Muafilika ya Ikokobeza Ya N’a Lata Linzwi la Mulimu

BAPOTI ba ba tahanga mwa Africa ba komokanga hahulu ku fumana kuli ku bunolo ku kala ku ambola ni batu ka za Bibele. Batu ba tabelanga ku teeleza ha ba buziwa lipuzo ze cwale ka za kuli “Mubuso wa Mulimu ki nto mañi?” kamba “Kana butata bo bu cwale ka lukupwe, matuku, lindwa, ni bukebenga bu ka tatululwa ka ku tala?” Ba bañata ba lumelezanga ka tabo mutu ye ba sa zibi kuli a ba bonise likalabo mwa Bibele. Hañata tuto ya Bibele ya kaliswanga. Mi baituti ha ba nze ba zwelapili kwa moya, ba fitanga fa ku ba Bakreste ba ba kolobelizwe.

Yo muñwi wa Maafilika ba pili ya n’a ngile muhato hamulaho wa ku kutazwa ka nzila yeo u bulezwi mwa Bibele kwa Likezo 8:26-40. Ne li munna ya n’a zwelela kwa Etopia ya n’a ile kwa Jerusalema ku yo lapela Mulimu wa niti, Jehova.

Sina ka mo ku boniselizwe fa siswaniso se si kwatasi, munna wa Muetopia u kutela habo yena inz’a zamaya mwa koloi ya hae, mi u bala mwa muputo. Mutu ya sa zibi wa mu atumela ni ku mu buza kuli: “Kana u utwisisa s’o bala?” Muetopia u alaba ka buikokobezo kuli h’a utwisisi mi u kupa mutu ya sa zibi y’o, ili Filipi mukutazi wa Mukreste, kuli a kene mwa koloi. Kihona a kupa Filipi kuli a mu taluseze Liñolo la sa z’o bala. Filipi u mu taluseza kuli ki bupolofita bo bu supa kwa lifu la Mesiya, yena Jesu Kreste, ya n’a sa z’o shwa. Filipi hape wa bulela ka za lika ze ñwi ze ama “Jesu,” ku si na ku kakanya a kopanyeleza cwalo ni za zuho ya hae.

Ha utwa litaba za niti zeo, Muetopia u bata ku ba mulutiwa wa Jesu mi u buza kuli: “Kiñi se si ka ni hanisa ku kolobezwa?” Hamulaho wa kolobezo ya hae, Muafilika ya ikokobeza y’o u wela hape mwa mukwakwa o liba habo inz’a tabile, mi Bibele ha i buleli se siñwi hape ka za hae.

Kacenu, Lipaki za Jehova ba sweli ku tusa bolule-lule mwa lifasi kaufela kuli ba itute ka za taba ye nde ye swana yeo. Lituto za Bibele ze bat’o eza 6 milioni li sweli za zamaiswa fa mandu.