Bashemi, Mu Sileleze Sanda sa Mina Sa Butokwa

“Mwa mukunda wa butali mutu wa silelezwa . . . butali bu babalela bupilo bwa ya na ni bona.”—MUEKELESIA 7:12.

1. Ki kabakalañi bashemi ha ba swanela ku nga bana ba bona kuli ki limpo?

BASHEMI ba tisa mutu yo muñwi mwa lifasi, ya ba hozize mwa mikwa ni mwa ponahalo. Bibele i biza banana bao kuli ki “sanda se si zwa ku [Muñ’a] Bupilo.” (Samu 127:3) Bakeñisa kuli Jehova ki yena Mufani wa Bupilo luli, Jehova u fa bashemi mpo ye li ya hae luli. (Samu 36:9) Bashemi, mu ikutwa cwañi ka ku fiwa mpo ya butokwa cwalo ki Mulimu?

2. Manoa n’a ezize cwañi a man’o utwa kuli n’a ka ba ni mwana?

² Ku bulela niti mpo ye cwalo i swanela ku amuhelwa ka buikokobezo ni buitebuho. Lilimo ze fitelela 3,000 kwamulaho k’o, Muisilaele ya bizwa Manoa n’a ezize cwalo muta lingeloi ne li zibisize musal’a hae kuli n’a ka ba fa mezi a manca. Manoa a man’o utwa taba ye tabisa yeo, a lapela kuli: “Mulen’a ka, na kupa kuli munna wa Mulimu y’o lumile ku luna, a lu kutele, mi a lu lute se lu swanezi ku ezeza mwana ya ka pepwa.” (Baatuli 13:8) Bashemi, mu kona ku itutañi kwa mutala wa Manoa?

Libaka Ha Ku Tokwahala Tuso ya Mulimu Cwale

3. Ki kabakalañi bashemi ha ba tokwa tuso ku Jehova kuli ba hulise bana sihulu kacenu?

³ Kacenu le, ku fita nako ifi kamba ifi, bashemi ba tokwa tuso ya Jehova ha ba hulisa bana ba bona. Libaka ki lifi? Satani Diabulosi ni mangeloi a hae ba lelekilwe kwa lihalimu mi ba  nepezwi fa lifasi-mubu. Bibele i lemusa kuli: “Mu na ni bumai mina ba ba yahile mwa lifasi . . . kakuli Diabulosi u shetumukezi ku mina a halifile maswe, ka ku ziba kuli nako ya hae ki ye nyinyani.” (Sinulo 12:7-9, 12) Bibele i talusa kuli Satani “u nz’a zamaya sina tau ye lila ye bata ye i ka ca.” (1 Pitrosi 5:8) Litau hañata li tasezanga lifolofolo ze si ka silelezwa, sihulu za bana. Kacwalo ki ko ku butali kuli bashemi ba Sikreste ba kupe ketelelo ku Jehova kuli a ba tuse ku sileleza bana ba bona. Mu eza buikatazo bo bu kuma kai ka za taba yeo?

4. (a) Bashemi ba ezanga cwañi ha ba zibile kuli ku na ni tau ye kwemba mwa silalanda? (b) Banana ba tokwañi kuli ba silelezwe?

⁴ Haiba mu ziba kuli ku na ni tau ye kwemba mwa silalanda, ne mu ka iyakatwa hahulu ku sileleza bana ba mina. Satani ki sibatana. U bata ku silafaza batu ba Mulimu, ilikuli ba si ke ba swanelwa ki sishemo sa Mulimu. (Jobo 2:1-7; 1 Joani 5:19) Banana ba swaseha ka bunolo. Banana ba tokwa ku ziba Jehova ni ku mu utwa kuli ba picuke malaba a Diabulosi. Zibo ya Bibele ki ya butokwa. Jesu n’a ize: “Bupilo bo bu sa feli, kikuli ba ku zibe, Wena, Mulimu a nosi wa niti, ni y’o lumile, yena Jesu Kreste.” (Joani 17:3) Ku zwa f’o banana ba tokwa butali—buikoneli bwa ku utwisisa ni ku sebelisa ze ba ituta. Bakeñisa kuli “mwa mukunda wa butali mutu wa silelezwa,” mina bashemi mu tokwa ku suña niti mwa lipilu za bana ba mina. (Muekelesia 7:12) Mu kona ku eza cwañi cwalo?

