hae fa taba yeo. Nihaike kuli kwa makalelo n’a ikalezwi, Stephanie a itusisa yona kolo yeo ku talusa seo Mañolo a bulela fa taba yeo. A bulela ka ku pumakela manzwi a kwa Exoda 21:22-24 mi a talusa kuli haiba ne ku fosahalile ku holofaza mbututu ye mwa mba, u zibe he ku sulula mba neikaba ku sa eza tato ya Mulimu.

Bo muluti, ba ne ba li yo muhulu wa bulapeli, ba li ku ba ba bale zona litimana zeo. Bupaki bwa n’a file Stephanie ka bundume ne bu tahisize kuli a be ni lipuhisano ze nde fa litaba ze shutana-shutana ni ba n’a kena ni bona mwa sitopa. Musizana yo muñwi ya kena ni yena cwale u amuhelanga limagazini za Tora ya ku Libelela ni Awake!, mi ba babeli ne ba fumanehile kwa mukopano wa silikiti wa Lipaki za Jehova kuli ba yo bona Stephanie ha kolobezwa ka ku bonisa buineelo bwa hae ku Mulimu.

Vareta wa lilimo ze silezi za ku pepwa ya pila mwa Suriname, kwa South America, n’a fumani kolo ya ku lumbeka Mulimu, bo muluti ba hae ha ne ba tokwa ku omba-ombiwa ka Mañolo. Ha ne ba kutile hamulaho a ku ba siyo ka mazazi a malalu bo muluti bao ne ba buzize bana ba sikolo ka za haiba ne ba ziba libaka ha ne ba bile siyo. Bana ba sikolo ne ba alabile kuli, “Ne mu kula,  nji hakucwalo?” Bo muluti ba alaba kuli: “Batili, bo kaizel’a ka ki bona ba ba tokwahalile, mi ni mwa maswabi a matuna. Kacwalo mu si ke mwa eza lilata.”

Musihali wa lizazi leo bomahe ha ne ba wezi fa kaloko, Vareta n’a patehile ku apula mwa limagazini za kale, inze a bala litoho za litaba. A fumana Tora ya ku Libelela ya July 15, 2001, ye na ni toho ya taba ye li: “Kana Ku Na ni Bupilo Hamulaho wa Lifu?” Ka tabo ye tuna, a zusa bomahe, mi a li: “Ima, Ima, a mu bone! Ni fumani magazini ye bulela za lifu ye ni bata ku yo fa bo muluti!” Magazini yeo ne i lumezwi bo muluti hamoho ni liñolo le ne li zwa ku Vareta. Vareta n’a ñozi kuli: “Magazini ye sihulu ki ya mina. Mwa Paradaisi mu ka bona bo kaizel’a mina hape bakeñisa kuli Jehova ha pumi. U sepisize kuli u ka tisa paradaisi, isiñi kwa lihalimu, kono fa lifasi.” Bo muluti ne ba itumezi hahulu kwa manzwi a omba-omba a mwa Bibele a fumaneha mwa magazini ye.

Ku Itukiseza Za Kwapili

Jehova ki “Mulimu ya tabile,” mi u bata kuli mikulwani ba be ba ba tabile. (1 Timotea 1:11, NW) Linzwi la hae tota li li: “U ikole bunca bwa hao. U tabele ha u sa li mucaha.” (Muekelesia 11:9, Today’s English Version) Jehova u kona ku bonela cimo lika, mi u ziba ze ka ba teñi ka nako ye telele kabakala likezo ze nde kamba ze maswe. Ki ka lona libaka leo Linzwi la hae ha li eleza mikulwani kuli: “U hupule Mubupi wa hao mwa mazazi a bucaha bwa hao, mazazi a maswe a si ka taha kale, mi myaha i sa li kwahule y’o ka li: Ha ni i tabeli!”—Muekelesia 12:1.

Ee, Jehova u bata kuli mikulwani ba ikole ka ku tala mpo ya butokwa hahulu ya bupilo. Ka ku hupula ni ku lumbeka Mulimu, mikulwani ba kona ku pila bupilo bwa tabo ili bo bunde. Mane niha ba talimana ni lishemaeto, ba kona ku bulela ka buikolwiso kuli: ‘Tuso ya ka i zwa ku Jehova.’—Samu 121:2.

[Litaluso za kwatasi]

[Mbokisi fa likepe 8]

JEHOVA U TUSA MIKULWANI

“Ki Wena ye ni sepile Mulimu [Muñ’a] Bupilo; ni ku sepile isali kwa bwanana bwa ka.”​—Samu 71:5.

‘Mulimu u kulisa mulomo wa hao ze nde; mi cwale bucaha bwa hao bu ka shemuneha sina mbande.’​—Samu 103:5.

“Mu lumbeke [Muñ’a] Bupilo mwa lifasi; . . . ni batangana hamoho ni likalibe.”​—SAMU 148:7, 12