Lipuzo Ze Zwa kwa Babali

Kana Mukreste wa Swanela ku yana mubeleki wa muuso, kamba ku mu fa mpo bakeñisa musebezi wa hae, kamba kana ku eza cwalo ku ka ngiwa kuli ki ku leka kweta?

Ko ba pila kaufela, Bakreste ba bata ku sebelisa butali mwa miinelo ya fa sibaka, inze ba hupula kuli ze kona ku lumelelwa ka mulao mwa naha ye ñwi li kona ku sa lumelelwa ku ye ñwi. (Liproverbia 2:6-9) Mane Mukreste u swanela ku no hupulanga kuli mutu kaufela ya bata ku ‘ina mwa Tabernakele ya [Muñ’a] Bupilo’ u swanela ku hana likweta.—Samu 15:1, 5; Liproverbia 17:23.

Kweta ki nto mañi? Ka ku ya ka The World Book Encyclopedia, “kweta i talusa ku fa nto ye ñwi ya butokwa ku . . . mutu ya fa situlo se situna sa musebezi, ili yo kwa mafelelezo u ka loba mulao kuli a tuse ya mu file mpo.” Kacwalo, ku si na taba kuli mutu u pila kai kamba kai, ki ku leka kweta haiba lu fa muatuli, mupokola kamba mutatubisisi wa litaba masheleñi kuli a keluse katulo, ku icanganisa mulatu o ezizwe kamba mulao o lobilwe. Hape ki ku leka kweta haiba mutu a itusisa mpo kwa ku fumana nto ya bata, inge cwalo ku beiwa wa pili fa mukoloko wa ba ba sweli ku litela kamba ku yola ba bañwi mwa mulaini. Ku eza cwalo hape ku bonisa kutokwa lilato.—Mateu 7:12; 22:39.

Kono kana ki ku leka kweta haiba lu fa mpo kamba ku yana mubeleki wa muuso kuli a lu shemube kamba kuli lu si ke lwa ketululwa? Ka mutala, mwa linaha ze ñwi ba bahulu fa misebezi ba hananga ku amuhela banana ba ba bata ku ñoliswa kwa sikolo, ku hana ku swala mutu mwa sipatela, kamba ku hana ku fa mutu mapampili a mu konisa ku ya kwa naha i sili kuti esi ha ba ka yaniwa. Kamba mane fokuñwi ba kona ku liyeha-liyeha ku uncafaza mañolo a tumelezo ni litupa.

Batu mo b’a ngela mikwa ya ku yana kwa fapahana ka ku ya ka ko ba pila. Mwa linaha m’o mukwa wa ku yana u ngiwa sina sizo, Bakreste ba bañwi ba kona ku ikutwa kuli ha ba lobi likuka za Bibele haiba ba yana yo muhulu fa musebezi bakeñisa musebezi w’a sweli ku peta. Mane ku eza cwalo mwa linaha ze ñwi ku ngiwa kuli ki mpo ye ekeza kwa tuelo ye nyinyani ya mubeleki wa muuso. Mu lemuhe kuli ku na ni shutano mwahal’a ku fa mpo bakeñisa ku bata ku shemubwa ka nzila ya ku sa loba mulao ni ku leka kweta ka mulelo wa ku bata ku shemubwa ka ku loba mulao.

Niteñi, ha ba bata ku ezezwa lika ze ñwi za ka mulao, Lipaki za Jehova ba bañwi ba hananga ku yana batatubisisi ba litaba, ba ba bona za ku sila miseto, ni ba bañwi cwalo ku si na taba kuli ku eza cwalo ki sizo mwa libaka zeo. Bakeñisa kuli Lipaki ki batu ba ba zibwa ka buniti ni busepahali bwa bona, fokuñwi b’a shemubiwanga ku sina ku lifa pene hailif’o ba bañwi bona ba shemubiwanga fela ha ba lifa masheleñi.—Liproverbia 10:9; Mateu 5:16.

Ka ku kusufaza taba, mutang’a Jehova kaufela u swanela ku ikatulela haiba u ka yana mutu ilikuli a shemubwe kamba kuli a sike a ketululwa. Sa butokwa ki ku eza keto ye ka mu siya inze a na ni lizwalo le linde, le li sa shwaulisi libizo la Jehova, ili le li sa sitatalisi ba bañwi.—Mateu 6:9; 1 Makorinte 10:31-33; 2 Makorinte 6:3; 1 Timotea 1:5.