5. (a) Butali bu kona ku suñiwa cwañi? (b) Liñolo la Liproverbia li talusa cwañi butokwa bwa butali?

⁵ Mwa kona ku balelanga bana ba mina Linzwi la Mulimu, mi mane mwa swanela ku eza cwalo. Kono ku ba tusa ku lata Jehova ni ku mu utwa ku tokwa ze ñata—ku tokwa kuli ba utwisise. Ka mutala: Mwanana wa kona ku bulelelwa kuli a si ke a tula mukwakwa pili a si ka talima kafa ni kafa. Kono banana ba bañwi b’a kona ku sa mamela taba yeo. Kabakalañi? Mwendi ha ba si ka talusezwa hande bumaswe bwa ku natiwa ki mota kamba mwendi ba taluselizwe kono isiñi ka nzila y’e ba sabisa ku eza cwalo, ilikuli ba hanyeze “bungulunde” bo bu kona ku tisa kozi. Ku suña butali ku tokwa nako, hamohocwalo ni pilu-telele ye tuna. Kono butali ki nto ya butokwa hahulu! Bibele i li: “Linzila za bona ki linzila fo ku iketilwe, mi mikwakwa ya bona kaufela ki ya kozo. Ki kota ya bupilo ku ba ba bu sweli, mi ya bu inisa ku yena, u na ni mbuyoti.”—Liproverbia 3:13-18; 22:15.

Mulutelo O Suña Butali

6. (a) Ki kabakalañi banana hañata ha ba banga ni butoto? (b) Ki ndwa ifi ye li teñi?

⁶ Hañata banana ba ezanga mafosisa, isiñi kabakala kuli ha ba si ka lutiwa lika ze lukile, kono kabakala kuli tuto ha i si ka ba fita kwa lipilu, kamba mutu wa bona wa mwahali. Diabulosi u sweli wa lwana kuli a hape lipilu za banana. S’a bata kikuli banana ba kopane ni kukuezo ye maswe ya lifasi la hae. Hape u likanga ku itusisa mihupulo ya bona ya sibi ye ba hozize kuli ba eze ze maswe. (Genese 8:21; Samu 51:5) Bashemi ba tokwa ku lemuha kuli ku na ni ndwa luli ye li teñi ya ku bata ku kelusa lipilu za bana ba bona.

7. Ki kabakalañi ku bulelela fela mwana ze lukile kamba ze fosahalile ha ku si ka likana?

⁷ Hañata bashemi ba bulelelanga mwana lika ze lukile kamba ze fosahalile, ka sepo ya kuli ba mu lutile sikuka se siñwi se sinde. Ba kana ba bulelela mwan’a bona kuli ku fosahalile ku puma, ku uzwa, kamba ku eza tobali ni mutu ufi kamba ufi y’o si ka nyalana ni yena. Kono mwanana u tokwa mutomo o tiile o ka mu susueza ku mamela taba yeo isiñi fela kuli kakuli bashemi ba hae ba ize cwalo. Yeo ki milao ya Jehova. Mwanana u swanela ku ziba kuli ku ba ni butali ki ku utwa litaelo za Mulimu.—Liproverbia 6:16-19; Maheberu 13:4.

8. Ki mulutelo mañi o kona ku tusa bana ku ba ni butali?

⁸ Ki ze ñata lika ze kona ku tusa mwanana yo munyinyani ku utwisisa kuli ku na ni Mubupi ya butali hahulu—inge cwalo lipulaneti, mifuta ya libupiwa ze pila, ni ku cinca kwa linako za mwaha. (Maroma 1:20; Maheberu 3:4) Ku zwa f’o mwanana u swanela ku lutiwa kuli Mulimu w’a mu lata mi ka sitabelo sa Mwan’a hae u lukisize ku mu fa bupilo bo bu sa feli ni kuli mwanana wa kona ku tabisa Mulimu ka ku mamela z’a  bulela Mulimu. Ka nzila yeo mwanana u ka tabela ku sebeleza Jehova, Diabulosi ni kwa ka lika ku mu tibela.—Liproverbia 22:6; 27:11; Joani 3:16.

9. (a) Mulutelo o fumanisa bupilo u tokwañi? (b) Ndate u laezwi ku ezañi, mi ku eza cwalo ku talusañi?

⁹ Mulutelo o sileleza mwana ni ku mu susueza ku eza ze lukile u tokwa nako, mamelelo, ni ku lelela cimo. U tokwa kuli bashemi ba lumele ku etelelwa ki Mulimu. Bibele i li: “Mina bondate, mu si ke mwa halifisa bana ba mina; kono mu ba hulise ka ku ba lemusa, ni ka tuto ya Mulena.” (Maefese 6:4) Seo si talusañi? Mwa Sigerike sa kwa makalelo linzwi la “tuto” le li itusisizwe fa, li kona ku talusa “ku suña muhupulo ku yo muñwi.” Kacwalo se ba susuezwa bondate f’o luli ki ku suña muhupulo wa Jehova kwa bana ba bona. Ku eza cwalo ku ka sileleza hahulu bana! Haiba banana ba lutiwa mihupulo ya Mulimu, ni munahanelo wa hae, mu zibe ba silelelizwe kwa bufosi.

Lilato Ibe Lona Le Li Mi Susueza

10. Kuli mu laye mwan’a mina hande, ki lika mañi za butokwa ze mu lukela ku ziba?

¹⁰ Kono kuli mu pete takazo ya mina ya ku hulisa hande mwan’a mina, lilato ki lona le li swanela ku mi susueza. Kalulo ya butokwa ki ku ambolisana hande. Mu batisise kuli mu zibe ze ezahala mwa bupilo bwa mwan’a mina ni ku ziba mwa bonela lika. Ka nako ye mu itulezi fela, mu itusise maseme kuli mu susueze mwan’a mina ku ambola. Ka linako ze ñwi, mu kana mwa ikomokela hahulu ku utwa z’a bulela. Mu tokomele kuli mu si ke mwa felela mwahalimu. Kono mu teeleze ka nzila ya ku bata ku mu tusa luli.

11. Mushemi u kona ku suña cwañi muhupulo wa Mulimu ku mwan’a hae?

¹¹ Ki niti, mwendi mu kile mwa balela mwan’a mina mwa Bibele ka za milao ya Mulimu ye hanisa buhule, mane mwendi mu kile mwa kuta-kutela ku eza cwalo. (1 Makorinte 6:18; Maefese 5:5) Mi ku eza cwalo ku kana ku tusize bana ba mina ku utwisisa lika ze tabisa Jehova ni ze sa mu tabisi. Kono yeo haki yona fela nto ye tokwahala kuli mu suñe muhupulo wa Jehova ku mwan’a mina. Banana ba tokwa ku tusiwa ku nahanisisa ka za butokwa bwa milao ya Jehova. Ba tokwa ku koliswa kuli milao ya hae i lukile mi ki ye minde ni kuli ku i mamela ki nto ye swanela mi ki ku bonisa lilato. Mu kona fela ku bulela kuli mu suñile muhupulo wa hae kwa bana ba mina ha se mu nyakisisize Mañolo hamoho ni bona ku fitela ba lumela mubonelo wa Mulimu.

12. Mushemi u kona ku tusa cwañi mwan’a hae ku nga tobali ka nzila ye swanela?

¹² Ha mu ambola ka za tobali, mwa kona ku buza kuli: “Kana u nahana kuli ku mamela mulao wa Jehova wa ku sa eza tobali pili mutu a si ka kena kale mwa linyalo kwa kona ku palelwisa mutu ku ba ni tabo?” Mu susueze mwan’a mina ku tolongosha kalabo ya hae. Ha se mu buhisani ka za tukiso ye nde ya lukisize Mulimu ya ku pepa bana, mwa kona ku buza kuli: “Kana u hupula kuli Mulimu wa luna ya lilato wa kona ku  toma milao ye ka lu palelwisa ku ikola bupilo? Kamba kana u nahana kuli milao ya hae i lukiselizwe ku lu tabisa ni ku lu sileleza?” (Samu 119:1, 2; Isaya 48:17) Mu utwe za hupula mwan’a mina fa litaba zeo. Mi hasamulaho mwa kona ku mu fa mitala ya za masitapilu ni manyando a zwa mwa buhule. (2 Samuele 13:1-33) Ha se mu nyakisisize ni mwan’a mina ku fitela a utwisisa ni ku lumela mubonelo wa Mulimu, u zibe mu petile kalulo ye tuna ya musebezi wa ku suña muhupulo wa Mulimu ku yena. Kono ku sa na ni nto ye ñwi ye mu kona ku eza.

13. Ki nto mañi ya swanela ku utwisisa mwana kuli a susumezwe ku utwa Jehova?

¹³ Ha mu na fela ku luta mwan’a mina za bumaswe bwa ku sa utwa Jehova, kono ka butali mu ka mu taluseza ni mw’a ikutwelanga Jehova ka sibili ka za mo lu pilela. Mu bonise mwan’a mina mwa Bibele kuli lwa kona ku swabisa Jehova ha lu sa ezi tato ya hae. (Samu 78:41) Mwa kona ku mu buza cwana, “Kiñi ha u sa lati ku swabisa Jehova?” kihona mu ka mu taluseza kuli: “Satani, sila sa Jehova, u piha kuli lu sebeleza Jehova kabakala lituso z’a lu fa isiñi kabakala kuli lwa mu lata.” Mi cwale mu mu taluseze kuli Jobo n’a tabisize pilu ya Jehova ka ku zwelapili ku sepahala, ili ku fa kalabo kwa taba ya buhata ya piha Satani. (Jobo 1:9-11; 27:5) Mwan’a mina u tokwa ku utwisisa kuli wa kona ku tabisa kamba ku swabisa Jehova ka likezo za hae. (Liproverbia 27:11) Banana b’a kona ku lutiwa lituto zeo za butokwa ni ze ñwi ze ñata mwa buka ya Itute ku Muluti Yo Mutuna. *

Ze Nde Ze Zwile Mwateñi

14, 15. (a) Ki lituto lifi ze susumelize banana mwa buka ya Muluti? (b) Ki lifi ze nde ze mu fumani ka ku itusisa buka yeo? (Mu bone ni sikwenda se si fa makepe 18-19.)

¹⁴ Munna yo muñwi mwa Croatia ya balanga buka ya Muluti ni muikulyae wa lilimo ze supile n’a ñozi kuli muikulyae yo n’a mu bulelezi kuli: “Boma ne ba ni lumile nto ye ñwi, kono ne ni sa lati ku i eza. Kiha se ni hupula kauhanyo yani ye bulela kuli ‘Ku Utwa Kwa Ku Sileleza,’ mi se ni kuta ku bona ni ku yo ba bulelela kuli ni ka eza mo ba bulelezi.” Bosinyalana ba bañwi kwa Florida, U.S.A., ne ba bulezi cwana ka za kauhanyo ye bulela kuli “Libaka Ha Lu Sa Lukeli ku Puma”: “I na ni lipuzo ze tokwa banana kuli ba bulele ze kwa pilu ya bona ni ku itumelela milatu ye ne ba si ke ba kona ku itumelela.”

¹⁵ Buka ya Muluti i na ni maswaniso a fitelela 230, mi maswaniso kaufela a na ni manzwi a taluso. Me yo muñwi ya itebuha n’a ize: “Mwan’a ka hañata u buhanga siswaniso si li  siñwi nako ye telele mi h’a latangi ku apula likepe le li tatama. Maswaniso a teñi a tabisa kono hape a fa tuto isali ona, mi a shangumuna banana kuli ba buze lipuzo. Ha n’a boni siswaniso sa mwanana ya n’a buha TV mwa simbwi, mwan’a ka a ni buza ka linzwi le li utwahala kuli n’a lemuhile kuli ku na ni se si fosahezi, a li: ‘Ima, mwanana yo u ezañi fa?’” Manzwi a siswaniso seo a bulela kuli: “Ki mañi ya kona ku bona ze lu eza kaufela?”

Tuto Ya Butokwa Kacenu

16. Ki nto mañi ya butokwa ye ba tokwa ku lutiwa banana kacenu, mi ki kabakalañi?

¹⁶ Banana ba tokwa ku ziba kuli ki ufi muitusisezo o munde ni o maswe wa lilama za bona za zwalo. Kono yeo ki taba ye t’ata ku i ambola. Muñoli yo muñwi wa mitende n’a ize miteñi ya n’a hula ne ku ngiwa kuli ku punda mabizo a lilama za zwalo ki kashwau. Ka za taba ya ku luta bana ba hae, n’a ñozi kuli: “Ni na ni ku latela maswabi a ka kwatuko.” Ki niti, bana ha ba silelezwi haiba bashemi ba bona ba palelwa ku ambola za tobali kabakala ku utwa maswabi. Bashenguli ba petanga milelo ya bona bakeñisa kuli mwanana ha ku na sa ziba. Buka ya Itute ku Muluti Yo Mutuna i bulela za tobali ka nzila ye nde, ya likute. Ku ambola ni banana za tobali haki ku ba luta butanya, kono ha ba sa lemuswi ka za teñi ba kona ku kwecekiwa ka bunolo.

17. Buka ya Muluti i tusa cwañi bashemi ku luta bana ba bona za tobali?

¹⁷ Mwa kauhanyo 10, mwa taba ye bulela za mangeloi a maswe a n’a tile fa lifasi-mubu ni ku t’o pepa bana, ku na ni puzo ye li, “Ki lika mañi z’o ziba ka za tobali?” Buka yeo i fa kalabo ye bunolo ka likute. Hasamulaho, kauhanyo 32 i talusa za banana mo ba kona ku silelelezwa kwa bashenguli. Ku amuhezwi mañolo a mañata a bonisa kuli tuto yeo ki ya butokwa. Yo muñwi n’a ize: “Sunda ye felile mwan’a ka Javan ha n’a ilo bonana ni dokota wa hae ya talima za banana, dokota n’a mu buzize ka za haiba ne lu ambolisani ni Javan ka za muitusisezo o munde wa lilama za zwalo. Dokota n’a  tabile hahulu ku utwa kuli ne lu ezize cwalo ka ku itusisa buka ya luna ye nca.”

18. Buka ya Muluti i talusa cwañi taba ya ku kubamela lisupo ze yemela naha?

¹⁸ Kauhanyo ye ñwi i bulela za mitangana ba Maheberu ba balalu bo Shadrake, Meshaki ni Abedi-Nego, ba ne ba hanile ku kubamela siswaniso se ne si yemela Mubuso wa Babilona. (Daniele 3:1-30) Batu ba bañwi ba kana ba sa boni kuli ku kubamela siswaniso ni ku caela ndembela silutu za swana, sina mo i boniseza buka ya Muluti. Kono ha mu utwe za n’a bulezi muñoli ya bizwa Edward Gaffney ha n’a buhisana ni ba koranta ya U.S. Catholic. N’a ize zazi la pili la n’a ile mwan’a hae wa musizana kwa sikolo sa muuso n’a til’o mu bulelela kuli u izo ituta “tapelo ye nca kwa sikolo,” mi a mu kupa ku i kutela kuli a i teeleze. Gaffney n’a ize: “S’a beya lizoho la hae fa sifuba mi a kala ku bulela ka tabo kuli, ‘Ni ikatulela ku kuteka ndembela . . . ’” Gaffney n’a ekelize kuli: “Honaf’o fela, na lemuha nto ye ñwi. Lipaki za Jehova ne ba nepile. Ku na ni bulapeli bo lu lutiwanga mwa likolo isali kwa bwanana—ki bulapeli bwa ku lapela naha.”

Haki ku Ikataleza Fela Mbango

19. Ki mipuzo mañi ye zwa mwa ku luta bana?

¹⁹ Ku bulela fela niti ku luta bana ba mina haki nto ya mbango. Me yo muñwi kwa Kansas, U.S.A. n’a lotisize mioko ha n’a amuhezi liñolo ku zwa ku mwan’a hae. N’a mu ñolezi kuli: “Ni ikutwa kuli ni litohonolo kuli ne ni hulisizwe ka  nzila ye ni konisa ku ba ni munahano o munde, o iketile. Mina ni bondate kaniti mu ezize musebezi o swanelwa ki tumbo.” (Liproverbia 31:28) Buka ya Itute ku Muluti Yo Mutuna i kona ku tusa bashemi ba bañwi ba bañata ku luta bana ba bona ilikuli ba sileleze sanda sa bona seo sa butokwa.

20. Bashemi ba swanela ku hupulañi kamita, mi ba swanela ku ezañi bakeñisa taba yeo?

²⁰ Bana ba luna ba swanela ku fiwa nako, mamelelo, ni buikatazo bwa luna kaufela bo lu kona ku fa. Ha ba na ku zwelapili ku ba fela banana honacwalo; ba tuha ba hula. Mu like ka mo mu konela kaufela kuli mu be ni bona ni ku ba tusa. Ha mu na ku inyaza ni kamuta. Ba ka fita fa ku mi lata. Kamita mu no hupula kuli bana ba mina ki mpo y’a mi file Mulimu. Ki sanda sa butokwa hahulu! (Samu 127:3-5) Kacwalo mu ba babalele sina sanda sa butokwa, kakuli mu ka ikalabela ku Mulimu ka za mo mu ba huliseza.

[Litaluso za kwatasi]

Ne Mu Ka Alaba Cwañi?

• Ki kabakalañi bashemi ha ba tokwa ku sileleza bana ba bona sihulu kacenu?

• Ki mulutelo mañi o suña butali?

• Ki lifi litaba ze mu tokwa ku buhisana ni bana ba mina kacenu?

• Buka ya Muluti i tusize cwañi bashemi ku luta bana ba bona?

[Lipuzo za Tuto]

[Mbokisi/Maswaniso a fa likepe 18, 19]

Buka ya Batu Kaufela

Buka ya Itute ku Muluti Yo Mutuna ne i ñolezwi ku tusa bashemi ni batu ba bañwi ba bahulu kuli ba balange ni ku buhisananga lituto za Jesu Kreste ni banana. Niteñi, ba bahulu ba ba ipalezi buka ye ba fitisize buitebuho bwa bona bakeñisa ze ba itutile ku yona.

Munna yo muñwi wa kwa Texas, U.S.A., n’a bulezi kuli: “Buka ya Itute ku Muluti Yo Mutuna ki buka ye bunolo hahulu ku utwisisa, i susueza batu ba lilimo kaufela—nihaiba mutu wa lililmo ze 76, inge na. Na itumela hahulu, ka ku ba ya sebelelize Jehova ku zwa kwa bwanana.”

Mubali yo muñwi wa kwa London, kwa England, n’a ize: “Maswaniso a mande a tamehile ku hoha mamelelo ya bashemi ni banana. I na ni lipuzo ze nde mi i ñozwi ka muñolelo o tabisa, mi kwa tabisa luli ku bona mo li bulelezwi nihaiba zona litaba ze tuna, inge cwalo mwa kauhanyo 32 ye bulela kuli, ‘Mwa N’a Silelelizwe Jesu.’” N’a unguzi ka ku bulela kuli: “Nihaike kuli buka ye ku si na kakanyo i ñolezwi bana ba Lipaki za Jehova, ni nahana kuli baluti ni batu ba bañwi ba ka tabela hahulu ku ba ni yona. Ni nyolezwi ku itusisa yona mwa likweli ni mwa lilimo ze taha.”

Musali yo muñwi wa kwa Massachusetts, kwa U.S.A., n’a bulezi ka za “maswaniso a swanela hahulu a beilwe mwateñi.” N’a ize: “Ni lemuhile kuli nihaike kuli buka ye i ñolezwi banana, lituto ze ku yona li kona ku tusa nihaiba luna ba bahulu ku nahana ka za bulikani bwa luna ni Jehova.”

“Ha! Ki buka ye nde hahulu! Haki ya banana fela kono ki ya luna kaufela ka ku ba bana ba Mulimu. I ni fitile luli kwa pilu, i ni nahanisize lika ze ñata ni ku ni omba-omba, mi kacwalo ni mwa kozo. Ni ikutwa bukaufi hahulu ni Jehova Ndate. U zwisize ku na lika kaufela z’e ni katalize mwahal’a lilimo-limo mi u ni bonisize hande-nde mulelo wa hae.” Ao ki manzwi a n’a bulezwi ki musali wa kwa Maine, kwa U.S.A. N’a felize ka ku bulela kuli: “Ni bulelela mañi ni mañi kuli, ‘Shangwe mu i bale.’”

Musali yo muñwi wa kwa Kyoto, kwa Japan, n’a talusize kuli ha n’a balela baikulu ba hae, ne ba mu buzize lipuzo ze cwale ka ze: “‘Mushimani y’o u ezañi? Kiñi musizana y’o ha kalimelwa? Musali y’o u ezañi? Tau ye bo?’ I lu luta lika ze lu tabela, mi kacwalo ni i lata hahulu ku fita buka ifi kamba ifi ye ni kona ku fumana mwa sifalana sa libuka.”

Ndate lubasi yo muñwi wa mwa Calgary, kwa Canada, u talusa kuli a sa amuhela fela buka ye, a kala ku i balela mwan’a hae wa musizana wa lilimo ze 6 ni wa mushimani wa lilimo ze 9. U li: “Kapili-pili se ba i tabela. Bana ba ka ne ba teeleza ni ku alaba lipuzo ka manzwi a bona beñi. Ne ba ikutwa kuli ba abana luli mwa tuto, mi buka ye ne i ba file kolo ya ku bulela maikuto a bona. Ba sile fa meto, mi mwan’a ka wa musizana yena u li u bata ku itutanga buka ye nca ye zazi ni zazi busihu.”

Zazi le liñwi ha se ba felize tuto, ndate lubasi y’o u li: “Na ambola ni mwan’a ka wa mushimani ka nako ye telele ka za Jehova ni milelo ya hae. N’a na ni lipuzo ze ñata ze ne tomile ku ze ne lu itutile mwa buka. Na enga-enga miyoko mwan’a ka ha ni laeza ni ku ni buza kuli: ‘Tate, kuli lwa kona ku ikambota cwana hape? Ni na ni lipuzo ze ñata, mi ni bata ku ziba lika kaufela ka za Jehova.’”

[Siswaniso se si fa likepe 15]

Bashemi mu kona ku itutañi kwa mutala wa Manoa?

[Siswaniso se si fa likepe 16]

Banana mu kona ku itutañi kwa mutala wa Maheberu ba balalu?

[Siswaniso se si fa likepe 17]

Maswaniso a mwa buka ya “Muluti” ni litaluso za ona li tusa hahulu kwa ku luta

Ananiasi u pumañi Pitrosi?

Ki mañi ya kona ku bona ze lu eza kaufela?